19°C , Partly cloudy | Kigali-Rwanda
Mugesera Antoine (uwa mbere iburyo) ari kumwe n'Umuryango wa Shyirakera na Mujawimana yagabiye inka na Uwizeye umwe mu bo uyu muryango warokoye muri Jenoside (Foto Iyaremye Y)

Mugesera Antoine yagabiye inka umuryango warokoye abe muri Jenoside

Yanditswe na IYAREMYE YVES

Ku ya 09-10-2018 saa 17:53:02

Mugesera Antoine wahoze ari umusenateri ubu akaba ari mu bagize Urwego Ngishwanama rw’Inararibonye mu Rwanda yagabiye inka ebyiri umuryango w’uwarokoye umuryango we.

Shyirakera Jean Damascene yarokoye bamwe mu bagize umuryango wa Mugesera batuye mu Karere ka Rubavu mu Murenge wa Rugerero.

Mugesera yakoze iki gikorwa mu rwego rwo gushimira Shyirakera, asaba ko bikwiye kuba urugero rwiza ku bantu bose bagaharanira gukora ibyiza kandi bigashimirwa.

Mugesera yavuze ko yatekereje gushimira Shyirakera ubwo yari yitabiriye ubukwe muri aka karere noneho aza kumva ibikorwa byakozwe na Shyirakera muri Jenoside.

Yagize ati: “Igikorwa kiza cyose gikwiye gushimwa, igikorwa cyakozwe ni kiza cyane ni intangarugero, gukora igikorwa utabanje kwibaza ngo ndagikorera uyu n’uyu ngendeye kuri ibi n’ibi, ukamukorera neza gusa ni byiza, kuko yarokoye abantu benshi arabahisha yashoboraga kubigwamo na we.

Ubu atewe ishema n’ibikorwa yakoze yitanga kuko nk’abana bo mu muryango wacu yakijije bameze neza barabyaye, twamushimiye kuko yagize neza twabikoze ku mugaragaro ngo bibere isomo buri wese, abyigireho agira neza nta kindi ashingiyeho biturutse ku mutima kuko ingororano izaba nyinshi.”

Mugesera Antoine (uwa mbere iburyo) ari kumwe n’Umuryango wa Shyirakera na Mujawimana yagabiye inka na Uwizeye umwe mu bo uyu muryango warokoye muri Jenoside (Foto Iyaremye Y)

Uwizeye Jean d’Amour ni umwe mu bo mu muryango wa Mugesera, yavukiye mu mMurenge wa Rugerero akaba yarokowe na Shyirakera ngo yahungiyeyo kuko bari inshuti.

Mu buhamya bwe yagize ati, “Turashimira uyu musaza kuko yaraturokoye; yaraduhishe twanyuze mu buzima bugoye twabanye na we mu gihe cya Jenoside na we baramukekaga bakaza kumusaka buri munsi, yaradukurikiranye aduhungisha atugeza mu kigo k’imfubyi, na bwo aradukurikirana kugeza tugeze muri DRC.”

Akomeza agira ati: “Ndasaba Abanyarwanda gukundana, gushyira hamwe kandi n’urubyiruko ndarusaba kutazemera ko hari ikintu kibi cyakongera kubaho, mbasaba gukunda Igihugu.”

Shyirakera wahawe inka nk’ishimwe yavuze ko yishimira kuba yarakijije abantu na bo bakaba bari kumwibuka, ngo yakijije abarenga 10 kandi yishimira ko bafite ubuzima.

Agira ati: “Kubona umuntu w’umuyobozi ahagurutse ngo aje gushimira ni ibintu byiza cyane, nahishe aba bantu mu gihe cya Jenoside kubera umutima nari mfite abana narokoye bambereye abana beza banyitaho ni ibyo kwishimira izi nka baduhaye kuko bampaye iyange n’iy’umugore zigiye kudufasha gusaza neza.”

Uhagarariye Ibuka mu murenge wa Rugerero, Habiyaremye Karimu, yashimye iki gikorwa avuga ko gikwiye kubera n’abandi urugero.

Agira ati: “Nishimiye iki gikorwa kuko ni urugero rwiza kuri buri wese gikwiye kwigirwaho, kubona umuntu yibukwa ku bikorwa byiza yakoze byo kuturokora ni byiza cyane nasabye Mugesera kujya atuba hafi nk’abarokotse Jenoside yakorewe Abatutsi kandi yatwijeje inama n’ibindi bizakomeza kudufasha.”

Mugesera yasabye abarokotse Jenoside yakorewe Abatutsi gukomera kuko bafite ubuyobozi bwiza bubitaho kandi n’Abanyarwanda bakaba bamaze kugera kure muri gahunda z’ubumwe n’ubwiyunge bakaba babanye neza.

TANGA IGITEKEREZO

Leave a Reply

Your email address will not be published. Required fields are marked *