19°C , Partly cloudy | Kigali-Rwanda

Muhanga: Gereza ya Muhanga na yo igiye kwimurirwa ahatari mu mujyi

Yanditswe na Kanamugire Emmanuel

Ku ya 28-02-2019 saa 10:27:04
Gereza ya Muhanga izimurwa hubahirizwa igishushanyo mbonera cy'Umujyi

Ubuyobozi bw’AKarere ka Muhanga butangaza ko Gereza ya Muhanga izimurwa igashyirwa ahandi hatari mu mujyi rwagati.

Umuyobozi w’Akarere ka Muhanga, Uwamariya Beatrice, yatangaje ko iyi Gereza izimurwa nyuma yo gutunganya igishushanyo mbonera cy’uyu Mujyi.

Yagize ati “Muhanga nk’Umujyi wunganira Kigali turi gukora igishushanyo mbonera, uyu munsi nubwo uburyo bwaba buhari ntabwo twakwimura gereza tutazi aho tuyerekeza. Ariko icyo navuga biri muri gahunda; icyo nzi ni uko igishushanyo mbonera kizarangira mu kwezi kwa karindwi, tukayimura tutazongera kuyimura ukundi.”

Yakomeje agira ati “Urwego rw’Igihugu rushinzwe imfungwa n’abagororwa bagira ibigenderwaho kugira ngo tumenye aho tuzashyira iyi gereza. Igishushanyo mbonera nikimara kuboneka tuzaganira kugira ngo Gereza ihimuke. Ni iya kera kandi umujyi urimo kwaguka.

Uwamariya yongeyeho ko hari n’abafatanyabikorwa barimo Kiliziya Gatolika batangiye kwegera akarere bashaka kugaha ubutaka kazimuriramo gereza ariko bikiri kuganirwaho kuganirwaho ku bufatanye na RCS ngo harebwe niba hujuje ibisabwa.

Mu kiganiro n’abanyamakuru cyo kuri uyu wa 27 Gashyantare 2019, Guverineri w’Intara y’Amajyepfo, CG Gasana Emmanuel, yavuze ko iyi Gereza igomba kwimuka kandi ko n’Urwego rw’Igihugu rushinzwe imfungwa n’abagororwa rubizi kuko babyumvikanyeho.

Ati “Nyuma y’igishushanyo mbonera igomba kwimuka, twabyumvikanyeho ko igomba kuva hariya hantu, gusa ni ukureba igihe byashobokera twanabivuganye na RCS.”

Umuvugizi w’Urwego rw’Igihugu rushinzwe Imfungwa n’abagororwa (RCS), SSP Hillary Sengabo, yabwiye itangazamakuru ko bamaze kwimura Gereza ya Nyarugenge, Gasabo, na Rubavu kubera kuba ahantu hatagikwiriye kubera iterambere n’imiturire bityo ko n’ubuyobozi bw’Akarere nibushyira mu bikorwa igishushanyombonera cy’umugi bazacyubahiriza bakimura Gereza ya Muhanga.

Gereza ya Muhanga izimurwa hubahirizwa igishushanyo mbonera cy’Umujyi

Umwanditsi:

Kanamugire Emmanuel

One Comment on “Muhanga: Gereza ya Muhanga na yo igiye kwimurirwa ahatari mu mujyi”

Tanga Igitekerezo

Email yanyu ntigaragazwa ku rubuga. Amazina na Email ni ngombwa.