Muri NST1, u Rwanda rwiyemeje korohereza abatagira amacumbi

Yanditswe na Sezibera Anselme

Ku ya 21-11-2019 saa 07:41:41
Igishushanyo kigaragaza uko amazu ya Rugarama Park Estate azaba ameze amaze kuzura

Leta y’u Rwanda ku bufatanye na Banki y’Isi ikomeje urugendo rwo gutuza Abanyarwanda bafite ubushobozi buke kubona inguzanyo iciriritse ibafasha kugura amacumbi ajyanye n’ubushobozi bwabo kandi agendanye n’ikerekezo, mu rwego rwo gushimangira intego ya gahunda ya Guverinoma y’imyaka irindwi, NST1.

Byagarutsweho mu kiganiro Banki y’Igihugu Itsura amajyambere (BRD) n’Ikigo k’Igihugu gishinzwe imiturire (RHA) bagiranye n’abanyamakuru ku itariki ya 20 Ugushyingo 2019, mu rwego rwo kugaragaza gahunda zihari zo gufasha Abanyarwanda badafite ubushobozi bwinshi ngo babashe kubona amacumbi meza.

Umuyobozi Mukuru wa Banki y’Igihugu itsura Amajyambere (BRD) Rutabana Eric, avuga ko muri gahunda ya Guverinoma y’imyaka irindwi, NST1, iva mu 2017-2024 umubare w’Abanyarwanda bazaba batuye mu migi uzava kuri 18% muri 2017 ukagera kuri 35% mu 2024.

Agira ati: “Mu rwego rwo kubigeraho, byasabye Leta y’u Rwanda ifatanyije na Banki y’Isi, bashatse amafaranga yo gufasha Abanyarwanda bakeneye inzu kugira ngo babone inguzanyo y’igihe kirekire kandi zihendutse ugereranyije n’andi mabanki.”

Ubusanzwe inguzanyo itangwa ku bijyanye n’icumbi usanga amabanki atanga iy’imyaka iri hagati ya 5 na 10, hake aho ushobora kubona imyaka irenze iyo ugasanga ikiguzi kuri iyo nguzanyo kiri hagati ya 16% na 18% n’abaharenza ugasanga bigoranye.

Leta y’u Rwanda yegereye Banki y’Isi ifata amafaranga y’inguzanyo angana na miriyoni 150 z’amadorari y’Amerika kugira ngo ifashe icyo kiciro cy’Abanyarwanda bashobore kubona amacumbi, BRD ihabwa inshingano zo gukurikirana imitangire yayo ngo anyuzwe mu bigo by’imari no gufasha abubaka izo nzu ngo babone ibikorwa remezo bijyana n’izo nzu”.

Rutabana avuga ko izo nzu ziteganywa kubakwa ari mu byiciro bitandukanye, asobanura neza ko uwo mushinga ureba inzu zifite agaciro katarenze miriyoni 35 z’amafaranga y’u Rwanda.

Ati: Ufatiye ku kigero cy’umushahara twavuze utarenga ibihumbi 700 y’u Rwanda ko ari bo barebwa n’izo nzu ziciriritse kuko ubariyemo ibyo Leta ifasha abashoramari mu bijyanye n’ikiguzi cy’umuhanda, ikiguzi cy’amazi, icy’amashanyarazi byavuyemo, igiciro cyo kubaka kigabanukaho 35%, nanone wakoresha ibikoresho cyane cyane bikomoka mu Rwanda bigatuma ikiguzi k’inzu yubatswe kigabanuka”.

Akomeza agira ati: Tugiye nko mu mibare ikigo RHA (k’imiturire) cyari cyakoze twasanze igipimo twaheraho cyo hejuru cyaba ari miriyoni 35 y’u Rwanda kuri izo nzu ariko hasi y’icyo giciro hakaba n’ibindi byiciro by’inzu yaba iy’icyumba kimwe, bibiri gutyo.”

