27°C , Partly sunny | Kigali-Rwanda

Muhanga: Abikorera basabwe kubyaza umusaruro amahirwe abakikije

Yanditswe na Kanamugire Emmanuel

Ku ya 05-02-2019 saa 15:53:41
Guverineri w'Intara y'Amajyepfo, CG Gasana Emmanuel aganira n'abikorera mu Karere ka Muhanga (Foto Kanamugire E)

Guverineri w’Intara y’Amajyepfo, CG Gasana Emmanuel yasabye abikorera bo mu Karere ka Muhanga kubyaza umusaruro amahirwe yose abakikije biteza imbere ndetse barushaho gutuma Umujyi wa Muhanga usa neza.

Yabivugiye mu biganiro yagiranye n’abikorera n’ubuyobozi bw’Akarere, abagaragariza uruhare abikorera bakwiye kugira mu iterambere ry’aka karere n’Umujyi wa Muhanga by’umwihariko.

Mu bituma uyu mugi udatera imbere ku muvuduko wifuzwa, Guverineri Gasana yavuze ko harimo inganda nke, kuba udafite igishushanyombonera, kudakorera hamwe, ubucuruzi budakorwa kinyamwuga no kutarengera ibidukikije.

CG Gasana Emmanuel avuga ko kuba Akarere ka Muhanga gafite amabuye y’agaciro mu Mirenge 11 kuri 12 ikagize, Muhanga ikaba iri mu masangano y’imihanda ihuza Umujyi wa Kigali n’Uturere twinshi tw’igihugu ari amahirwe akomeye ku bashaka gukora ubucuruzi.

Yagize ati: “Mufite amahirwe ko imirenge 11 muri 12 igize akarere kanyu ifite amabuye y’agaciro, ni amahirwe akomeye mukwiye kubyaza umusaruro muteza imbere aka karere. Ntibikwiye ko abashyitsi basura Muhanga bajya gushaka amacumbi ahandi nka Kigali na Huye.”

Yakomeje agira ati “Kuki mutabyaza umusaruro aya mahirwe yose abakikije, mugafatanya kubaka hoteri igezweho mugatuma uyu mugi urushaho gusa neza?”

CG Gasana yavuze ko amahirwe aka karere gafite atangana n’umuvuduko mu iterambere gafite ariko ko abikorera bashyize hamwe nta cyatuma iterambere bifuza ritihuta.

Umwe mu bitabiriye iyi nama, Nkundiye Théophile avuga ko ibura ry’umuriro w’amashanyarazi n’amazi rya hato na hato riteza igihombo kinini abikorera muri aka karere ka Muhanga kuko hari ubwo bamara amasaha atandatu bitaragaruka.

Uwamariya Béatrice Umuyobozi w’Akarere ka Muhanga avuga ko hari urubuga bashyizeho ruhuza ubuyobozi bw’ibigo bishinzwe ingufu (REG), isuku n’isukura (WASAC) ndetse n’abakiriya batandukanye bavugiraho ibibazo nk’ibyo hagamijwe kubishakira ibisubizo.

Uhagarariye Urugaga rw’Abikorera mu Karere, Kimonyo Juvenal, yavuze ko hari ikizere bifitiye cy’uko Umujyi wa Muhanga uzakomeza gutera imbere bahereye ku isoko rya Kijyambere batangiye kuhubaka.

Abikorera kandi bavuze ko kutagaragaza igishushanyombonera cy’Akarere na byo bidindiza imishinga myinshi y’abashaka kubaka inzu z’ubucuruzi n’izo guturamo.

Umuyobozi w’Ishami ry’ibikorwa remezo , imiturire n’ubutaka mu Karere ka Muhanga, Nzabonimpa Onesphore, yavuze ko igishushanyombonera gishya cy’Umujyi wa Muhanga kigiye gukorwa kizarangira mu 2019, kandi ko abaturage basabwa kugira uruhare mu itegurwa n’ishyirwa mu bikorwa ryacyo.

Yagize ati: “Uruhare rw’abaturage ni uko bazatanga ibitekerezo bakagaragaza ibyo bifuza muri uyu mugi bibateza imbere bijyanye n’imikoreshereze y’ubutaka bikazashingirwaho kugira ngo hakorwe igishushanyombonera koko kijyanye n’icyo bifuza, bakagira n’uruhare mu kugishyira mu bikorwa.”

Guverineri w’Intara y’Amajyepfo, CG Gasana Emmanuel aganira n’abikorera mu Karere ka Muhanga (Foto Kanamugire E)

Umwanditsi:

Kanamugire Emmanuel

Tanga Igitekerezo

Email yanyu ntigaragazwa ku rubuga. Amazina na Email ni ngombwa.