18°C , Partly cloudy | Kigali-Rwanda
Umuyobozi mukuru wa BK Group Dr Karusisi Diane ibumoso na Rugemanshuro Regis umuyobozi ushinzwe ibikorwa muri BK bagaragaza ibyagezweho(Foto Gentil)

Mu mezi 6 BK yashoboye kunguka miliyari 13.4

Yanditswe na SEZIBERA ANSELME

Ku ya 31-08-2018 saa 07:50:59

Ubwo Banki ya Kigali (BK Group PLC) yagaragazaga ibyagezweho mu mezi 6 abanza kugera muri Kamena 2018, Umuyobozi Mukuru wayo Dr Diane Karusisi yatangaje ko ibikorwa bya BK birimo no kongera serivisi itanga byabashije gutuma yunguka miliyari 13.4 kandi ikomeje urugamba rwo kwagura ibikorwa mu gihugu no mu karere.

Umuyobozi mukuru wa BK Group Dr Karusisi Diane ibumoso na Rugemanshuro Regis umuyobozi ushinzwe ibikorwa muri BK bagaragaza ibyagezweho(Foto Gentil)

Mu kiganiro ubuyobozi bwa Banki bwagiranye n’itangazamakuru, Dr Karusisi atangaza ko muri rusange ibikorwa byagutse muri iyo banki birimo gutanga serivisi za banki nk’uko byari bisanzwe, gutanga ubwishingizi, n’iby’isoko ry’imari n’imigabane ndetse n’ibindi bikorwa byayo mu ikoranabuhanga.

Dr Karusisi agira ati: “Kwiyongera ku nyungu bya BK Group tubikesha kuba abakiriya bagiye batugana bariyongereye kandi n’amafaranga baza kubitsa nayo akiyongera bituma n’inguzanyo zagiye zizamuka.

Twatanze inguzanyo zingana n’amafaranga y’u Rwanda miliyari 481, iyo ikaba ari inyongera ya 6.8 %, naho amafaranga yabikijwe yiyongereye ku kigero cya 3.8 % agera kuri miliyari 472.3 z’amafaranga y’u Rwanda”.

Dr Karusisi akomeza agaragaza ko n’umutungo wa BK Group nawo wiyongereye ugera ku mafaranga miliyari 731.8 bisobanuye ko wazamutse ku kigero cya 1.7% ugereranyije n’amezi 6 ya mbere y’umwaka wa  2017.

Umukozi ushinzwe ibikorwa by’ubucuruzi muri BK Group, Gatete Vincent mu buryo burambuye agaragaza ko abakiriya bagannye banki muri ayo mezi bagera ku 292 000, yongera abatanga serivisi za BK bangana 1441, amashami ya BK ahantu hatandukanye akomeza kuba 76, n’ATM 94, hanyuma ihererekanya ry’amafaranga ryakozwe rigera ku 916 000.

Abanyamakuru bifuje kumenya inkingi zatumye BK Group yunguka cyane ndetse n’icyo ikoranabuhanga ryayifashijeho mu kubona inyungu zagaragajwe.

Dr Karusisi asobanura ko mu ikoranabuhanga BK yatangije igikorwa kiswe “singombwa Cash” aho yakanguriraga abantu gukoresha telefone zabo kugira ngo basabe inguzanyo, hakaba indi serivisi batangije yiswe “Be quick” ifasha umuntu kuba yakwiguriza amafaranga atagombye kujya kuri banki. Hari kandi kuba abantu baroroherejwe gukoresha telefone zabo bishyura imisoro, amazi, umuriro n’ibindi byinshi bikagira uruhare mu guca imirongo yo kuri banki.

Ashimangira ibyo umuyobozi nshingwabikorwa wa BK Group, Rugemanshuro Regis avuga ko hashyizwe imbaraga mu gushora imari mu zindi nzego zirimo ubuhinzi mu kiswe “Smart Nkunganire” bifasha abahinzi gufata imbuto n’ifumbire, no gushora imari mu ikoranabuhanga rijyanye no mu mashuri aho abarikoresha bagera ku 160 000 barimo abarimu n’abanyeshuri.

Hanifujwe kumenya iby’inyungu n’imisoro muri icyo gihembwe, Dr Karusisi atangaza ko nyuma yo kwishyura umusoro, yungutse amafaranga miliyari 6, bingana n’izamuka rya 7.7% ugereranyije n’umwaka wabanje wa 2017.

Muri uyu mwaka wa 2018 kandi BK Group ikaba iteganya kwagura ibikorwa byayo mu bijyanye n’isoko ry’imari n’imigabane mu gihugu cya Kenya.

TANGA IGITEKEREZO

Leave a Reply

Your email address will not be published. Required fields are marked *