18°C , Partly cloudy | Kigali-Rwanda

Mu myaka 19, kwegereza abaturage ubushobozi byagejeje kuri byinshi

Yanditswe na Mugisha Benigne

Ku ya 13-02-2020 saa 07:43:58
Abagize sosiyete sivili bari bitabiriye iyi nama

Minisitiri w’Ubutegetsi bw’Igihugu, Prof. Shyaka Anastase, avuga ko urugendo rw’imyaka 19 yo kwegereza abaturage ubuyobozi n’ubushobozi rwageze kuri byinshi ariko ari urugendo rugikomeza.

Ibi Prof. Shyaka yabivugiye mu nama nyunguranabitekerezo yahuje inzego zinyuranye zirimo iz’ibanze na sosiyete siviri, ejo hashize ku wa Gatatu, tariki ya 12 Gashyantare 2020.

Yagize ati “Kwegereza ubuyobozi n’ubushobozi abaturage byatanze umusaruro mu gihugu cyacu ariko ntituragera iyo tujya, kuko turacyafite urugendo n’ubwo hari ibyiza byinshi twavanyemo tuzanubakiraho ejo heza kurushaho”.

Prof. Shyaka avuga ko mu kiciro cya gatatu cyo kwegereza ubuyobozi n’ubushobozi abaturage, imbaraga zizashyirwa mu kubaka inzego no kuzamura ireme rya serivisi abaturage bahabwa, kuko n’ubwo serivisi zabagezeho ni ngombwa ko zishyirwamo imbaraga.

Ati “Serivisi zagejejwe ku baturage ariko ntiziragira ireme ryifuzwa, gufasha umuturage kugira uruhare mu bimukorerwa, no kudategereza ko bimugeraho ahubwo akagira uruhare mu kubikemura”.

Ku bijyanye no kwegura kw’abayobozi batanga impamvu ko umuvuduko igihugu kiriho batabasha kugendana na wo, Prof. Shyaka avuga ko inshigano bafite zitaremereye ngo zibarushe imbaraga, ko ahubwo zigenda zoroha uko umuturage agenda ahindura imyumvire.

Ati “Kwegereza ubuyobozi n’ubushobozi abaturage ntibiremereye, ahubwo ni uko umuyobozi aba agomba kubazwa ibyo akora na we akabigaragaza, iyo inzego zikorera mu mucyo cyangwa ahagaragara zibasha gusobanura icyo zikora”.

Umuyobozi w’Ihuriro ry’imiryango itari ya Leta, Ryarasa Joseph, avuga ko ari byinshi byakozwe kuko Leta yari ifite ubushake, gusa ngo mu myaka ishize nta bwo byose byagezweho.

Avuga ko abona byaragezweho ku kigero cya 90%, akaba yizera ko iryo 10% rizagerwaho mu gihe gisigaye cyo kwegereza ubuyobozi n’ubushobozi abaturage.

Ryarasa ati “Abaturage bakwiye kuba umusingi ufatika wa za poritiki zigwa, kugira ngo bibe iby’Abanyarwanda bose kugira ngo twubake imiyoborere ihamye kandi myiza”.

Ku bijyanye n’urwego rufata ibyemezo mu karere no mu murenge, avuga ko bizageza ubwo bigera ku rwego rw’Akagari kuko asanga imyumvire y’abantu yaragutse kandi yarakangutse.

Ati “Biragaragara ko ku kagari hakeneye kongerwa imbaraga kugira ngo ibyemezo abe ari ho bifatirwa kandi byorohere abaturage kuhagera kuko habegereye, muri iki gihe byashoboka ariko mbere byari kuba ikibazo ku bw’imyumvire yari ikiri hasi”.

Ryarasa avuga ko ari ngombwa ko imitangire ya serivisi yiyongera kandi abayobozi ndetse n’abantu bose bamaze imyaka itari mike babikangurirwa, byaba byiza serivisi zihabwa abaturage zikanozwa kandi zishyirwamo imbaraga.

Ku kijyanye no kubaza abayobozi b’Inzego z’ibanze ibyo bakora bikurikirana ahanini no kwegura kw’abayobozi, avuga ko ari ngombwa ko bongererwa ubushobozi n’ubumenyi kugira ngo badasabwa ibyo bafite.

Ati “Abayobozi b’Inzego z’ibanze bakeneye kongererwa ubushobozi mu bijyanye n’imiyoborere kugira ngo babashe gukora inshingano zabo neza, ibyo bizagabanya abayobozi begura bya hato na hato”.

Ryarasa akomeza avuga ko mu myaka 20 byagaragaye ko hari abaturage badahindura imyumvire, bakumva ko ibintu byose bagomba kubikorerwa n’ubuyobozi.

Aha yatanze urugero rw’abaturage bashaka kubana n’amatungo mu nzu kandi bazi ingaruka mbi zabyo, abaturage bategereza ko ubuyobozi bubacukurira imisarani n’ibindi.

Mu bijyanye na gahunda yo kwegereza ubuyobozi n’ubushobozi abaturage, bamwe mu baturage baganiriye n’Imvaho Nshya, bavuga ko bishimira ko ubuyobozi bwabegerejwe ariko ngo serivisi bakenera mu nzego z’ibanze ntibazihabwa neza, ngo haracyarimo ibibazo.

Mukundabantu Silas ni umuturuge w’Umurenge wa Rwezamenyo, Akarere ka Nyarugenge, avuga ko serivisi zihabwa abaturage zikiri hasi, agasaba ko zakongerwa kandi zikanozwa, umuturage ukeneye serivisi akazihabwa mu buryo bwihuse kandi neza.

Nyiranzabandora Anita ni umuturage w’Umurenge wa Gikondo mu Karere ka Kicukiro, ashima imiyoborere myiza igaragara mu gihugu, agashima uburyo umuturage yitaweho mu bikorwa byose, ariko akanenga bamwe mu bayobozi b’Inzego z’ibanze bakora nabi, ntibakemurire igihe ibibazo by’abaturage kandi ntibafashe abaturage guhindura imyumvire.

Umwanditsi:

Mugisha Benigne

Tanga Igitekerezo

Email yanyu ntigaragazwa ku rubuga. Amazina na Email ni ngombwa.