17°C , Partly cloudy | Kigali-Rwanda
Rwagasore Felicien

Mu kubaka Igihugu, wowe wifuza iki cyagarukwaho mu mwiherero 16?

Yanditswe na Sezibera Anselme

Ku ya 09-03-2019 saa 16:25:04

Kuva kuri uyu wa 9 kuzageza ku ya 12 Werurwe 2019 Abayobozi bakuru b’Igihugu n’inzego zitandukanye basaga 250 bari i Gabiro mu karere ka Gatsibo mu Mwiherero ku nshuro yawo ya 16.

Aha haraganirwa ku byagezweho, ibitaragezweho n’impamvu yabyo, ariko kandi n’ibigomba gukorwa mu kwihutisha iterambere ry’Abanyarwanda.

By’umwihariko, ingingo eshanu ni zo ziganirwaho, izo ni: Aho u Rwanda rugeze mu kerekezo k’iterambere, Guteza imbere ireme ry’uburezi, Guteza imbere ubuzima, Kongera umusaruro w’ubuhinzi no Guteza imbere ishoramari no kongera ibyoherezwa mu mahanga.

Ni muri urwo rwego Abanyarwanda baganiriye n’Imvaho Nshya bagaragaje bimwe na bimwe mu byakongerwamo imbaraga kugira ngo Igihugu gikomeze kwiyubaka no kugera ku iterambere rirambye.

Sibomana Amili: Gukora imihanda, kunoza uburezi

Atuye mu murenge wa Niboye mu Karere ka Kicukiro, yifuza ko bitewe n’uburyo Umujyi wa Kigali urimo gutera imbere byakabaye byiza imihanda ya kaburimbo ishyizwemo imbaraga mu guhuza amakaritsiye.

Ati: “Bibaye byiza iyo mihanda yakorwa kuko byongera isuku muri rusange kandi tuzi neza ko intego y’Umujyi wa Kigali ari isuku ikaza iherekejwe n’ibindi byose.”

Ku rwego rw’Igihugu muri rusange yifuza ko hanozwa urwego rw’uburezi hagurwa amashuri, kuzamura umushahara wa mwarimu kuko bifasha mu kunoza ireme ry’uburezi bigendeye ku bipimo mpuzamahanga.

Sibomana Amili

Nyirakanani Immaculée: Kunoza umubano n’amahanga

Nk’umucuruzi w’imyenda mu isoko rya Ziniya, avuga ko Umwiherero w’abayobozi wagombye kwibanda mu kwegera bimwe mu bihugu hagamijwe kuvugurura umubano nabyo mu karere kugira ngo habeho imihahiranire n’imigenderanire ku bacuruzi, Umunyarwanda agende nta cyo yikanga.

Agira ati: “Hakwiye ko ibihugu bimwe bitigira nyamwigendaho, bikumva ko kubaho ari ukubana, Umunyarwanda akagenda yisanga hose nk’uko n’abandi baza mu Rwanda nta nkomyi. Ibi byarushaho guteza imbere ubuhahirane n’ubucuruzi mu karere.”

Nyirakanani Immaculée

Kakoza Francis: Umusoro no kwagura amasoko

Acuruza ibyuma bikora imodoka (Piece de Rechange) mu Mujyi wa Kigali. Ibyifuzo bye ni uko Umwiherero wazareba ku izamuka ry’ibiciro aho barangurira ariko babaza (ababaranguza) bagasobanurirwa ko biterwa n’imisoro.

Ati: “Turifuza ko Leta yacu yareba kuri icyo kintu, kuko aho turangurira usanga baduhenda, wababaza bakavuga ko ari ukuzamuka k’umusoro. Ibi byarebwaho, niba koko ari wo cyangwa se atari wo ubitera, hakagira igikorwa.” Avuga ko ibi bituma abantu benshi batagura ibikorwa byabo.

Kakoza Francis

Kwizera Derick: Kunoza ibyiciro by’Ubudehe

Yifuza ko mu Mwiherero ingingo yo kunoza ibyiciro by’Ubudehe yavugwaho. Ati: “Iyo urebye imihanda, amashuri, ibikorwa remezo, umutekano muri karitsiye zacu usanga bimeze neza, hari intambwe yatewe. Ikindi ari na cyo gikomeye ibijyanye n’ibyiciro by’Ubudehe hari aho bitaranozwa twifuza ko byakosorwa umuturage akajya mu kiciro akwiye kuko iyo bitabaye bityo umuturage ahura n’ingaruka.”

Kwizera Derick

Rwagasore Felicien: Kongera Ibikorwa remezo

Aganira n’Imvaho Nshya, avuga ko icyakomeza gutuma Abanyarwanda biyubaka icya mbere ari ibikorwa remezo kuko ari byo musingi w’amajyambere mu bintu byose, na byo bikaba byagarukwaho.

Agira ati: “Icyo wakora cyose nticyapfa kugaragara ariko burya ibikorwa remezo ni byo bipimwa. Mu by’ukuri iterambere tubona rigomba gushingira mu gukora imihanda, kuko igira uruhare rwo kongera umusoro kuko ibikorwa bihari biba byongerewe agaciro.”

Rwagasore Felicien

Nsanzimana Elisee: Guca abashaka indonke batakoreye

Nk’umutekinisiye muri “Kazi ni Kazi” mu karere ka Nyarugenge mu Mujyi wa Kigali, agaragaza icyakorwa mu kubaka u Rwanda, hakwiye kuvanwaho abiyise abakomisiyoneri bihaye akazi ko guhuza abacuruzi n’abakiriya ngo babakorere bagamije guhabwa indonke.

Avuga ko bagira uruhare mu kubuza bamwe kubona abakiriya nyamara baje mu kazi kubera kubaganisha kuri wa wundi ubagenera indonke (mission) bigatuma amazina ya bamwe yibagirana. Avuga ko mu gihe izo nzitizi zikuweho bizagira uruhare runini mu kwinjiriza igihugu.

Nsanzimana Elisee

TANGA IGITEKEREZO

Leave a Reply

Your email address will not be published. Required fields are marked *