26°C , Partly sunny | Kigali-Rwanda
Murenzi Abdallah wabaye Umuyobozi w'Akarere ka Nyanza na Perezida w'ikipe ya Rayon Sports aratanga inama ku cyafasha amakipe ahura n'ibibazo by'amikoro

Murenzi yagaragaje ingamba zarandura ubukene mu makipe arimo n’ay’uturere

Yanditswe na BIZIMANA ERIC

Ku ya 17-06-2018 saa 09:32:55

Amakipe yo mu kiciro cya mbere yiganjemo afashwa n’uturere  yugarijwe n’ubukene. Amenshi mu makipe azahemba abakinnyi mu kwezi gutaha ubwo ingengo y’imari izaba isohotse. Si mu makipe y’uturere buri gusa  kuko nka Miroplast FC  y’umuntu ku giti ke na yo iri mu zimara  amezi zidahemba abakozi bazo.

Murenzi Abdallah wabaye Umuyobozi w’Akarere ka Nyanza na Perezida w’ikipe ya Rayon Sports aratanga inama ku cyafasha amakipe ahura n’ibibazo by’amikoro

Minisiteri y’Ubutegetsi bw’Igihugu yari yatangiye kuvuga ko amafaranga y’ingengo y’imari y’uturere ajya mu mupira w’amaguru akwiye kugabanyuka ntarenge miliyoni 60 mu gihe hari  uturere  twatangaga arenga miliyoni 150.

Mu gushaka kumenya umuti w’ubu bukene buvugwa mu makipe , Imvaho Nshya yaganiriye na Murenzi Abdallah, wahoze ari Umuyobozi w’Akarere ka Nyanza anabifatanya no kuyobora Rayon Sports yari yarasubiye i Nyanza  kuva mu 2012-2015  ayihesha igikombe cya shampiyona cya 2012-2013.

Murenzi  wabaye rwiyemezamirimo mu bijyanye n’ubwubatsi  yagaragaje ingamba 4 zafatwa mu guca burundu ibi bibazo.

Uko yashakiye Rayon Sports abaterankunga

Murenzi agaragaza ko bajya gutwara igikombe cya 2012-2013 bari bafite ingengo y’imari ya miliyoni 200 z’amafaranga y’u Rwanda mu gihe nyamara akarere kitwaga umuterankunga mukuru katangaga gusa miliyoni 47 zingana na 1/5 cy’amafaranga yose.

Murenzi avuga ko byatumye atekereza cyane, ashaka uburyo yabona abafatanyabikorwa bo kunganira ikipe, atangira ibiganiro n’uruganda rwa SKOL binyuze ku muntu w’inshuti ye wamuhije n’umwe mu bayobozi b’uru ruganda binaba intangiriro yabyo.

Ati :“Niba mwibuka Rayon Sports iza i Nyanza hari ibibazo byinshi by’amikoro, nk’Akarere ka Nyanza twari twihaye imyaka itatu yo kugira ngo ikipe tuyifate  idukorere ubukangurambaga natwe tuyifashe guhaguruka burundu ku buryo itari gusubira inyuma mu buryo bw’amikoro.  Ibyo byasabye ko dushyiramo amafaranga y’Akarere ariko icyo nge nari nshyize imbere ni ukureba uburyo ikipe yakwibeshaho ikoresheje izina ryayo. Ni uko twegereye za SKOL nyuma haza izindi sosiyete nka COGEAR, Ruhago Promoters n’izindi kugira ngo  Rayon Sports ibeshweho n’ubucuruzi nta nkunga ya Leta.”

Murenzi agaragaza icyamufashije kuruta ibindi ko ari ukumenya gucunga neza ibyinjira ku kibuga byari bigize uruhare runini rw’amafaranga yari mu ngengo y’imari ya Rayon Sports.

