19°C , Partly cloudy | Kigali-Rwanda
Uhereye ibumoso ni Uhagarariye u Bwongereza mu Rwanda Joanne Lomas, Munyakazi Isaac ushinzwe amashuri y'inshuke, abanza n'ayisumbuye, Ndayambaje Irenée Umuyobozi wa REB na Meya Rwamurangwa Stephen

Mu Rwanda hatangiye uburyo bushya bwo gufasha abanyeshuri kwiga neza imibare n’icyongereza

Yanditswe na SHEMA CHRISTIAN

Ku ya 14-03-2018 saa 06:43:08

Hatangijwe uburyo bushya bwo kwigisha imibare n’icyongereza, bwiswe ‘Building Learning Foundation’ (BFL) mu buryo bwihariye buzafasha abarimu kwigisha abanyeshuri neza ndetse no kubibakundisha bakiri bato ku nkunga y’Abongereza.

Uhereye ibumoso ni Uhagarariye u Bwongereza mu Rwanda Joanne Lomas, Munyakazi Isaac ushinzwe amashuri y’inshuke, abanza n’ayisumbuye, Ndayambaje Irenée Umuyobozi wa REB na Meya Rwamurangwa Stephen

Ni mu nama yateraniye i Kigali ejo hashize ku wa kabiri tariki ya 13 Werurwe 2018, yari ihuriwemo n’abahagarariye u Bwongereza mu Rwanda,  Ikigo k’igihugu cy’uburezi ndetse n’Akarere ka Gasabo ariko katangirijwemo bwa mbere iyi gahunda.

Umuyobozi w’Akarere ka Gasabo Rwamurangwa Steven yavuze ko ari iby’agaciro kwakira ubu buryo bwa mbere mu karere ka Gasabo kuko bwitezweho guteza imbere ireme ry’uburezi mu Rwanda, anavuga ko mu karere ayoboye hatangiye kugaragara akamaro k’ubu buryo bw’imfashanyigisho.

Umwe mu barimu bo mu karere ka Gasabo wigisha icyongereza, Elie Masengesho watangiye gukoresha ubu buryo, yavuze ko ubu buryo bwamufashije cyane kandi abona ko hari icyo buzageza ku banyarwanda. Yagize ati ”Iyo wigisha abana bijya bigorana kubona ibintu byatuma bumva bakunze kwiga kandi bakabyishimira ku buryo baguma bumva baza ku ishuri, ndizera ko BLF izadufasha kwiga uburyo bwiza bwo kwigisha abana ndetse no kutwereka ibizatuma dukundisha abana ishuri nk’indirimbo ndetse n’imivugo”.

Uhagarariye igihugu cy’u Bwongereza mu Rwanda Joanne Lomas yashimangiye ko u Rwanda ari igihugu kirimo gutera imbere bityo kugitera inkunga mu kwigisha abana b’Abanyarwanda neza nta gihombo kirimo.

Yagize ati ”Nishimiye gutangiza uburyo bwa Building Learning Foundation mu Rwanda, twiteguye gutegurira inkunga u Rwanda arenga  miliyoni 25 z’amayero  mu gihe kingana n’imyaka itatu, hibanzwe cyane ku myigishirize y’icyongereza n’imibare. BLF ni uburyo bwizewe  butegura umwana kugira ubumenyi bw’ibanze butuma afunguka mu mutwe, ni yo mpamvu tuzibanda ku bana biga mu wa mbere w’amashuri abanza kugeza mu wa gatatu w’amashuri abanza”.

Umunyamabanga wa Leta muri Minisiteri y’Uburezi ushinzwe amashuri y’inshuke, abanza n’ayisumbuye Isaac Munyakazi ntiyagiye kure y’ibyavuzwe n’abandi, na we yemeza ko iyi ari inkunga ikomeye Abanyarwanda babonye kandi bizera ko bizagira icyo bihindura mu ireme ry’uburezi mu Rwanda. Yagize ati ”Ubu buryo twarabwakiriye kandi neza, ni imfashanyigisho yaje ku nkunga y’Abongereza igihugu kidufasha mu burezi cyane, ubu buryo twizeye ko buzazana impinduka ndetse bukongera imbaraga ku myigishirize y’icyongereza n’imibare, ireme ry’uburezi kuri mwarimu ndetse n’abanyeshuri rikagira icyo ryiyongeraho by’umwihariko bizagirira igihugu akamaro”.

Ubu buryo buje mu Rwanda bwitezwe ko buzafasha abana barenga miliyoni ebyiri mu kumenya ururimi rw’icyongereza ndetse n’imibare.

Ubu buryo bwatangiye kugeragezwa muri Nyakanga 2017 bwashyizwe ku mugaragaro kuri uyu wa kabiri bufite intego y’imyaka 3, kuba bumaze gukoreshwa ndetse no guhugura abana barenga miliyoni ebyiri, abarimu bigisha icyongereza n’imibare  25 000, ibi kandi bizakorwa ku bantu bose bafite aho bahuriye n’uburezi mu Rwanda mu turere twose uko ari mirongo itatu.

 

TANGA IGITEKEREZO

Leave a Reply

Be the First to Comment!

avatar