18°C , Partly sunny | Kigali-Rwanda

Mu minsi 100 yo kwibuka ibiganiro bizakomeza gutangwa mu mashuri

Yanditswe na MUGISHA BENIGNE

Ku ya 08-05-2018 saa 06:02:16

Mu gihe k’iminsi 100 yo kwibuka ku nshuro ya 24 Jenoside yakorewe Abatutsi mu Rwanda, ibiganiro kuri Jenoside yakorewe Abatutsi bizakomeza gutangwa mu mashuri, mu rwego rwo gusobanurira abanyeshuri amateka yayo n’uburyo yashyizwe mu bikorwa.

Abanyeshuri barahabwa ibiganiro ku mateka ya Jenoside yakorewe Abatutsi mu gihe k’iminsi 100 yo kwibuka

Nk’uko bisobanurwa na Ndayisaba Fidele, Umunyamabanga Nshingwabikorwa wa Komisiyo y’Igihugu y’Ubumwe n’Ubwiyunge, abanyeshuri bakomeza kuganirizwa ku mateka ya Jenoside mu gihe k’iminsi 100 yo kwibuka kuko bakwiye kuyamenya nk’abana bakibyiruka kugira ngo ibyabaye ntibizongere kubaho ukundi.

Yagize ati “Ni ngombwa ko abana bakibyiruka baganirizwa ku mateka ya Jenoside yakorewe Abatutsi yabaye mu 1994, bakamenya ukuri kwayo bityo bagafatanya n’abandi banyarwanda kuyirwanya bazi neza ukuri ku byabaye”.

Nk’uko byatangajwe na Minisiriri w’Uburezi, Dr  Mutimura  Eugene  mu nyandiko yageneye ibigo by’amashuri, yasabye ko nyuma y’icyumweru k’icyunamo kimara iminsi 7 kiba mu gihugu hose, abanyeshuri bakomeza kuganirizwa ku mateka ya Jenoside yakorewe Abatutsi mu gihe k’iminsi 100 yo kwibuka, ndetse ibigo bikibuka abahoze ari abanyeshuri n’abarezi babyo bazize Jenoside yakorewe Abatutsi.

Abanyeshuri na bo bemeza ko bahabwa ibiganiro ku mashuri, bakaba bakomeje kumenya ukuri kuri Jenoside, amateka yayo n’uburyo yateguwe mu gihe kirekire, ikaza gushyirwa mu bikorwa mu buryo bukomeye mu 1994.

Iradukunda Basile ni umunyeshuri mu rwunge rw’amashuri rwa Gitarama, yavuze ko bajya bahabwa ibiganiro ku mateka ya Jenoside yakorewe Abatutsi, byatumye bagenda bashira amatsiko y’ibyo bibazaga nk’abana bavutse nyuma yayo.

Naho Gatera Belinda na we avuga ko ababyeyi badakunze kubaganiriza kuri Jenoside yakorewe Abatutsi, ariko ko ibiganiro bahabwa mu ishuri bigenda bibamara amatsiko binabafasha kumenya uko yateguwe n’uko yashyizwe mu bikorwa.

TANGA IGITEKEREZO

Leave a Reply

Be the First to Comment!

avatar