Ati: “Ndumva amenshi twatanze nk’akarere  ari miliyoni  47 mu ngengo y’imari ya miliyoni 200, Skol yatangaga amafaranga atarenze miliyoni 50, waziteranya bikaba miliyoni 100 gusa. Ubundi amafaranga menshi yavaga ku yinjira ku kibuga, icyo gihe Rayon Sports yaratsindaga ku buryo amafaranga make ku mukino yabaga ari hagati miliyoni 7-8, mu mikino 14 ya shampiyona yose yageraga kuri miliyoni 150  washyiraho n’abaterankunga twari dufite ikipe yabagaho neza”.

Gukorana n’abikorera mu kubyaza umusaruro izina ry’ikipe yabo

Nk’inararibonye ku mwanya wa mbere, Murenzi abona igisubizo kirambye cy’ubukene bw’amakipe cyakemurwa no gukorana n’abikorera bahereye ku bo mu duce aya makipe akomokamo mu rwego rwo kubyaza umusaruro izina ry’aya makipe.

Ati: “Amakipe akwiriye kuva ku gutekereza gufashwa n’amafaranga y’uturere, bagashaka   abafatanyabikorwa. Si Rayon Sports gusa yababona, kuko naguhaye urugero nk’Amagaju FC  hari inganda z’icyayi ziri muri kariya gace, Mukura hari inganda  z’amazi ziri muri Huye. Kuki se uruganda nk’i Nyange rwigeze gufasha Isonga FC  rutafasha Kiyovu cyangwa Mukura? cyangwa Gicumbi ntibafite inganda z’icyayi? Etincelles FC  ntituranye na Bralirwa? Uretse  inganda hari za banki. Icyo nge mbona birasaba ko izi kominote z’abacuruzi zinjira muri Siporo. Kuko reba amafaranga bashyira muri Guma Guma iba icyumweru kimwe ukibaza kuyashyira mu ikipe ikina amezi icumi muri shampiyona,  reba ajya muri Tour du Rwanda y’icyumweru kimwe uyashyize mu ikipe izakina umwaka muzima urumva ko nta gihombo”.

Murenzi agaragaza ko abikorera bakwiye kubikora nk’abamamaza ariko kandi nk’inshingano zabo zo kuriha abaturage b’aho bakorera bahura n’ingaruka z’imirimo y’inganda zabo.

Ati: “Buri businesi iyo ari yo yose mu ngengo y’imari haba harimo ibikorwa rusange, ntukabone ngo Skol itanze miliyoni 50, yego harimo ayo bageneye kwamamaza ariko harimo n’ayitwa ay’ibikorwa rusange. Ni amafaranga adasoreshwa, kuko biba biteza imbere imibereho myiza y’abaturage. Tuvuge niba ufite uruganda  i Gicumbi, urwo ruganda rufite icyo rugomba abaturage baho mu guteza imbere imibereho yabo kubera ko ruba runafite icyo rwangiza nk’iriya myuka, ziriya  mashini,  byangiza ikirere, ubwo rero hari ikindi kiguzi uba ugomba abantu bari aho hafi. Uba ugomba kubegera ukababwira uti iyi kipe ni kimwe mu bidufasha mu bukangurambaga”.

Anasaba abayobozi b’uturere dufite aya makipe kubyumvisha n’abikorera ko ari amahirwe kugira izi kipe.

Ati: “Abo bikorera ubereka ko hari amahirwe mu kumenyekanisha ibyo bakora, ukanabereka inshingano zabo mu bukangurangamba no mu buzima bw’akarere. Nta muntu wabyanga. Nge ndabivuga nk’uwayoboye akarere kuko buri muturage wese uri mu karere aba yifuza ko akarere ke kaba mu twa mbere, uzegere umucuruzi runaka akarere kabo kabaye aka mbere mu mihigo, iyo ikipe yabo yitwaye neza hari icyo abyungukiramo. Iyo Bugesera yakinnye na Rayon Sports, abantu ibihumbi bitatu bakava mu Mujyi wa Kigali baje kureba umupira, bagira icyo binjiriza abacuruzi, abantu bararya, abatwara abantu bakunguka, utubari turacuruza,  ayo mahirwe yose ari hafi y’ikipe uyahereyeho ukabibwira abikorera ntibyagorana”.

