Mu Rwanda, babiri bishwe na COVID-19 hakira 30

Yanditswe na Imvaho Nshya

Ku ya 25-09-2020 saa 20:26:24

Kuri uyu wa Gatanu tariki ya 25 Nzeri 2020, Minisiteri y’Ubuzima yatangaje abantu babiri bahitanywe n’icyorezo cya COVID-19 mu Rwanda, bakaba ari umugore w’imyaka 46 n’umugabo w’imyaka 44 bose bari batuye mu Mujyi wa Kigali. 

Abarwayi bombi batangajwe nyuma y’iminsi itanu yari iciyemo undi murwayi wa 27 wishwe n’icyo cyorezo atangajwe, kuri ubu abamaze kwamburwa ubuzima n’icyo cyorezo bakaba bageze kuri 29 mu Rwanda.

Ku wa Mbere tariki ya 21 Nzeri hatangajwe umugabo w’imyaka 58 y’amavuko, akurikiye uw’imyaka 48 watangajwe ku ya 17 Nzeri. Ku munsi wakurikiyeho muri icyo cyumweru hatangajwe abantu babiri barimo umwe w’imyaka 29 n’undi w’imyaka 80 y’amavuko, ku wa Gatandatu ni Umunyarwandakazi w’imyaka 26 bose bakaba bari Abanyakigali.

Gusa muri iki cyumweru umubare w’abakira icyo cyorezo wakomeje kwiyongera, aho inzego z’ubuzima zanatangaje ko ibigo 15 byavurirwagamo abarwayi byamaze gufunga imiryango, kuri ubu imbaraga zikaba zarongerewe mu kwita ku batagaragaza ibimenyetso bari mu ngo zabo, hanyuma mu mavuriro hagasigaramo abagaragaza ibimenyetso n’abarembye.

Kuyi uyu wa Gatanu kandi Minisiteri y’Ubuzima yatangaje ko habonetse n’abarwayi bashya 9 batahuwe mu bipimo  1,400 byafashwe mu masaha 24 ashize, hataha abantu 30 bakize neza.

Abo barwayi bashya barimo 5 batahuwe mu Mujyi wa Kigali, babiri no mu Karere ka Nyamagabe na babiri bo mu Karere ka Nyagatare.

Ibyo byatumye umubare w’abamaze gukira ugera ku 3,080 bangana na 64% by’abantu 4,798 bamaze gutahurwaho icyo cyorezo mu Rwanda.

Kugeza ubu abakirimo kwitabwaho n’abaganga bageze ku 1,689 mu barwayi bamaze kuboneka  mu bipimo 484,841 byafashwe kuva umurwayi wa mbere yatahurwa muri Werurwe kugeza ubu.

Igikorwa cyo gupima abantu mu buryo bwa rusange mu Gihugu kirakomeje, ndetse ingendo zihuza Umujyi wa Kigali n’Intara mu modoka rusange zarahagaritswe mu rwego rwo gukumira ikwirakwizwa ry’icyo cyorezo.

Abaturarwanda barasabwa kurushaho kubahiriza amabwiriza yo kwirinda ari yo gusiga intera ya metero, kwambara udupfukamunwa no gukaraba intoki kenshi bakoresheje amazi meza n’isabune cyangwa arukoro yabugenewe.

Imibare yatangajwe ku rwego mpuzamahanga yerekana ko muri Afurika abamaze kwandura COVID-19 bageze kuri miriyoni n’ibihumbi 437.3 barimo abantu miriyoni n’ibihumbi 185 bakize n’abandi basaga ibihumbi 35 bahitanywe na cyo. Abamaze kwandura ku Isi barasaga miriyoni 32.6 barimo abasaga  miriyoni 24 bakize n’abapfuye barenga ibihumbi 991.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.