19°C , Showers | Kigali-Rwanda
Umuyobozi w'Akarere ka Muhanga Uwamariya Beatrice ushyize imbere ko abaturage babona akazi

Muhanga: Meya yasabye ubuvugizi ku bikorwa Akarere kadafitiye ubushobozi

Yanditswe na Rutayisire Emile

Ku ya 15-05-2019 saa 18:56:05

Umuyobozi w’Akarere ka Muhanga, Uwamariya Beatrice, asaba gukorerwa ubuvugizi n’Abadepite ku bikorwa Akarere kadafitiye ubushobozi kandi byatanga imirimo mu baturage.

Ubwo ubuyobozi bw’Intara y’Amajyepfo n’abayobozi b’Uturere tuyigize bitabiraga ubutumire mu Nteko Ishinga Amategeko, umutwe w’Abadepite, bakagirana ibiganiro n’abagize Komisiyo y’Ingengo y’Imari n’Umutungo by’Igihugu, ku mbanzirizamushinga y’itegeko rigenga ingengo y’imari ya 2019-2020, bagaragaje ibibazo bikomereye Akarere badafitiye ingengo y’imari, basaba Abadepite kubakorera ubuvugizi.

Imvaho Nshya yaganiriye n’Umuyobozi w’Akarere ka Muhanga, Uwamariya ayitangariza ko Muhanga yashyizwe muri tumwe mu Turere twunganira Umujyi wa Kigali, akaba asanga kugira ngo Muhanga igaragare koko nk’Umujyi wunganira Kigali bisaba ibikorwa remezo by’ingenzi, agasanga ari ibikorwa bizaha abaturage imirimo, ariko akagaruka ku buryo nta mikoro Akarere gafite kugira ngo ibyo bikorwa remezo bikorwe ari naho asabira ubuvugizi Abadepite.

Uwamariya agira ati “Nk’umujyi wunganira Kigali twabigeraho abashoramari baje gukorera muri Muhanga. Ikibazo ni uko hari icyanya cyahariwe inganda, imihanda myiza yarahageze, hari amazi n’amashanyarazi, ariko nta bushobozi bwo kwishyura ibikorwa by’abaturage nk’amazu ngo bahimuke, abashoramari bazane inganda imirimo iboneke.”

Avuga ko icyo cyanya giherereye mu Mujyi wa Muhanga haruguru y’Agakiriro mu Kagali ka Gahogo, mu Mudugudu wa Gihuma.

Hari kandi imihanda ya kaburimbo iteganyijwe kubakwa ireshya hafi n’ibirometero 6 kugira ngo umugi umere neza, ariko nta mafaranga ahari yo kwimura abaturage.

Hari ikindi kibazo cy’umuhanda ukeneye gusanwa (maintenance) wo mu Ndiza ariko nta ngengo y’imari ihari. Uyu muhanda uri ahantu hari ubutumburuke bugera ku 2300, bigatuma kubera uko hateye ubutaka bukunze kuriduka.

Ubushobozi bwo gusana imihanda bukenewe ku mihanda yakozwe itsindagiye (Feeder Road) kuko ifitiye akamaro abaturage cyane mu kugeza umusaruso wabo ku masoko.

Hari kandi n’ikibazo cyo kubakira abanyeshuri n’abarimu amacumbi ku rwunge rw’amashuri rwa Horezo kuko nta bushobozi Akarere gafite ko kubikora.

Meya wa Muhanga kandi avuga ko hakenewe amafaranga yo kwimura abaturage batuye mu manegeka ndetse no gusana inzu z’abatishoboye, akagira ati “Inzu z’abatishoboye zimaze gusaza ku buryo akeneye gusanwa kubera ko yubatswe kera kandi hutihuti kugira ngo abantu babone aho batuzwa none ageze igihe ashaje. Ni ngombwa ko asanwa ariko nta mafaranga dufite yo kubikora, Abadepite badufashe badukorere ubuvugizi.”

Umuyobozi w’Akarere ka Muhanga Uwamariya Beatrice ushyize imbere ko abaturage babona akazi

Ingengo ihari ya 2019/2020 izagira uruhare mu mibereho myiza y’abaturage

Uwamariya uyobora avuga ko ingengo y’imari ya 2019/2020 izita ku guha imirimo abaturage mu rwego rwo kugira ngo bagire imibereho myiza.

Agira ati “Gahunda zose ziteganyijwe muri VUP/Umurenge zo kuvana mu bukene abaturage zirahari zijyanye no gukora imihanda, hari kandi umushinga wo kubungabunga icyogogo cya Nyabarongo, haterwa ibiti birwanya isuri no kubungabunga urugomero rw’amashanyarazi ruzatwara miriyoni zirenga 200, ibyo byose bizaha urubyiruko akazi.”

Imvaho Nshya yaganiriye na Kayumba Alexis utuye mu Mujyi wa Muhanga ayitangariza ko yishimiye kuba Muhanga yaragizwe Umugi wunganira Kigali, akaba asanga nk’urubyiruko ruzabyungukiramo kubera ko Umugi uzagendwa cyane birushijeho, amajyambere akiyongera bigatuma haboneka akazi. Yagize ati “Ubu tugiye kubona abashoramari bazazana imishinga itanga akazi, byongere na ba mukerarugendo bazajya baza kureba umugi bitume bahaha amafaranga yinjire mu Mujyi wa Muhanga.”

TANGA IGITEKEREZO

Leave a Reply

Your email address will not be published. Required fields are marked *