24°C , Mostly cloudy | Kigali-Rwanda
Perezida w'Urukiko rw' Ikirenga Prof. Sam Rugege (Foto Gisubizo G.)

Mu Rwanda 5% mu manza z’ubucuruzi  bemera kumvikana binyuze mu bunzi-Prof. Rugege

Yanditswe na SEZIBERA ANSELME

Ku ya 13-03-2018 saa 06:37:01

Perezida w’Urukiko rw’Ikirenga Prof Sam Rugege atangaza ko mu bafitanye imanza cyangwa amakimbirane mu by’ubucuruzi mu Rwanda, abagera kuri 5% ari bo bemera kumvikana binyuze mu kubunga, mu gihe hifuzwa ko uwo mubare wazamuka ukagera kuri 60% nk’uko mu bihugu bimwe byageze kuri ibyo bipimo.

Perezida w’Urukiko rw’ Ikirenga Prof. Sam Rugege (Foto Gisubizo G.)

Ibyo byagarutsweho ubwo hatangizwaga amahugurwa y’abacamanza n’abunganira abantu mu by’amategeko bo mu Rwanda kugira ngo hatangizwe igeragezwa ry’umushinga wo gusuzuma imanza no kuzikemura mu buryo bw’ubwumvikane no kunga.

Prof Rugege avuga ko iyo abantu bafitanye ikibazo bumvikanye ibintu birushaho kwihuta, kuko iyo imanza zajyanywe mu nkiko haba ibirarane ndetse abantu bakagenda bajurira bikazarinda bigera mu Rukiko rw’Ikirenga.

Agira ati: Ubundi ntibirenga 5% by’abantu bemera kumvikana ku bibazo tukaba twumva bishoboka byazamuka bikagera kuri 60%, mu bihugu nka Trinidadi Tobago aho ubwo buryo dushaka burimo gukoreshwa, mu mwaka wa mbere butangira imanza zigera kuri 65% zakemuwe mu buryo bw’ubwumvikane kandi hari n’ibindi bihugu imanza 90% zabashije gukemurwa mu buryo bw’ubwumvikane”.

Prof Rugege avuga ko ubwo buryo bwo kunga abantu mu Rwanda buzatangizwa nyuma y’amahugurwa y’iminsi 5 yagenewe abacamanza n’abunganizi b’abantu mu by’amategeko baba abo mu bigo bya Leta n’ibyikorera, amabanki n’abacuruzi barimo guhabwa  n’inararibonye zo muri Amerika.

Atangaza ko mu nkiko z’ubucuruzi abacamanza bazajya basuzuma imanza bareba aho zishobora gukemurwa mu buryo bwo kunga cyangwa guhuza abantu bakabiganiraho kandi bakemeranya uko basohoka mu kibazo.

Prof Rugege avuga ko mu itegeko abacamanza, abanditsi b’inkiko basanganywe ubwo bubasha bwo kubanza kunga ababuranyi ariko bidakunze gukoreshwa kuko abantu batarabimenyera.

Yongeraho ko abacamanza, abanditsi b’inkiko, abunganira abantu mu by’amategeko (Abavoka), na bo batarasobanukirwa neza uburyo bwo kunga  bugezweho kandi mu bibazo bikomeye.

Yagize ati: Tumenyereye ko abunzi bakemura ibibazo by’abaturage ariko ku rwego ruciriritse ku bibazo bidakomeye, ariko noneho dushaka ko amakimbirane yose yakemurwa mu buryo bwo kumvikana, mu buryo bwo kunga”.

Avuga ko iyo abantu bumvikanye ku kibazo bagenda banezerewe kandi n’iyo batishimiye ibyavuyemo byose bumva ko hari icyavuyemo, ariko iyo bagannye inkiko hagomba kugira utsinda n’utsindwa abantu bagataha batavugana, bashwanye akaba ari byo byifuzwa ko byakemuka, bikagabanuka, ibibazo byinshi n’amakimbirane menshi bigakemuka mu buryo bw’ubwumvikane.

Umunyamategeko mu kigo cy’ubwishingizi UAP Rwanda Mugisha Cyiza Eric, avuga ko uburyo bushya bwo kumvikana mbere y’uko abantu bagana inkiko ari bwiza kuko buzabafasha kugabanya imanza zose zajyanwaga mu nkiko.

Yagize ati: Akenshi twajyaga mu nkiko twumva ari uburyo bwo guhangana tukanumva urukiko rwonyine ari rwo rushobora kuba rwaturangiriza ibibazo ariko ubu buryo bwaje turumva ari bwo buzagabanya imanza kandi bukadufasha kumvikana hagati yacu n’abakiliya bacu.”

Ubwumvikane bufasha mu buryo bunyuranye burimo kugabanya igihe imanza zitwara mu nkiko, kugabanya amafaranga agenda mu nkiko. Twebwe ubwacu nk’ikigo cy’ubwishingizi hari igihe tuba twemera uburyozwe bw’ibiba byangiritse tukaba dushobora kumvikana ndetse tukanishyura indishyi zikwiriye hatabayeho ko tujya mu nkiko”.

Mugisha avuga ko nta kuryamirana kubera ko bitanyuze imbere y’amategeko kuko ubwumvikane buba hagati y’impande zombi, agahamya ko ntawakwishimira ko hari uruhande rugenda rutishimye kuko iyo hari urwagaragaye ari bwo habaho kugana inkiko ariko akumva ikiza ari uko habanza hakabaho kumvikana bikaba iby’ibanze.

Emily J Gould umwe mu bahugura ukomoka muri Amerika, avuga ko kunga ari ibintu bikorwa mu butabera kuko bifasha kugabanya umubare w’imanza zicibwa n’inkiko. Nk’inararibonye zibimazemo imyaka hafi 30 bakora ubukemurampaka no kunga abantu, avuga ko mu Rwanda ubwo buryo bwari buhasanzwe bukorwa n’abunzi ariko bukeneye kongererwa imbaraga bugashyirwa ku rwego mpuzamahanga, akaba ari rwo rwego bajemo kugira ngo bongerere abacamanza ubumenyi n’uburyo cyangwa inzira bikorwamo.

TANGA IGITEKEREZO

Leave a Reply

Your email address will not be published. Required fields are marked *