20°C , Partly sunny | Kigali-Rwanda

Mu cyaro hari abafite impungenge zo kwanduzwa Koronavirusi n’abava i Kigali badapimwe

Yanditswe na Twizeyimana Fabrice

Ku ya 25-03-2020 saa 13:03:10
Meya Habitegeko asaba abaturage gushyirikiza ubuyobozi umuntu uvuye ahandi ashaka kubinjiramo

Muri iki gihe u Rwanda ruhanganye n’icyorezo mpuzamahanga cya COVID-19 (Coronavirus) Leta yasabye abaturage kuguma mu ngo zabo, nk’uburyo bwizewe bwo gukumira cyo cyakwirakwira mu baturage, dore ko cyandura mu buryo bwihuse.

Mu rwego rwo kwirinda kandi ko iki cyorezo gikwira hirya no hino mu turere, kuwa 21 Werurwe 2020 Minisitiri w’Intebe yashyizeho amabwiriza ahagarika ingendo zose zikorwa n’abantu hagati y’imijyi n’uturere tw’igihugu, byose muri gahunda yo gukumira ko abantu bagikwirakwiza.

Aya mabwiriza akimara gusohoka, hari bamwe mu batuye mu mujyi wa Kigali bayirengagije maze bazinga utwangushye bafata inzira ibasubiza mu byaro bakomokamo, bamwe bibwira ko bahunze Coronavirus nyir’izina, abandi bahunga ingaruka zayo.

N’ubwo hari bamwe batahiriwe n’urugendo bagasubira inyuma kubwo kubura imodoka zibatwara kuko nazo zari zamaze guhagarikwa, hari bake bashoboye kwishakamo ibisubizo bigoranye, ariko birangira bageze mu cyaro ku ivuko.

Bagezeyo ariko ntibakiriwe neza n’abo basanzeyo, ahubwo bafashwe nk’abantu batubahiriza amabwiriza aba yashyizweho n’ubuyobozi agamije guhuriza hamwe imbaraga mu guhangana n’icyorezo cya Coronavirus, by’umwihariko abantu birinda icyatuma iyi ndwara ikwirakwira.

Nko mu karere ka Nyaruguru, hari abaturage bagaragaje ko bafite impungenge ko iki cyorezo gishobora kugera iwabo kizanwe n’aba baturutse mu mujyi wa Kigali aho Coronavirus yamaze kugera, dore ko banataha batabanje kwipimisha ngo bamenye uko bahagaze.

Umuturage witwa Kwizera utuye i Gikore mu karere ka Nyaruguru, yagaragarije Umuyobozi w’aka karere ko bifuza ko nibura hashyirwaho uburyo bwo kujya babanza kubapima mbere y’uko binjira mu giturage, kugira ngo n’uvuye i Kigali yaramaze kwandura, amenyekane ataranduza abo asanze mu cyaro.

Mu gitekerezo yatanze ubwo Meya Habitegeko Francois yatangaga ikiganiro cyo kwirinda Coronavirus kuri Radio Salus kuwa 24 Werurwe 2020, Kwizera yagize ati “Nkatwe tuba mu cyaro ahantu hitwa i Gikore mwadufashije abantu bava i Kigali bakajya bamanuka mumaze kubapima ko usanga ahanini bakoraga mu ngo z’abantu bakomeye wenda banagiye mu mahanga bakaba bafite icyo kibazo (COVID-19).”

Umuyobozi w’akarere ka Nyaruguru Habitegeko Francois, yemera ko n’ubwo ingendo hagati y’imijyi n’uturere zahagaritswe ndetse hakaba harakajijwe ingamba zo kugenzura ishyirwa mu bikorwa ry’ayo mabwiriza, ngo ntihabura ababaca mu rihumye bakinjira mu giturage baciye inzira zitemewe ‘panya’.

Yasabye abaturage kujya batungira agatoki ubuyobozi bakagaragaza uwo babonye abinjiye avuye ahandi, akabanza gushyirwa ahagenewe gushyirwa abategereje kumenya ko batanduye Coronavirus.

Yagize ati “Mu mabwiriza n’ubundi ingendo hagati y’uturere n’imijyi no hagati y’uturere n’utundi izo zahagaze, ndetse nagira ngo nsabe n’abaturage nihagira n’uduca mu rihumye akaba yanyura mu nzira ya panya baduhe amakuru ku buryo kwihuse kuri ya nimero 4160, ni nimero wahamagara igihe icyo ari cyo cyose kandi waba ufite Amafaranga muri tekefone cyangwa utayafite uratubona.

Uduhe amakuru y’uwo muntu tumufate tumujyane aho dushyira abantu dutegereje kureba niba nta kibazo bafite kuko ntabwo twemera ko hari umuntu waza akivanga mu baturage avuye ahantu tutazi amateka ye, tutazi ikibazo yaba afite”.

Meya Habitegeko yakomeje agira ati “Ubwo rero Kwizera n’abandi baturage batwumva, niba hari umuntu muzi wavuye ahandi akaba yaca mu nzira za panya kuko mu muhanda ho inzego z’umutekano zirimo ntabwo zareka bapfa gutambuka ariko ashobora kugira gutya akaza n’amaguru akinjira mu nzira ya panya agashiduka yageze mu baturage, aha rero niho ya makipe yo ku mudugudu, ya makipe yo ku kagari no ku murenge natwe dukomeza gukurikirana ko nta muntu watwivangamo wenda avuye ahandi hantu tutamenye uko ari”.

COVID-19 ni indwara y’icyorezo ihangayikishije isi muri rusange n’u Rwanda by’umwihariko.Ubwo twandikaga iyi nkuru mu Rwanda hari hamaze kugaragara abantu 40 bayirwaye.

Kwirinda gusuhuzanya uhererekanya ikiganza, gukaraba intoki neza kandi kenshi gashoboka ku munsi, kwirinda kwikora mu maso, ku mazuru no ku munwa ndetse kuguma mu rugo ni zimwe mu ngamba zagufasha kwirinda iki cyorezo kimaze guhitana abarenga ibihumbi 18 ku isi.

Umwanditsi:

Twizeyimana Fabrice

Tanga Igitekerezo

Email yanyu ntigaragazwa ku rubuga. Amazina na Email ni ngombwa.