18°C , Partly cloudy | Kigali-Rwanda
Umutoza wa Musanze FC, Habimana Sosthene mu gihe yakomeza kwitwara nabi ashobora kwirukanwa

Muri Musanze FC bahangayikishijwe n’umusaruro mubi w’iyi kipe

Yanditswe na admin

Ku ya 01-11-2017 saa 14:53:12

Nyuma yo gutangira nabi, umutoza wa Musanze FC, Habimana Sosthène, ashobora gutangira kujya mu mazi abira mu gihe atabasha kwitwara neza mu mikino iri imbere muri shampiyona.

Kuri ubu  Musanze FC  ni yo iri ku mwanya wa nyuma n’amanota 3  mu mikino 4.  Aho yatsinze umukino umwe wa Bugesera FC ubundi  itsindwa na Police FC, Kirehe na Kiyovu.

Umutoza wa Musanze FC, Habimana Sosthene mu gihe yakomeza kwitwara nabi ashobora kwirukanwa

Abakunzi ba Musanze FC baravuga ko umusaruro w’iyi kipe udashimishije ku ikipe yasoje ku mwanya wa 6 muri shampiyona iheruka  ikaba yari yihaye intego zo kuza mu makipe ane ya mbere muri uyu mwaka wa 2017-2018.

Umutoza wa Musanze FC, Habimana Sosthène avuga ko kuba ikipe ari nshya ari kimwe mu bishobora gutuma ititwara neza mu minsi ya mbere. Ati “Bigenda bikosoka. Ntabwo ukosora umunsi umwe, bigenda biza buhoro buhoro. Musanze ni ikipe yahindutse, dufitemo amaraso mashya, urumva ko guhuza bitarabasha kuboneka. Ikindi iyo utsinzwe si ukuvuga ko byose biba bitagenze neza ”.

Umunyamabanga wa Musanze FC, Moussa Masumbuko na we yemera ko umusaruro w’iyi kipe udashimishije n’ubwo hakiri kare. Ati ”Ni byo twatangiye nabi, kandi dutsindwa tutarahura n’amakipe akomeye usibye iyadutsinze ejo bundi ya Police FC, ntiturahura na APR FC na Rayon Sports. Iyo ubona umusaruro umeze kuriya usubira inyuma ukareba, ugasanga ibyo wagombaga gukora byose warabikoze. Gusa muri rusange nta kibazo gihari, turabifata nk’ibisanzwe biba mu mupira w’amaguru”.

Umunyamabanga mukuru wa Musanze yabaye nk’uhakana  amakuru yavugaga ko ubuyobozi bwa Musanze bwaba bugiye guha umutoza wayo imikino ibiri ya Mukura n’Amagaju FC  yananirwa kuyitsinda akirukanwa. Ati ”Burya hari icyo wiha nk’intego  hari n’aho ugera ukavuga uti ndabona bya bintu bitagishobotse ndabona twashaka undi muvuno. Niba shampiyona imaze imikino ine, hasigaye 11 mu mikino ntarirarenga, ubu ngubu nka komite turabona ko ibintu bigishoboka, ntiturabona ko ibintu byacitse ku buryo twaha impuruza umutoza. Ariko tubonye bimaze gukomera twakwicara  tukareba icyo gukora”.

 Musanze FC ku mukino w’umunsi wa 5 wa shampiyona, tariki 5 Ugushyingo 2017  izakina na Mukura i Huye. Mukura ubu iri ku mwanya wa 5 n’amanota 7 mu gihe Musanze FC iri ku mwanya wa nyuma wa 16 n’amanota 3.

BIZIMANA ERIC

TANGA IGITEKEREZO

Leave a Reply

Be the First to Comment!

avatar