21°C , Mostly cloudy | Kigali-Rwanda

Muhanga: Ishuri ry’aborozi mu kiraro ryitezweho umusaruro ufatika

Yanditswe na NYIRANEZA JUDITH

Ku ya 05-03-2021 saa 19:55:01
Hahirwabasenga Emmanuel ushinzwe guteza imbere ibikomoka ku matungo muri RAB yasobanuraga uburyo hapiwa ubushyuhe mu irerero ry'imishwi (Foto Nyiraneza J.)

Itsinda ry’aborozi b’inkoko bo mu Karere ka Muhanga ryitwa Abatabusanya rivuga ko ryiteze umusaruro ufatika ukomoka ku bworozi, by’umwihariko babikesha ubumenyi bungukiye mu mahugurwa y’ibyumweru bibiri bahawe n’Ikigo cy’Igihugu giteza imbere ubuhinzi n’ubworozi (RAB) ku nkunga y’Ikigo cy’Ababiligi cy’Iterambere (Enabel).

Iryo tsinda ryahuguwe rigizwe n’aborozi 12 baturutse mu Mirenge 8 yo muri ako karere bitezweho kuzafasha mu guhugura abandi borozi hagamijwe ko ubworozi bw’inkoko bukorwa mu buryo bw’umwuga, bugatanga umusaruro mwiza utuma ababukora batera imbere kandi bakanahaza isoko.

Amahugurwa yatangirwaga mu kiraro cy’umwe muri abo bagize itsinda, Ruhuta Alfred mu Kagali ka Kinini, mu Murenge wa Shyogwe.

Hahirwabasenga Emmanuel Ushinzwe guteza imbere ibikomoka ku matungo mu Kigo cy’Igihugu giteza imbere ubuhinzi n’ubworozi RAB yatangarije Imvaho Nshya ko amahugurwa yateguwe mu rwego rwo kongerera ubumenyi aborozi b’inkoko bo mu Mirenge 8 muri 12 igize Akarere ka Muhanga.

Yagize ati: “Aba bari mu itsinda ryitwa Abatabusanya ni abazadufasha guhugura abandi, dushaka gukorana na bo mu rwego rwo guteza imbere ubworozi bw’amatungo magufi bw’inkoko barahugurwa by’igihe kirekire hanyuma na bo bagahugura abandi by’igihe kirekire.

Amahugurwa y’ibyumweru bibiri ahakorwaga ishuri ry’aborozi mu kiraro, uko ritegurwa bitandukanye n’ishuri risanzwe iri shuri ryo ryiga banakora kandi bakigira aho ibikorwa biri.”

Yongeyeho ko uko ubworozi bukorwa kuri ubu bitandukanye na kera, ubu hakenewe ko buri mworozi aba intangarugero.

Amahugurwa y’ishuri ry’aborozi mu kiraro kandi yatanzwe mu turere turindwi akaba ari icyiciro cy’abazahugura abandi. Aya mahugurwa yateguwe ku nkunga y’Ikigo cy’Ababiligi cy’Iterambere (Enabel) gitanga iyo mishwi aborozi bigiragaho n’ibindi bikenerwa ngo amahugurwa agende neza.

 

Aha ni mu irerero ry’inkoko (imishwi) (Foto Nyiraneza J.)

Ati: “Ubu buryo ni ubw’iyamamazabworozi, bw’iyamamazabuhinzi bukoreshwa bugezweho bufite imbaraga kuko ni bwo bugera ku muhinzi cyangwa ku mworozi uburyo mukiga munakora.

Kera twarahugurwaga hagatangwa ubutumwa hanyuma abo bahuguye bagatandukana n’ababahuguye bakazasubirayo gusura imirima ntangarugero, ibiraro ntangarugero cyangwa aborozi ntangarugero ariko ubungubu dushaka ko umworozi wese aba intangarugero.

Akabikora, akabyumwa, tukabijyanamo, tugahuza ubushakashatsi, tugahuza iyamamazabworozi n’ubuhinzi bigamije ko umuturage atera imbere.”

Perezida w’Itsinda Abatabusanya, Mujyambere Jules wo mu karere ka Muhanga, mu Murenge wa Shyogwe mu Kagari ka Ruli yasobanuye uburyo bita ku mushwi guhera ku munsi wa mbere kugeza ubwo zitanze umusaruro.

