17°C , Partly cloudy with thunderstorms | Kigali-Rwanda
Impinduka zo kwiga mu kiciro kimwe bizongera ubumenyi bw'abanyeshuri mu gusoma no kwandika

Mu myaka 6 kwiga mu byiciro bizasezererwa burundu

Yanditswe na MUGISHA BENIGNE

Ku ya 09-01-2018 saa 07:55:34

Hagamijwe kongera ireme ry’uburezi mu mashuri abanza, kwiga mu byiciro (Shift) bizasezererwa burundu mu mashuri  abanza  mu gihe k’imyaka 6.

Nk’uko bitangazwa na Nzitabakuze Claudien, Umuyobozi mu Kigo k’igihugu cy’uburezi (REB) ushinzwe imicungire y’abarimu n’amahugurwa, ngo iyi gahunda izatangirira mu mwaka wa 6 w’amashuri abanza, bikazagenda bikomereza mu mashuri yo hasi kugeza mu mwaka wa 6.

Impinduka zo kwiga mu kiciro kimwe bizongera ubumenyi bw’abanyeshuri mu gusoma no kwandika

Ati “Guhera umwaka utaha abanyeshuri bo mwaka wa 6 w’amashuri abanza ntibazongera kwiga mu byiciro 2, iyi gahunda tuzagenda tuyimanura mu mashuri yo hasi uko imyaka igenda ihita, mu myaka 6 bikazaba bivuyeho burundu.”

Nzitabakuze avuga ko ibi bije mu rwego rwo kuzamura ireme ry’uburezi mu mashuri abanza, ngo kuko byari bimaze kugaragara ko umwarimu adahabwa umwanya uhagije wo kwigisha, uwo gutegura amasomo ndetse n’uwo gukurikirana no gukosora imikoro abanyeshuri bahabwa.”

Avuga ko kwiga mu kiciro kimwe bije gukemura ikibazo cy’umwanya udahagije umurezi yabaga afite, bikazamufasha gutanga isomo yariteguye neza kandi akanabona umwanya uhagije wo gukoresha imyitozo no gutanga imikoro.

Yagize ati “Twamaze kubiganiraho n’abarezi kandi barabyishimiye, tariki ya 21 Ukuboza 2017 twaganiriye n’uturere kuri izi mpinduka dusanga bazifuzaga cyane, ndetse twanasanze mu myaka ya 6 y’amashuri abanza babikoraga bitemewe, ariko bigakorwa mu rwego rwo gushakira abanyeshuri umwanya w’imyitozo, kurangiza ibiteganyijwe kwigishwa kugira ngo bazinjire mu bizamini bya Leta bariteguye neza.”

Nzitabakuze avuga ko ibi bizorohereza abarimu mu murimo wabo bikanafasha abanyeshuri gukurikira neza amasomo yabo no kuyacengera, bikaba byitezweho kuzamura ireme ry’uburezi mu mashuri abanza.

Avuga kandi ko iyi gahunda nigerwaho izafasha abarezi kubona akanya ko guhumeka mu kazi kabo no gushyira mu bikorwa integenyanyigisho nshya ikoreshwa mu mashuri abanza, bityo ikabasha gutanga umusaruro yitezweho.

Abarezi n’ababyeyi bishimiye iyi gahunda iteganywa mu mashuri abanza mu myaka 6 iri imbere, aho benshi muri bo bemeza ko izakemura ibibazo by’umwanya muto wabonekaga mu kwigisha, bityo abanyeshuri na bo hakaba ubwo babihomberamo ntibasobanukirwe neza ibyo bigishijwe.

Nzeyimana Alphonse ni umwarimu, avuga ko iyi gahunda ari nziza cyane ku barezi no ku banyeshuri kuko izafasha kongera umusaruro w’imitsindire y’abanyeshuri.

Ati “Iyi gahunda turashimiye, nta ko isa kuko ije kudufasha nk’abarezi kubona umwanya uhagije wo gutanga amasomo, gukoresha imyitozo n’imikoro ndetse no gukosora.”

Ntibyari byoroshye kwigisha isomo umwana mu gitondo, mu gihe wagombye kumuha imyitozo ya ryo nyuma ya saa sita, ugatangirana n’ikindi kiciro cy’abiga icyo gihe, byari imvune ikomeye ku barezi, ariko bikanaba igihombo ku banyeshuri.”

Mukagatare Marie Angelique we ni umubyeyi, avuga ko na we yishimiye izi mpinduka zigiye gushyirwa mu mashuri abanza, kuko zizafasha abana kwiga neza no gusobanukirwa amasomo bahabwa, bityo bakagira ubumenyi buhamye.

Ati “Nange nk’umubyeyi ndabyishimiye, abana bacu bagiye kwiga neza mu mashuri abanza, abarimu bazoroherwa n’abanyeshuri babibonemo inyungu y’ubumenyi bwisumbuye, gusa icyaduha bakazanabakura ku kwiga mu mpeshyi kuko bahura n’izuba ryinshi.”

Ku kijyanye n’impinduka z’umwaka w’amashuri byifuzwa n’ababyeyi benshi hagasubiraho uwahozeho, Nzitabakuze yavuze ko biri mu nyigo, ariko ngo mu gihe kitarambiranye ibyavuye muri iyo nyigo bizatangarizwa  Abanyarwanda.

TANGA IGITEKEREZO

Leave a Reply

Be the First to Comment!

avatar