18°C , Partly cloudy | Kigali-Rwanda
Gashugi André, Umuyobozi Mukuru w'Ikigo RNIT, avuga ko Abanyarwanda bakomeje gusobanukirwa akamaro ko kwizigamira (Foto James R.)

Mu mwaka amafaranga y’ikigega ‘Iterambere Fund’ yiyongereyeho 65%

Yanditswe na MUTUNGIREHE SAMUEL

Ku ya 10-07-2018 saa 06:49:42

Umuyobozi Mukuru w’Ikigo k’Ibigega by’Imari mu Rwanda (RINT), Gashugi André, atangaza ko Abanyarwanda bakomeje gusobanukirwa akamaro ko kwizigamira bigamije ishoramari mu kigega ‘Iterambere Fund’, aho mu mwaka umwe amafaranga y’iki kigega yazamutseho 65%, ava kuri miliyari imwe n’ibice bine agera kuri miliyari ebyiri n’ibice bitatu.

Gashugi André, Umuyobozi Mukuru w’Ikigo RNIT, avuga ko Abanyarwanda bakomeje gusobanukirwa akamaro ko kwizigamira (Foto James R.)

Mu kiginiro kihariye Gashugi André yagiranye n’Imvaho Nshya, yavuze ko mu gihe cy’umwaka umutungo w’iki kigega umaze kuzamuka ku gipimo cya 65%. Yagize ati “Urebye nko mu kwezi kwa Nyakanga 2017, ikigega cyari gifite amafaranga 1,434,910,000, ubu mu mpera z’ukwezi kwa Kamena 2018 tukaba twari dufite amafaranga 2,314,888,000.

Ikigega gikomeje kuzamuka neza biturutse cyane cyane ku bantu bashaka kwizigamira, bashaka gushora imari kuko ari ahantu heza ho gushora amafaranga yabo kuko ni ikigega kizewe, bigaragara ko amafaranga acunzwe neza kuko yashowe ahantu hashobora gutanga inyungu ugereranyije n’ubundi buryo busanzwe hanze aha ku muntu wifuza kuzigama amafaranga ye ku nyungu nziza.

Ikindi ni uko dukomeje ubukangurambaga bwo kubwira no gusobanurira abantu ngo bizigamire, bazigamire abana babo kuko ntawumenya uko ejo hazaba hameze. Kugira ngo umuntu azagire icyo ageraho, ni uko aba afite ubwizigame, ni uko aba afite igishoro kandi igishoro gituruka mu mafaranga umuntu aba yizigamye”.

Umuyobozi Mukuru wa RNIT yakomeje avuga ko imicungire myiza y’ikigega yagize akamaro no ku gaciro k’umugabane umwe aho umaze kuzamuka kugera ku 10%.

Ati “31 Nyakanga 2017, umugabane wari amafaranga 107.73. Uyu munsi ni 117.83; bivuze ko umuntu waba umazemo umwaka, niba umugabane ugeze ku mafaranga 117.83 ubu yaba yariyongereho agera ku 10%”.

Yakomeje avuga nk’ikigega gifasha Abanyarwanda b’ingeri zose kwizigama bahereye ku mafaranga make 2000, bazakomeza ubukangurambaga bugere kuri buri muturage bityo umuntu wese ushaka kwizigamira amenye ayo mahirwe igihugu cyashyizeho yo kwizigamira no gushora imari binyuze mu kigega ‘Iterambere Fund’.

Bamwe mu bakomeje gushora amafaranga yabo bagura imigabane mu kigega ‘Iterambere Fund’ barimo abantu ku giti cyabo, amakoperative, abakozi n’ibigo n’abandi bagenda babyumva kandi bitabira, bagura imigabane bagamije kwizigama bigamije ishoramari.

Ikigega ‘Iterambere Fund’ cyatangijwe mu mpera z’umwaka wa 2016, amafaranga y’abaguze imigabane acungwa mu buryo bwizewe bihagarikiwe na Banki Nkuru y’u Rwanda mu rwego rwo kuzamura umuco wo kwizigama hagamijwe ishoramari aho abantu bagura imigabane bakizigamira mu buryo bugamije inyungu, uwaguze imigabane akaba ashobora no kuyitangaho ingwate muri banki bityo akiteza imbere mu gihe abandi bataka igishoro.

TANGA IGITEKEREZO

2 Comments on “Mu mwaka amafaranga y’ikigega ‘Iterambere Fund’ yiyongereyeho 65%”

  1. Iyo nkuru Umuyobozi mukuru wa RNIT atangaje irashimishije. Igitekerezo natanga ni uko hashyirwa imbaraga nyinshi mubukangura mbaga kugirango aba tarés dans basobanukirwe inyungu zo kwiteganyiriza muri rusange. Hari nko gutegura amasomo yakwigishwa mumashuli mato, ay’isumbuye ndetse na Kaminuza. Hari no kubinyuza mu makina muco zateguwe neza kandi zihoraho mu binyamakuru bitandukanye kandi bisomwa, byumvwa cyangwa birebwa n’abantu benshi. Hari no guha isoko abantu bikorera kugiti cyabo bazi gukora ubukangura mbaga kandi barahari.

  2. Ndakosora inkuru maze gutanga. Hari ahanditse ngo aba tarés dans sibyo nashatse kwandika ahubwo ni abatari bake

Leave a Reply

Your email address will not be published. Required fields are marked *