22°C , Mostly cloudy with thunderstorms | Kigali-Rwanda
Abayobozi buruganda Apex Biotech Ltd ruzajya rukorera mu Rwanda imiti y'ubwoko 100 (Foto Gisubizo G)

Mu Rwanda hagiye kubakwa uruganda rukora ubwoko 100 bw’imiti

Yanditswe na MUTUNGIREHE SAMUEL

Ku ya 17-05-2018 saa 07:10:34

Mu Rwanda hagiye kubakwa uruganda rukora imiti “Apex Biotech” ruzakora imiti y’ubwoko 100, rukaba rwitezweho kongera imiti ku isoko ry’imiti mu Rwanda no kagabanya igiciro k’imiti haba ku bayigura no ku mafaranga igihugu cyatangaga mu gutumiza imiti hanze. Uru ruganda ni urw’abashoramari b’Abanya-Bangladesh.

Abayobozi buruganda Apex Biotech Ltd ruzajya rukorera mu Rwanda imiti y’ubwoko 100 (Foto Gisubizo G)

Minisitiri w’Ubuzima, Dr. Diane Gashumba, ubwo yatangizaga ku mugaragaro imirimo yo kubaka urwo ruganda, ejo hashize, tariki ya 16 Gicurasi 2018 mu cyanya cyahariwe inganda i Masoro, yavuze ko kugeza ubu imiti irenga 90% ikoreshwa mu Rwanda ituruka hanze, bityo uru ruganda rukaba ruzagabanya icyo giciro byatwaraga igihugu.

Ati “Uru ruganda ruzajya rukora imiti myinshi dukenera hano mu gihugu cyacu; icyo bigiye kumarira Abanyarwanda ni uko bazajya babona imiti yakorewe hafi, idahenze, kandi n’igihugu kikagabanya amafaranga cyajyanaga hanze mu kugura imiti.

Ikindi ni uko ruzatanga akazi ku banyarwanda benshi, byaba mu kurwubaka no gukoramo, ikindi ni uko Abanyarwanda bazagira ubumenyi igihe bakora muri uru ruganda, no muri za laboratwari zarwo kandi twumvikanye no gukorana ubushakashatsi”.

Umuyobozi w’inama y’ubutegetsi y’uruganda Apex Biotech Ltd, Dr. Nazmul Ahasan Sarker, yavuze ko u Rwanda rwashyize imbere gahunda yo kurwanya indwara zitandura bityo muri Afurika ari ho hambere bahisemo kuzana uruganda rw’imiti.

Minisitiri w’Ubuzima, Dr Diane Gashumba ashyira ibuye ry’ifatizo ahagiye kubakwa uruganda Apex Biotech Ltd ruzajya rukorera mu Rwanda imiti y’ubwoko 100 (Foto Gisubizo G)

Umwe mu banyamigabane b’uru ruganda, Madari Herberton yavuze ko ruzakora imiti yo mu bwoko bwa “Generic” yari isanzwe iva mu Buhinde n’u Bushinwa kandi ikazajya igenzurirwa mu Rwanda.

Mu miti urwo ruganda ruzakora, ruzatangira kuyishyira hanze mu mpera z’uyu mwaka wa 2018, ikazaba irimo imiti igabanya ubwandu bw’agakoko gatera Sida, ivura malariya, igituntu, imiti y’uruhu, igabanya uburibwe n’indi myinshi ari nako bagenda banoza imiti yabo bakurikijwe ibisabwa mu buvuzi.

Imiti y’uru ruganda izaba ifite ubuziranenge mpuzamahanga ku buryo izajya inagurishwa mu bihugu birimo n’ibyo mu karere u Rwanda ruherereyemo. Biteganyijwe ko nyuma yo kubaka urwo ruganda, bazubaka n’ibitaro by’ikitegererezo bizajya bituma abarwayi bajyanwaga hanze bavurirwa mu Rwanda ku giciro gito.

Imibare ya Minisiteri y’Ubuzima igaragaza ko mu mwaka wa 2015/2016, u Rwanda rwatanze arenga miliyari 700 yo kugura imiti hanze ikoreshwa mu buvuzi.

Urwo ruganda rukazuzura rutwaye amadolari y’Amerika asaga miliyoni 18.

 

 

TANGA IGITEKEREZO

Leave a Reply

Be the First to Comment!

avatar