18°C , Partly cloudy | Kigali-Rwanda

Muhanga: Unique Academy TVET School ishimira Leta y’u Rwanda ku mpinduka yazanye

Yanditswe na NIYONSENGA SCHADRACK

Ku ya Jul 11, 2018 saa 6:04

Mu gihe kuri uyu wa 04 Nyakanga 2018 u Rwanda, Abanyarwanda ndetse n’inshuti z’u Rwanda bizihiza isabukuru y’imyaka 24 ishize u Rwanda rubohowe ingoyi y’ubutegetsi bubi, Ubuyobozi bw’ishuri rya Unique Academy TVET School riherereye mu karere ka Muhanga bushimira Leta y’u Rwanda ku mpinduka nyinshi yazanye mu burezi ndetse no mu iterambere muri rusange.

Abanyeshuri biga muri Unique Academu bazobereye ikoranabuhanga

Ishuri rya Unique Academy TVET School rikorera mu karere ka Muhanga, mu murenge wa Nyamabuye, Akagari ka Remera, Umudugudu wa Kinyenkanda. Riherereye mu birometero bibiri uvuye ku biro by’Akarere ka Muhanga ku muhanda ujya mu Ngororero na Karongi.

Mu kiganiro Umuyobozi w’iri shuri yagiranye n’Imvaho Nshya yagaragaje zimwe mu mpinduka zabaye mu burezi kuva u Rwanda rwabohorwa mu 1994 kugeza ubu, uyu muyobozi avuga kandi ko gahunda yo guteza imbere imigi yunganira Kigali ari ingirakamaro kuko izafasha n’abikorera kurushaho gutera imbere.

Umutesi Kaberuka Esperance, ni we muyobozi w’ishuri rya Unique Academy TVET School.

Ati: “Habayeho impinduka nyinshi kandi nziza, hashyizweho gahunda y’uburezi budaheza ku banyarwanda twese, umwana w’Umunyarwanda wese abasha kwiga kubera ko hashyizweho gahunda y’uburezi bw’ibanze bw’imyaka icyenda na cumi n’ibiri, byafashije abana bose kwiga yaba ufite ubushobozi ndetse n’utabufite. Hanashyizweho uburyo bwo guteza imbere abana b’u Rwanda binyuze mu kigega BDF aho abana barangije amasomo y’ubumenyi ngiro bishyira hamwe bagahabwa inkunga yo gushyira mu ngiro ibyo bize.”

Abanyeshuri basoza amasomo bazi kwishakira imibereho

Akomeza agira ati: “Kera kugira ngo ubone umuntu wagukorera imodoka yapfuye byasabaga ko ujya gushaka Umurundi, Umugande cyangwa Umunyatanzaniya ariko ubu abana bacu na bo bashobora kubikora. Ibyo rero abana bacu babimenye kubera ko uburezi bwabaye ubwa bose.”

Kuba umujyi wa Muhanga uri mu yatoranyijwe ngo yunganire Kigali ngo ni iby’agaciro gakomeye kuri Unique Academy TVET School.

Umutesi Kaberuka Esperance ati “Twashimiye cyane Leta y’u Rwanda uburyo yadutekerejeho nk’abaturage b’Akarere ka Muhanga kuko bizatuma aka karere gatera imbere cyane, ubukungu buziyongera, hazaza inganda zitanga imirimo ku banyeshuri twigisha, abaturage b’aka karere muri rusange bazabona imirimo itandukanye by’umwihariko iki kigo cyacu twizera ko kizabona abantu benshi kuko hari abantu bazaza gutura i Muhanga bakazana abana babo kwiga mu ishuri ryacu. Ibyo rero bizatuma ishuri ryacu ritera imbere cyane, tukaba dushimira Nyakubahwa Perezida wa Repubulika n’abamufasha buri munsi kubera ko badutekerejeho.”

Ishuri Unique Academy

Nk’uko bisobanurwa n’ubuyobozi bw’iri shuri, bwemeza ko ryatangijwe n’abanyamuryango 10 bari biganjemo abarimu muri kaminuza n’abandi bikorera, Umutesi ati “Twabonye ko hakenewe amashuri y’imyuga ariko cyane cyane imyuga abakobwa bashobora kwibonamo kuko wasangaga imyuga yibonwamo n’abakobwa atari myinshi. Ni bwo rero twiyemeje gushinga ishuri aha mu karere ka Muhanga nk’akarere kari hagati mu gihugu kandi akaba ari akarere kari gutera imbere cyane.”

Mu butumwa bwa Unique Academy TVET School ku isabukuru yo kwibohora ku nshuro ya 24, Umuyobozi w’ishuri yagize ati “Turifuriza isabukuru nziza yo kwibohora Nyakubahwa Perezida wa Repubulika, turifuriza umunsi mukuru mwiza wo kwibohora Ingabo z’Igihugu, turanawifuriza kandi Polisi y’Igihugu ndetse n’Abanyarwanda bose muri rusange.”

Iri shuri ryatangiye mu mwaka wa 2012, rikaba ryari rifite amashami 5 arimo Computer Science, Ubwubatsi, Icungamutungo, Electronic and telecommunication ndetse n’ubukerarugendo gusa ngo nyuma aya amashami bahisemo kuyagabanya mu rwego rwo kugira ngo hasigare amashami ajyanye akenewe ku isoko ry’umurimo kurusha andi, kandi ashobora kubonerwa ibikoresho bihagije ibyo byatumye kuri ubu muri Unique Academy TVET School hasigara amashami atatu ari yo Ubwubatsi, Ubukerarugendo n’Icungamutungo.

Rimaze gutanga impamyabushobozi inshuro enye kandi abana batsinda ku kigero cyo hejuru ya 86%, ati: “ubushize ishuri ryacu ni ryo ryabaye irya mbere mu mashuri yigenga yigisha iby’ubumenyi ngiro yo muri Muhanga.” Kugeza ubu muri Unique Academy TVET School habarurwa abanyeshuri 460.