18°C , Partly cloudy | Kigali-Rwanda

Mulindi Japan One Love Project (MJOLP) yimakaje urukundo ifasha abafite ubumuga

Yanditswe na Amani Claude

Ku ya Jul 11, 2018 saa 4:55

Mulindi Japan One Love Project (MJOLP) ifite ibikorwa byo kwita ku bafite ubumuga bw’ingingo ibagenera ubufasha burimo kubaha insimburangingo zibunganira, n’amasomo y’ibyo bakora ngo bibesheho.

Bwana Rudasingwa Gatera Emmanuel, Umuyobozi Mukuru wa Mulindi Japan One Love Project

Bwana Rudasingwa Gatera Emmanuel, Umuyobozi Mukuru wa Mulindi Japan One Love Project, avuga ko mu gihe bamaze bakora bishimira ibyo bamaze kugeraho birimo  gufasha abafite ubumuga bw’ingingo batishoboye kubabonera insimburangingo ku buryo bworoshye, guhabwa inyigisho zitandukanye zibaha ubumenyi bwo kuzabasha kwirwanaho mu buzima bwabo bwa buri munsi hatabayeho gusabiriza.

Gatera yagize ati: “Dufatanya na Leta gufasha abafite ubumuga kwikura mu bwigunge, tubigisha imyuga kugira ngo berekane ko na bo bafite ubushobozi bwo kwikorera no gukorera Igihugu cyabo.”

Igitekerezo cya MJOLP cyatangiriye ku Mulindi wa Byumba mu mwaka wa 1992 ubwo urugamba rwo kubohora u Rwanda rwari rurimbanyije.

MJOLP yahaye akazi abarenga 16, ihangira imirimo n’abafite ubumuga

Kuri ubu iki kigo cyahaye imirimo abagera kuri 16 bakora insimburangingo n’inyunganirangingo.

MJOLP ni cyo kigo cyateje imbere imikino y’abafite ubumuga  aho guhera mu mwaka wa 2000 bitabiriye imikino muri Australia, mu Bugereki. Mu 2020 biteganyijwe ko abafite ubumuga bazitabira imikino mu Buyapani.

Mu gihe Abanyarwanda bizihiza isabukuru yo Kwibohora ku nshuro ya 24, Gatera ahamya ko abafite ubumuga bakwiye gusigasira ibyagezweho bagakomeza kwiteza imbere kuko bafite byinshi bashoboye.

Gatera arasaba Leta ko nk’abikorera batangije gahunda yo kwita ku bafite ubumuga yagiramo uruhare ibaha ingengo y’imari mu kubateza imbere no kubashyigikira.