18°C , Mostly cloudy | Kigali-Rwanda
Abana b'abakobwa bari bitabiriye ibiganiro by'umunsi mpuzamahanga wahariwe umwana w'umukobwa

Mufite amahirwe yo kugira igihugu n’ubuyobozi bwiza – Mukabalisa

Yanditswe na MUGISHA BENIGNE

Ku ya 11-10-2018 saa 12:09:11

Perezidante w’Inteko Ishinga Amategeko, Mukabalisa Donatile yibukije abana b’abakobwa ko bafite igihugu cyiza n’ubuyobozi buha amahirwe menshi yo kwiteza imbere.

Yabivugiye mu birori byo kwizihiza umunsi mpuzamahanga w’umwana w’umukobwa wizihizwa taliki ya 11 Ukwakira buri mwaka.

Yagize ati “Mufite amahirwe yo kugira igihugu cyiza n’ubuyobozi bwiza burangajwe imbere na Perezida wa Repubulika Paul Kagame udahwema gushakira Abanyarwanda bose ibyiza n’abana b’abakobwa by’umwihariko.”

Yasabye abana b’abakobwa kugira icyerekezo no kugira imyitwarire ibereye u Rwanda, kandi ko ubuyobozi bubari hafi, ababyeyi n’abarezi bagahora biteguye kubafasha.

Ati “Iyo imbuto nziza itewe mu butaka bwiza, ikuhirwa, igafumbirwa, iratoha, ikaba nziza, ikera imbuto nziza kurusha.”

Abana b’abakobwa bakurikiye ijambo bagejejweho na Perezidante w’Inteko Ishinga Amategeko, Mukabalisa Donatile

Yabasabye gukorera ku ntego no kuyigeraho binyuze mu nzira nziza.

Yanabasabye kwirinda ingeso mbi no kurinda abandi icyakwangiza isura nziza y’igihugu.

Minisitiri w’Uburinganire n’Iterambere ry’Umuryango avuga ko uyu munsi ari ngombwa kuzirikana iterambere ryagezweho mu burezi bw’umwana w’umukobwa n’inzitizi zihari.

Minisitiri Nyirasafari Esperance yagize ati “Mufite amahirwe ko igihugu cyacu cyihaye intego yo guteza imbere uburezi bw’umwana w’umukobwa,,ayo mahirwe ntimuyiteshe.”

Yagarutse kuri uyu munsi unahuzwa n’icyerekezo cyatanzwe n’abagore b’abayobozi ku rwego rw’isi ku bukangurambaga bwo gushishikariza abakobwa kuba abayobozi “Girl to leader campain”, aboneraho kubibutsa ko ari bo bayobozi b’ejo hazaza.

Minisitiri Nyirasafari Kandi yavuze ko uyu munsi kandi wahujwe n’ubukangurambaga bw’umuryango buzamara amezi abiri bukazibanda ku gukumira ikibazo cyo gusambanya abana.

Fode Ndiaye, umuhuzabikorwa w’amashami ya Loni mu Rwanda yifurije umunsi mwiza abana b’abakobwa b’isi yose, n’abo mu Rwanda by’umwihariko.

Yagarutse ku bibazo abana b’abakobwa bahura na byo nko kubaka ingo imburagihe no guterwa inda zitateganyijwe, bagakoreshwa imirimo mibi.

Yasabye abana b’abakobwa kutitinya no kwigirira icyizere no kugira umuco w’ubuyobozi kuko nabo bashoboye.

Ati “Kuba umuyobozi si ukuba perezida, si ukuba Minisitiri cyangwa Depite, ushobora kuba umuyobozi wa bagenzi bawe mu ishuri, aho mutuye, mu rugo no mu muryango, aho niho ubuyobozi buhera.”

Yasabye ababyeyi n’abandi bantu bakuru gufasha abana no kubatoza imico myiza mu kubaka isi ya none.

Ingabire Gisele wabyaye imburagihe avuga ko yifuza ko barumuna be kutazanyura mu nzira yanyuze kuko yabyaye afite imyaka 15, kuri ubu akaba afite imyaka 21 n’umwana w’imyaka 6.

Yagize ati “Nabyaye ndi muto ariko nabashije gufashwa n’ababyeyi mbasha gusubira mu murongo, ndifuza kuzajya ntanga ubuhamya imbere y’abana bagenzi banjye kugira ngo batazanyura inzira nanyuze.”

Abana b’abakobwa barasabwa kwitwararika no kugira intego mu byo bakora, bakitoza kuzaba abayobozi b’ejo hazaza.

TANGA IGITEKEREZO

Leave a Reply

Your email address will not be published. Required fields are marked *