21°C , Intermittent clouds | Kigali-Rwanda
Ubwo Muhitira Felicien yishimiraga kuba uwa mbere muri iri siganwa byatumye ahesha ishema igihugu

Muhitira yongeye kwegukana isiganwa rya “Semi Marathon International de Brazzaville”

Yanditswe na Nkomeje Guillaume

Ku ya 15-08-2019 saa 16:11:05

Muhitira Felicien (1h04’42”)
Mutai Kipremboi Cyrus (1h05’30”)
Toroitich Temothy (1h07’07”)

Muhitira Felicien ukina imikino ngororamubiri yo gusiganwa ku maguru “Athletisme” yegukanye umudari wa zahabu mu isiganwa rya “Semi Marathon International de Brazzaville/ SMIB 2019” ryabereye muri Congo Brazzaville tariki 14 Kanama 2019.

Iri siganwa rya 2019 ryabaga ku nshuro ya 16, ryatangijwe na Perezida wa Congo Brazaville, Denis Sassou Nguesso ryari ryitabiriwe n’abakinnyi 856, baturutse mu mpande zitandukanye z’Isi.

Muhitira uzwi ku izina rya “Magare” yegukanye umudari wa zahabu, nyuma yo gusoza ari ku mwanya wa mbere aho mu gusiganwa intera y’ibirometero 21 yakoresheje isaha imwe, iminota 4 n’amasegonda 42 (1h04’42”).

Yakurikiwe na Mutai Kipremboi Cyrus ukomoka muri Kenya wakoresheje isaha imwe, iminota 5 n’amasegonda 30 (1h05’30”) naho Toroitich Temothy wo muri Uganda aba uwa 3, akoresheje isaha imwe, iminota 7 n’amasegonda 7 (1h07’07).

Aganira n’Imvaho Nshya, Muhitira Felicien wari waserukiye igihugu muri iri siganwa, akaza kuritwara ku nshuro ya 3 yikurikiranya, yatangaje ko yishimiye kongera kwegukana iri siganwa yatwaye mu myaka ibiri ishize (2017 na 2018).

Avuga ko bitamworoheye bitewe n’uko bakinnye ku zuba ryinshi, ikindi kandi nk’umuntu wari ufite igihembo k’irushanwa riheruka bose ni we bari bahanzeho ijisho.

Nyuma yo kwegukana iri siganwa, Muhitira Felicien yahawe miriyoni 2,5 z’ama CFA akoreshwa muri Congo Brazzaville, akaba angana na miriyoni 3,7 z’amafaranga y’u Rwanda.

Mu mwaka ushize wa 2018, ubwo iri siganwa ryabaga ku nshuro ya 15 rikitabirwa n’abagera ku bihumbi 2, Muhitira yegukanye umudari wa zahabu, nyuma yo gusoza ari ku mwanya wa mbere aho mu gusiganwa intera y’ibirometero 21 na metero 100 yakoresheje isaha imwe, iminota 4 n’amasegonda 35.

Yakurikiwe n’undi munyarwanda, Hitimana Noel wakoresheje isaha imwe, iminota 6 n’amasegonda 23 naho Ezekiel Kipsang wo muri Kenya yaje ku mwanya wa 3 (1h07’50”).

Muhitira Felicien usanzwe aserukira u Rwanda mu mikino ngororamubiri, yitabiriye iri siganwa yaherukaga kwitwara neza yongera kwisubiza umudari wa zahabu mu isiganwa rya “Semi Marathon Marvejols-Mende 2019”, ryabereye mu gihugu cy’u Bufaransa tariki 21 Nyakanga 2019.

Nyuma yo gukina iri siganwa ry’i Brazzaville, Muhitira Felicein arateganya gutangira umwiherero yitegura shampiyona muri shampiyona y’Isi “World Athletics Championship 2019” izabera i Doha muri Qatar kuva tariki 27 Nzeri kugeza 6 Ukwakira 2019.

Ubwo Muhitira Felicien yishimiraga kuba uwa mbere muri iri siganwa byatumye ahesha ishema igihugu

TANGA IGITEKEREZO

Leave a Reply

Your email address will not be published. Required fields are marked *