24°C , Partly cloudy | Kigali-Rwanda

Musanze: Ababyeyi basabwe kujya borohereza abana gusura inzibutso za Jenoside

Yanditswe na NGABOYAHIZI PROTAIS

Ku ya 17-04-2018 saa 08:21:10

 

Guverineri w’Intara y’Amajyaruguru Gatabazi Jean Marie Vianney, asaba ababyeyi kujya borohereza abana gusura inzibutso za Jenoside yakorewe abatutsi, kugira ngo nabo bahakure ubumenyi ku mateka ya Jenoside u Rwanda rwaciyemo.

Ni ubutumwa yatangiye mu muhango wo kunamira abazize Jenoside yakorewe abatutsi mu 1994, biciwe ku cyahoze ari urukiko rw’ubujurire rwa Ruhengeri (Court d’Appel Ruhengeri).

Abaturage muri rusange basabwe kwamagana icyagarura Jenocide cyose

Guverineri Gatabazi mu butumwa bwe yagize ati “Ibyabaye mu Rwanda kugeza ubwo habaho Jenoside yakorewe abatutsi mu 1994, byatewe no gutoza abana ibibi aho babaga bari hose, mu mashuri ndetse no mu biganiro bagiranaga.

Ibi rero igihe kirageze ngo amateka ahinduke, ababyeyi mutoze abana gukura bakunda igihugu cyabo bagendera kure ingengabitekerezo ya Jenoside, ariko na none ndasaba ababyeyi, ibigo by’amashuri n’ahandi hahurira urubyiruko gufasha abana kubona uburyo bwo gusura inzibutso, kugira ngo bige amateka mabi yaranze u Rwanda, bityo bizabafashe kurwanya ingengabitekerezo ya Jenoside”.

Umwe mu barokokeye ku cyahoze ari urukiko rw’ubujurire rwa Ruhengeri, Mukamukiza Devothe, mu buhamya yatanze yagize ati “Twakuwe hirya no hino mu byahoze ari za Komini, maze batuzana hano batwizeza ko ngo tugiye kuharindirwa, rwose twaje tuhizeye ubuzima, ariko nko mu kigo gitanga ubutabera si ko byagenze, kuko barahatwiciye.

Rwose twari duhari turenze ibihumbi ntazi, nkange naje nturutse mu cyahoze ari komini Nyarutovu, muri Perefegitura ya Ruhengeri, nge n’ababyeyi bange n’abo tuva inda imwe Jenoside yankozeho kugeza ubwo mu bana 10 n’ababyeyi bange  ari nge  warokotse.”

Yakomeje agira ati “Badushyize muri uru rukiko baraturundanya, maze badutera ibyuma na za Gerenade  nta n’ubwo nzi uko ingabo zahoze ari iza FPR Inkotanyi zatugezeho ngo zidukize abo bicanyi kuko nta bwo nari nzi aho ndi.

Ndazishima kuko iyo zitanahagera nta n’umwe wo kubara inkuru wari kurokoka, n’ubwo ababyeyi bange n’abavandimwe bigendeye nkiri umwana, mfite Leta nk’umubyeyi kuko yampaye uburyo bwo kwiga kugera muri Kaminuza, ubu ndiho neza kandi mparanira gukomeza kwiteza imbere”.

Kuri ubu ku rukuta rw’abazize Jenoside yakorewe abatutsi baguye ku rukiko rw’ubujurire rwa Ruhengeri, hamaze kuboneka amazina y’abantu 89, mu gihe bivugwa ko hiciwe abasaga 800, ubuyobozi bukaba busaba buri wese waba ufite amakuru y’abandi bahaguye kuyatanga.

TANGA IGITEKEREZO

Leave a Reply

Be the First to Comment!

avatar