Yagize ati: “Aya mahugurwa azadufasha kurushaho kunoza ubworozi bizadufasha kongera umusaruro. Muri iri rerero mureba ibi ni ibikoresho bizishyushya, ni ukuzigirira isuku hari n’ibindi bikoresho byabugenewe zimaze kwigira hejuru. Aha bazubakiye irerero ngo dukurikirane isuku yazo no kuzirinda kwirunda hamwe, twiga tunakora.”

Umushakashatsi mu bworozi bw’amatungo magufi atuza muri RAB Kayitesi Aline, yatangarije Imvaho Nshya ko abo borozi bafite ubushake n’amashyushyu yo kubona ibintu bishyashya, bakabyikorera n’amaboko yabo kandi ko hari icyo bibongerera mu bumenyi bwabo.

Aba ni abagize itsinda Abatabusanya ry’aborozi b’inkoko mu Karere ka Muhanga (Foto Nyiraneza J.)

Hari icyo bazagenda bakavugurura ndetse bizafasha kongera umusaruro w’amatungo, ari amagi n’inyama bikomoka ku nkoko. Aborozi bazanoza ubworozi bibafashe kugera ku musaruro mwiza ushimishije.

Umworozi watije abandi ikiraro hagakorerwa ayo mahugurwa, Ruhuta Alfred yatangarije Imvaho Nshya ko ubworozi bw’inkoko abumazemo imyaka 10, aho yatangiriye ku nkoko 400 zitera amagi ubu akaba ageze ku 1000.

Yavuze ko ishuri ryo mu kiraro rizamugirira umumaro mu buryo bwo kunoza ubworozi akagira n’ibyo akosora.

Ati: “Rizangirira umumaro cyane nkurikije amasomo twahawe mu buryo bwo korora kuko hari ibyo najayaga nkora ntazi n’amakosa nko gutegura ikiraro mu buryo busanzwe nkagitegura imishwi iri buze uwo munsi ariko twize ko gitegurwa mbere kigaterwamo umuti noneho inkoko zikazaza ikiraro cyaramaze gutegurwa ariko ubu nasobanukiwe.”

Muri ayo mahugurwa aborozi bigiraga ku nkoko 279 z’inyama na 428 z’amagi, aborozi ni bo bigaga bakanashyira mu ngiro ibyo bigaga naho abo batekinisiye ba RAB bagahuza ubumenyi n’imikorere hanyuma ibyo bari basanzwe bakora bagafatanya na bo ngo birusheho gukorwa neza bitange umusaruro mwiza.

Ikigo k’Igihugu cy’Ubushakashatsi n’Iterambere mu byerekeye Inganda (NIRDA) ku bufatanye n’Ikigo cy’Ababiligi cy’Iterambere (Enabel) ku itariki 05 Ugushyingo 2020 cyatangije gahunda yo gukoresha ikoranabuhanga mu nganda zitunganya ibikomoka ku bworozi bw’ingurube n’Inkoko, ibiryo byayo matungo no gutunganya amabuye akavamo ibikoresho by’inyubako.

Umworozi watije abandi ikiraro hagakorerwa amahugurwa, Ruhuta Alfred (Foto Nyiraneza J.)

Umwanditsi:

NYIRANEZA JUDITH

One Comment on “Muhanga: Ishuri ry’aborozi mu kiraro ryitezweho umusaruro ufatika”

  1. Aya mahaugutwa ni ingirakamaro cyane. Baze batwegere natwe mu cyaro batwigishe twiteze imbere my mirire no mu bukungu.

    Ndizera ko isoko rihari ry’ibikomoka Ku biguruka ariko kandi hakwiye no kujyaho uburyo bwo kumenya aho riherereye ubuyobozi bugasha amatsinda nk’aya aba yabyiyemeje akanakurikiranwa cyane kuko hari abajya mu mahugurwa bagatahira ayo bakigira mu bindi bitandukanye n’ibyo bahuguriwe bataragira unusaruro bagaragaza mu byo basabwe gushyira mu bikorwa. Harakabaho ubufatanye mu iterambere ry’ubukungu bw’abantu Ku giti cyabo n’ubw’igihugu cyacu by’umwihariko

Tanga Igitekerezo

Email yanyu ntigaragazwa ku rubuga. Amazina na Email ni ngombwa.