19°C , Partly cloudy | Kigali-Rwanda
Nsengiyumva Fulgence, umunyamabanga wa Leta ushinzwe ubuhinzi muri Minisiter y'ubuhinzi n'Ubworozi, ubanza iburyo, agaragaza uko ubuhinzi bugiye kuzamuka mu myaka iri imbere (Foto Gentil G)

Mu myaka itanu ubuhinzi bushobora guhinduka-Nsengiyumva

Yanditswe na MUTUNGIREHE SAMUEL

Ku ya 10-03-2018 saa 16:19:25

Umunyamabanga wa Leta ushinzwe ubuhinzi muri Minisiteri y’Ubuhinzi n’Ubworozi, Nsengiyumva Fulgence, atangaza ko ingamba zitandukanye zashyizwe mu kuzamura urwego rw’ubuhinzi zitezweho impinduka nziza mu myaka iri imbere, agasaba buri wese kwitabira amahirwe menshi asigaye agaragara mu buhinzi.

Nsengiyumva Fulgence, umunyamabanga wa Leta ushinzwe ubuhinzi muri Minisiter y’ubuhinzi n’Ubworozi, ubanza iburyo, agaragaza uko ubuhinzi bugiye kuzamuka mu myaka iri imbere (Foto Gentil G)

Yabigarutseho ubwo Banki Nkuru y’u Rwanda yashyiraga ahagaragara ishusho y’ubukungu n’imari by’u Rwanda, aho imibare yagaragaje ko mu byazamuye ubukungu bw’igihugu ubuhinzi buza ku mwanya wa kabiri, aho bwazamutse ku kigero cya 6% mu mwaka ushize wa 2017.

Nsengiyumva yavuze ko ikigaragara ari uko ubuhinzi buhagaze neza, ndetse nka Minisiteri bakaba batekereza ko muri iki gihembwe k’ihinga A gishize umusaruro uzaba mwiza cyane, kandi hari ingamba zo kongera umusaruro mu myaka iri imbere.

Ati “Ikigo k’igihugu k’Ibarurishamibare, NISR, kitugaragariza ko mu bantu bakora mu gihugu hafi 70% bari mu buhinzi ariko abo bantu uko tubazi ni ababikora byo kwirwanaho, nta bwo benshi bize ndetse ntibize ibyo ng’ibyo; ariko muri bo ni bo batuma 90% by’ibiribwa mu gihugu biboneka.

Ni ukuvuga ngo muri icyo kiciro harimo amahirwe menshi […] turavuga ngo ubuhinzi twabukora gute kugira ngo bukomeze icyo gipimo kiza; tubona ari uguhindura iyo mikorere yabwo cyane cyane ababukoramo akaba ari yo mpamvu twafashe ingamba zo gushyiramo urubyiruko.

Ubu twatangiriye ku barangije kaminuza mu by’ubuhinzi, dutuma begera abahinzi kugira ngo bamenye ibiba muri uwo mwuga, ariko babafashe kongera umusaruro.

Dutekereza ko mu myaka itatu, ine, itanu iri imbere ubuhinzi bushobra guhinduka. Ariko nta bwo abahinzi bonyine bazatwara uwo mutwaro kugira ngo ubuhinzi buhinduke; turasaba umuntu wese ubona uruhare rukomeye ubuhinzi bufite mu bukungu bw’igihugu kuba yafasha, kubera ko ubuhinzi buteye imbere ni no guteza imbere ubucuruzi bundi dukora.”

Imibare Banki Nkuru y’u Rwanda ikesha Minisiteri y’Imari n’igenamigambi (MINECOFIN) n’Ikigo k’igihugu k’ibarurishamibare (NISR), ku bigize umusaruro mbumbe w’igihugu mu myaka ishize, itanga ikerekezo ko uruhare rw’urwego rw’ubuhinzi ruzaba rufite uruhare rungana na 4.8% ku kuzamuka k’umusaruro mbumbe w’umwaka wa 2017.

Biteganyijwe ko ubuhinzi buzazamuka kandi ku gipimo cya 3.9% mu mpera z’uyu mwaka wa 2018, mu gihe ubukungu bwitezwe kuzamuka ku gipimo cya 6.5% muri uyu mwaka.

TANGA IGITEKEREZO

Leave a Reply

Be the First to Comment!

avatar