24°C , Thunderstorms | Kigali-Rwanda

Mu myaka 25 u Rwanda rwafashe ikerekezo kizima – Dr.  Iyamuremye

Yanditswe na Twagira Wilson

Ku ya 19-11-2019 saa 19:00:26
Perezida wa Sena Dr. Iyamuremye Augustin

Perezida wa Sena Dr. Iyamuremye Augustin asanga nyuma y’imyaka 25 Jenoside yakorewe Abatutsi mu Rwanda ibaye, u Rwanda rwarahisemo gufata ikerekezo kizima no guharanira kwiyubaka, ubu u Rwanda akaba ari Igihugu kimaze gutera intambwe igana ku iterambe  nk’igihugu kigendera ku mategeko.

Dr. Iyamuremye yabivugiye i Kigali kuri uyu wa Kabiri ubwo yari ahagarariye Umukuru w’Igihugu mu gikorwa cyo gutangiza inteko rusange ya 38 y’Inteko Ishinga Amategeko ihuriweho na ACP n’Inteko y’Ubumwe bw’u Burayi. Mu butumwa yabagejejeho  yabibukije ko ubufatanye hagati y’Inteko zishinga amategeko biri mu byihutirwa byatuma ibihugu bigera ku  kerekezo k’iterambere  ryifuzwa.

Ati Nyuma ya Jenoside yakorewe Abatutsi mu Rwanda ubwo ingabo z’Umuryango w’Abibumbye zari zimaze gutererana Abanyarwanda mu 1994, u Rwanda rwahisemo gufata umurongo mu biganza byarwo ndetse n’ikerekezo kizima ubu akaba ari igihugu kimaze kwiyubaka kandi gitekanye.”

Agaruka ku bufatanye bw’Inteko zishinga amategeko, by’umwihariko n’iyi nama irimo kubera mu Rwanda, Perezida wa Sena asanga ari inama iziye igihe, cyane ko ibaye mu gihe amasezerano yashyiriweho i Cotunou arimo kurangira, akomeza asaba izo ntumwa za rubanda ko ubufatanye bwazakomeza bashyize imbere ubushake bwa poritiki.

Yakomeje agira ati Igihe kirageze ku birebana n’ikerekezo kigana ku iterambere, abantu bage mu bifatika ndetse n’ibikorwa kuko ari bwo iterambere rirambye, amahoro arambye hamwe no gufatanya gukemura ibibazo birebana n’imihindagurikire y’ibihe bizagerwaho mufatanyije. Iki ni igihe cyo gushyira mu bikorwa abantu bakagera ku bikorwa bifatika,  bakagera ku musaruro n’ibisubizo mu buryo bufatika kuko ibyo byose kubigeraho nta bwo bikenera amikoro ahambaye.”

Carlos Zorrinho  uyobora Inteko Ishinga Amategeko ihuje inteko za ACP n’Inteko y’Ubumwe bw’u Burayi EU,  yasabye abagize Inteko zishinga amategeko  ko ubuvugizi bwabo nk’intumwa za rubanda ari ngombwa kuko ari bo mu nshingano bafite kuba abavugizi b’abaturage batagira kivugira, dore ko ari bwo ababatoye bazakomeza kubagirira ikizere harimo abagore n’abagabo, asaba abagize inteko gukomeza gushyiraho uruhare rwabo mu kuvuga  ahakiri ibibazo  mu rwego rwo kurandura burundu ibibazo by’iterabwoba, ubuhezanguni, n’ibindi bibazo biri hirya no hino ku Isi bijyanye n’ingaruka z’imihindagurikire y’ibihe nk’imiyaga idasanzwe byose bikibangamiye abaturage bo muri Afurika by’umwihariko mu karere ka Sahel n’ahandi ku Isi, kuko bikomeje kongera ubwoba mu baturage.

Mbere yuko abagize Inteko zishinga amategeko basoza inama zabo zirimo kubera mu Rwanda, biteganyijwe ko bazasura imwe mu mishinga y’iterambere ifasha abaturage harimo Umudugudu w’ikitegererezo wa Karama “Mount Kigali Power Substation Project” n’ubuhinzi bw’indabo bw’umushinga wa “Bella Flowers”.

Izi nama ziraganira ku nsanganyamatsiko zitandukanye zirimo kwihaza mu biribwa, uruhare rw’uburinganire n’ubwuzuzanye mu kurwanya amakimbirane, n’iterambere rirambye ry’abaturage. Ibiganiro byabo bigamije gushyira mu bikorwa inama zatanzwe ku kurwanya imbogamizi zagaragajwe mu nama ku ihindagurika ry’ikirere (COP25), ndetse no gusubiza ibibazo byibazwa ku ngaruka imihindagurikire  y’ikirere igira ku burobyi, ubworozi, n’ubuhinzi bikorerwa mu mazi.

Abayobozi batandukanye hamwe n’intumwa za rubanda ziri muri iyo nama zigera kuri 350 baturutse mu bihugu 107 birimo 48 byo muri Afurika yo munsi y’ubutayu bwa Sahara n’u Rwanda rurimo, 16 byo muri Karayibe na 15 byo muri Pasifika n’abavuye mu muryango w’Ubumwe bw’u Burayi 28.

Umwanditsi:

Twagira Wilson

Tanga Igitekerezo

Email yanyu ntigaragazwa ku rubuga. Amazina na Email ni ngombwa.