Ubwitabire bw’abakunzi b’amakipe

Abayobozi b’amakipe  bakwiye kumvisha abakunzi bayo ko kwitabira imikino y’amakipe yabo byongera amahirwe yo kubona abaterankunga, bakinjiriza ikipe ndetse bakanafasha abakinnyi mu byishimo.

Ati: “Nk’uko Abanyarwanda ari bo mutungo wa mbere igihugu gifite ni na ko abafana ari bo mutungo wa mbere amakipe afite, bakabaye ari bo ba mbere mu gutera imbaraga abakinnyi no kwinjiza amafaranga. Ibyo umuntu akwiye kubisobanurira abafana bakumva ko iyo baba baza ku kibuga hari abaterankunga baza, bakinjiriza ikipe yabo, bakanagira uruhare mu kwitwara neza kwayo”.

Yungamo ati: “Iyo urebye amakipe nka Kirehe, ukareba Amagaju, Bugesera, Espoir, ubona ko abafana baba bahari, wenda nka Mukura umusaruro mubi mu myaka 5 cyangwa 6 watumye bataba benshi ku bibuga, ariko hakwiye kubaho ubukangurambaga bwo kubereka ko ikipe ari iyabo mu bihe byiza n’ibibi. Abantu bakareba n’impamvu abantu bataza, ushobora gusanga ari umusaruro? cyangwa amikoro? Nahoze ndeba ibiciro cyo ku mukino wa Musanze na Rayon Sports, ugasanga abayobozi bashyizeho ibiciro abaturage batashobora. Gusa byose ni ubuyobozi bureba igikwiriye kuko  nanone nta mupira w’ubuntu, kugira ngo tuve muri kwa gufashwa tuge mu kwifasha”.

Guhindura amakipe mo ibigo by’ubucuruzi bibyara inyungu

Hari  uburyo bwo kuzamura impano zizacuruzwa ku buryo amakipe yabyara koko inyungu aho kuba akenesha abayobozi bayo.

Murenzi ati: “Kuki tutashyiraho ishuri ryiza ry’umupira uzakuramo abakinnyi ushobora gukinisha ariko ushobora no kugurisha. Ubu umupira ni bizinesi. Reba hanze amafaranga agurwa  nka  Neymar ni 30% by’ingengo y’imari ya kimwe mu bihugu byo ku isi, reba mu Rwanda abakinnyi bageze ku rwego rwo kugurwa miliyoni 30 cyangwa 40, reba abajya muri Singida  ya Tanzania bagurwa ibihumbi 100 by’amadolari  ureze umukinnyi n’iyo buri mwaka wajya ugurisha umukinnyi umwe bakaguha miliyoni 80, ayo ubwayo ni ingengo y’imari  y’ikipe imwe mu mwaka muzima. Biratangaje kuba ikipe nka Rayon Sports idafite umukinnyi ijya kugurisha hanze”.

Murenzi anemeza ko amakipe akwiye gushaka abantu bo kwamamaza no kugurisha aba bakinnyi hanze y’u Rwanda mu buryo bworoshye.

Ubuyobozi bufite ikerekezo

Murenzi  Abdallah asoreza ku cyo asanga ari ingenzi cyo kuba abayobozi b’aya makipe bagomba kuba abantu bafite kandi bumva iki kerekezo.

Ati: “Imiyoborere myiza ni yo izatekereza ikipe nka bizinesi, izatekereza ko izina ry’ikipe ari ryo ryabyara amafaranga. Nibwo izafata neza umutungo winjiye.  Izamenya ngo amafaranga yinjiye azakoreshwa  ate?I kipe ntishaka kubaho birenze ubushobozi bwayo? Twakabaye twigira ku masomo k’ubuyobozi bw’igihugu reba uburyo bwavuye mu byo gufashwa buharanira kwigira.”

Avuga ko  kwigira  byakabaye bigera no mu makipe.

TANGA IGITEKEREZO

Leave a Reply

Be the First to Comment!

avatar