22°C , Partly sunny | Kigali-Rwanda

Mu kwezi gutaha u Rwanda ruratangira kwakira amakuru y’icyogajuru cyarwo, RWASAT-1

Yanditswe na Mutungirehe Samuel

Ku ya 08-10-2019 saa 16:24:31
Ishusho igaragaza icyogajuru kiri mu isanzure RWASAT-1 cyubatswe n'abanyarwanda n'Abayaoani kigiye gufasha ku makuru akenewe mu buhinzi (Foto Samuel M)

Amakuru ya mbere y’icyogajuru cya mbere cyubatswe n’Abanyarwanda ku bufatanye na Kaminuza ya Tokyo mu Buyapani, RWASAT-1, biteganyijwe ko azatangira kugera ku Rwanda mu kwezi gutaha, aho icyo cyogajuru kimaze iminsi cyoherejwe mu isanzure kizaba kigeze hejuru y’u Rwanda mu urugendo kizajya gikora kizenguruka Isi.

Ni amakuru yatangajwe tariki ya 8 Ukwakira 2019, mu kiganiro n’itangazamakuru cyateguwe na Minisiteri y’Ikoranabuhanga no guhanga udushya, Ambasade y’u Buyapani mu Rwanda n’ikigo ngenzuramikorere (RURA) gikurikiranira hafi iby’uwo mushinga wo kubaka ibyogajuru ku Rwanda.

RWASAT-1 ni icyogajurucya mbere cyubatswe n’Abanyarwanda babifashijwemo n’Abayapani bo muri Kaminuza ya Tokyo, kitezweho kuzafasha u Rwanda mu kubona amakuru yo mu rwego rw’ubuhinzi u Rwanda rwajyaga rugura mu bindi bihugu kuko nta cyogajuru rwagiraga.

Umwarimu muri kaminuza ya Tokyo akaba n’uwungirije uhagarariye umushinga wo gukora icyogajuru RWASAT-1, Prof. Takayoshi Fukuyo, yavuze ko icyogajuru kimaze iminsi cyoherejwe mu isanzure aho ibindi byogajuru biba biri, ariko mo hagati mu kwezi gutaha kizaba cyatangiye kogoga Isi kikazanagera mu kirere cy’u Rwanda.

Ati “Turacyareba itariki kizatangira kugenderaho mu isanzure ariko ndizera ko  mu masaha make dushobora kuba twabona ibimenyetso byacyo, nyuma yaho tugatangira kureba uko kimeze aho kiri; tuzatangira kugikoresha tureba kuri za kamera, ndizera ko mu cyumweru kimwe nyuma yo kucyohereza dushobora kureba uko kimeze cyose.”

Umuyobozi Mukuru wa RURA, Col. Patrick Nyirishema yasobanuye ko ubu kiri ahitwa International Space Station, mu isanzure ahantu hanini abantu bajyayo bakareba ibintu bitandukanye, hakaba ibikoresho bitandukanye bituma abantu bakurikirana ibintu mu kirere.

Akomeza agira ati “Hanyuma kikazava aho cyoherezwa mu kirere noneho kigenda kuko ubu kiri aho kitagenda. Itariki iteganyijwe ni itariki 18 Ugushyingo 2019; ni yo tariki twahawe hatagize igihinduka.

Ishusho igaragaza icyogajuru kiri mu isanzure RWASAT-1 cyubatswe n’abanyarwanda n’Abayaoani kigiye gufasha ku makuru akenewe mu buhinzi (Foto Samuel M)

Iyo rero cyamaze kuva aho ngaho kigatangira kugenda kizenguruka Isi ariko kirihuta, ku buryo iyo giciye hejuru y’u Rwanda tubona amakuru ariko kiba kizenguruka n’ahandi kirahanyura. Twizera ko wenda nka buri munsi mu gihe runaka kiba kiri bunyure hejuru y’u Rwanda.”

Mu kubaka icyo cyogajuru, Minisitiri w’Ikoranabuhanga Ingabire Paula yavuze ko Guverinoma y’u Rwanda yashoyemo ibihumbi 250 by’Amadorari y’Amerika, asaga miriyoni 225 z’amafaranga y’u Rwanda, naho u Buyapani bushyiramo ibihumbi 675 by’amadolari, asaga miliyoni 607 z’amafaranga y’u Rwanda.

Icyo cyogajuru kiri mu bwoko bw’ibyogajuru bito, Cube Sat, bikozwe mu buryo bugezweho aho bihabwa ibige kingana n’umwaka mu kirere bitanga amakuru akenewe bigasimbuzwa ibindi nabyo bijyanye n’ikoranabuhanga riba rigezweho.

Umwanditsi:

Mutungirehe Samuel

Tanga Igitekerezo

Email yanyu ntigaragazwa ku rubuga. Amazina na Email ni ngombwa.