Atanga urugero rufatika, Rutabana avuga ko inzu nk’izo zizanubakwa ahitwa Rugarama muri Nyamirambo, ahubakwa ibyiciro by’inzu zitandukanye zizubakwa harimo izifite icyumba kimwe, uruganiriro n’ibindi bikenewe ifite agaciro ka miriyoni 12, hakaba iy’ibyumba 2, uruganiriro n’ibindi ya miriyoni 18 ndetse n’inzu y’ibyumba 4 ya miriyoni 35.

Nk’uko abitangaza, amara impungenge abibaza ku ngwate izasabwa, abamenyesha ko iyo nzu igiye kugurwa n’ubundi ari yo iba ingwate. Gusa asobanura ko hari igihe banki ikorana n’uwifuza kugurirwa inzu yamusaba kugira uruhare rwe rutoya ashyiraho ngo ayigurirwe.

Abanyamakuru banabajije icyo uwifuza kugurirwa inzu asabwa gukora no kuba yujuje, Rutabana atangaza ko umuntu wifuza inzu muri iyo gahunda agiye gutunga inzu ye ku nshuro ya mbere. Asobanura ko kugira ngo bamenye ayo makuru bazajya bakorana n’Ikigo cy’Ubutaka kugira ngo bamenye niba nta yindi nzu asanzwe atunze.

Hibajijwe kandi niba uwo mushinga uzareba Umujyi wa Kigali gusa cyangwa niba uzanagezwa mu migi iwunganira itandukanye, Rutabana yongera gusubiza ko gahunda ihari ari uko imigi yunganira Kigali nayo yabamo ibikorwa remezo bifasha abaturarwanda bajya guturayo kandi bakaba mu buzima bwiza.

Ati “Ntaho iyo mishinga ihejwe mu turere twinshi izahakorera kandi hakaba hari n’abashoramari batangiye gushoramo imari mu kubaka izo nyubako bityo Abanyarwanda bahari bujuje ibisabwa bashobora kubona inguzanyo zo kugura izo nzu yaba ayubakwa ubu cyangwa azubakwa mu gihe kizaza.”

Umuyobozi Mukuru w’Ikigo k’Igihugu k’Imiturire (RHA) Serubibi Eric, na we asobanura ikigenderwaho ngo hemezwe ko inzu ziciriritse, avuga ko iyo umuntu abasha gutanga 30% by’ibyo yinjiza ashaka icumbi icyo gihe iryo cumbi riba riciriritse ku bushobozi bwe.

Avuga ko kuva iyo gahunda yatangizwa mu kubaka inzu ziciriritse ngo abantu batuzwe neza kandi bifashe umuntu kugira inzu ye, inyungu igenda igaragara kuko abantu bamaze kubyitabira baba Abanyarwanda n’abanyamahanga. Ati: “Ubu dufite imishinga 17 izatanga inzu 12 050 kandi bikaba bitanga ikizere ku bijyanye n’izo nzu.”

Serubibi ashimangira ko kuri uwo mushinga mu migi yunganira Kigali, avuga ko muri Musanze hari umushoramari wifuza kuhashyira inzu 240, Rubavu 360 hakaba n’ubundi butaka buhari bufitwe n’abashoramari cyangwa ibigo mu turere twa Nyagatare, Rwamagana, Nyanza na Huye bategereje uwaza kuhakorera ibyo bikorwa.

Ikigo k’Igihugu k’Imiturire RHA, gitangaza ko abifuza kugendana n’iyi gahunda yatangiye muri Nyakanga 2019 kandi igikomeje kuko amafaranga ahari kandi hamaze no kwiyandikisha banki 3 mu zigomba kuyanyuzwaho harimo Banki ya Kigali BK, Zigama CSC na Bank of Africa.

Umwanditsi:

Sezibera Anselme

Tanga Igitekerezo

Email yanyu ntigaragazwa ku rubuga. Amazina na Email ni ngombwa.