17°C , Partly cloudy | Kigali-Rwanda

Muhanga: Bihaye intego yo kwigisha abaturage korora inkoko za kijyambere

Yanditswe na MUHIZI ELISÉE

Ku ya 08-01-2018 saa 07:39:48
Aborozi barashishikarizwa kureka ubworozi bw'inkoko gakondo bakitabira korora inkoko za kijyambere

Abakozi bakorera kampani ikora ubworozi bw’inkoko ikorera mu Rubirizi mu Mujyi wa Kigali babwiye abagize inzego zitandukanye z’ubuyobozi zifite aho zihurura n’ubworozi ko bafite intego yo kwigisha abaturage korora inkoko za kijyambere.

Muri ibi biganiro byahuje inzego zitandukanye, Niyonshuti Emmanuel, umukozi ushinzwe ibikorwa by’ubucuruzi muri Kampani yitwa Uzima Chicken avuga ko intego nyamukuru bafite ari guteza imbere ubworozi bw’inkoko bwa kijyambere mu rwego rwo kurwanya imirire mibi mu baturage no kubatoza kwihangira imirimo.

Aborozi barashishikarizwa kureka ubworozi bw’inkoko gakondo bakitabira korora inkoko za kijyambere

Yavuze ko kugeza ubu hari abaturage 80 ku rwego rw’igihugu bamaze korozwa inkoko ibihumbi 100 birenga mu gihe cy’umwaka umwe.

Ati: “Intego dufite ni ukwigisha abaturage korora bya kijyambere bagurisha inyama n’amagi by’inkoko, ku buryo imibare y’abagomba korora izamuka ikava ku ijanisha rya 20 ikagera kuri 60% kandi turasanga abaturage batangiye guhindura imyumvire bava mu bworozi gakondo kandi bafite ubushake.’’

Murego Géorge ushinzwe kwegereza abaturage ubworozi bw’inkoko za kijyambere mu Ntara y’Amajyepfo, avuga ko inkoko ibihumbi 40 ari zo bamaze guha abaturage bo mu turere 7 two muri iyi ntara.

Akavuga ko izo nkoko zimaze guhabwa abaturage 32 gusa umubare avuga ko ukiri muke ugureranyije n’abagombye kuba bazifite, gusa yavuze ko bafite ikizere ko uko iminsi ihita indi igataha  uyu mubare uzarushaho kwiyongera.

Yagize ati: “Hari inyungu nyinshi abamaze korora bamaze gukura muri ubu bworozi kuko igiciro k’inkoko imwe kiri hagati y’ibihumbi 4 na 5000 by’amafaranga y’u Rwanda kandi ayo mafaranga nta bwo ari make ku muturage’’

Umukozi ushinzwe ubworozi mu Karere ka Muhanga Munyezamu Gadi avuga ko  bagifite imbogamizi zo gusobanurira  aborozi  kuva mu bworozi  bwa gakondo kuko umubare w’abafite inkoko zidatanga umusaruro ari wo munini kugeza ubu.

Ubuyobozi bw’Akarere ka Muhanga bwerekana ko muri aka Karere habarizwa inkoko ibihumbi 57, muri izo inkoko, iza kijyambere zikaba ari ibihumbi 13, imirenge ya Cyeza, Kabacuzi, Nyamabuye, Nyarusange, Mushishiro na Muhanga  ikaba ari yo iza ku isonga mu bworozi bw’inkoko.

TANGA IGITEKEREZO

3 Comments on “Muhanga: Bihaye intego yo kwigisha abaturage korora inkoko za kijyambere”

  1. Ushaka INKOKO zakizungu ,ni nkware zakizungu ndetse ninyuma birarira amagi ampamagare kuri 0785526424/0780082070/0728124466

Leave a Reply

Your email address will not be published. Required fields are marked *