17°C , Partly sunny | Kigali-Rwanda

Mu bufatanye bw’Afurika n’u Bushinwa, Kagame yashimye iki gihugu

Yanditswe na MUGABO LAMBERT

Ku ya 05-09-2018 saa 07:18:07

Ku munsi wa nyuma w’Inama y’Ihuriro ku bufatanye bw’Afurika n’u Bushinwa, FOCAC, yaberaga Beijing, Perezida Paul Kagame yashimye iki gihugu na Perezida ukiyobora, Xi Jinping. Ni mu gihe Madamu Jeannette Kagame we ari kumwe n’abadamu b’abakuru b’ibihugu by’Afurika bitabiriye inama yo kurwanya icyorezo cya Sida.

Perezida Paul Kagame (uwa kabiri ibumoso), habanza Jeannette Kagame, bari kumwe na Perezida w’u Bushinwa Xi Jinping na Madamu we Peng Liyuan

Ibi Perezida Paul Kagame, akaba n’Umuyobozi w’Umuryango w’Afurika Yunze Ubumwe, yabigaragaje ku munsi w’ejo hashize, tariki ya 4 Nzeri 2018, mu kiganiro yitabiriye ari kumwe n’abandi bayobozi b’ibihugu by’Afurika, cyavugaga ku bufatanye bw’u Bushinwa n’Afurika, kiyoborwa na Perezida w’u Bushinwa Xi Jinping.

Akaba yarashimye u Bushinwa ku gushyigikira u Rwanda, ati “Ndashaka gushimira Repubulika y’abaturage b’u Bushinwa nawe Perezida Xi Jinping, ku bw’ubufasha igihugu cyange cyabonye mu iterambere ryacyo.”

Kagame yavuze ko politiki y’Isi mu bihe bya none hagomba kubaho kwiyemeza gushyira imbere ku rwego rw’Isi amahoro, umutekano, imikoranire, ubucuruzi butagira umupaka, ubwubahane n’ubufatanye aho buri wese abonamo inyungu.

Madamu Jeannette Kagame (uwa 5 uvuye iburyo) ari kumwe n’abandi badamu b’abayobozi b’ibihugu by’Afurika

Avuga ko mu buryo burambye, igihe urwego rw’abikorera ari rwo ruyoboye ishoramari mu nzego zitanga umusaruro muri Afurika, ari iby’ingenzi. Ati “Intego zigaragara zashyizweho na Perezida Xi Jinping muri uru rwego zakiriwe neza kandi zarishimiwe.”

Perezida Kagame yavuze ko ikigaragara kandi gifite akamaro ari uko iteganyabikorwa rya Beijing rigamije guteza imbere gahunda zisanzweho z’iterambere hagati y’Afurika n’u Bushinwa. Yavuze ko iyi nama yaguye ubufatanye mu nzego zinyuranye bizatuma habaho kwegera intego ibihugu bifite.

Umukuru w’Igihugu akaba yaravuze ko ibyavuye mu nama ndetse n’iteganyabikorwa rya Beijing bireba ku bintu bifatika kandi bitanga gahunda y’ibigomba kuzagerwaho.

Ku mugoroba w’ejo hashize, mbere yo gusoza uru ruzinduko mu Bushinwa, Perezida Paul Kagame yagiranye ikiganiro na mugenzi we w’u Bushinwa Xi Jinping ku mubano w’ibihugu byombi. Ni mbere y’uko Perezida Kagame na Madamu Jeannette Kagame bakirwa ku meza na Perezida xi Jinping na Madamu we Peng Liyuan

Jeannette Kagame yitabiriye inama ku kurwanya Sida

Madamu Jeannette Kagame wajyanye na Perezida Paul Kagame, ku munsi w’ejo hashize ari kumwe n’abandi badamu b’abakuru b’ibihugu by’Afurika, bitabiriye inama yo kurwanya no kwirinda icyorezo cya Sida, yari ifite insanganyamatsiko igira iti “Dufatanye gutegura ahazaza hatarangwa Sida.”

Iyi nama ikaba yarabaye ibangikanye n’iy’Ihuriro ku bufatanye bw’Afurika n’u Bushinwa hagamijwe kuganira ku ntambwe yatewe ndetse no kugaragaza icyuho kigihari mu kurandura ubwandu bushya bw’agakoko gatera Sida.

Madamu wa Perezida wa Burkina Faso, Sika Bella Kabore, wavuze ahagarariye abandi mu ihuriro ryo kurwanya Sida bahuriramo rya OFLA, yashimangiye ko ubwandu bukiboneka cyane muri Afurika. Yasabye bagenzi be kongera imbaraga mu buvugizi hagamijwe kongera imbaraga mu bimaze kugerwaho.

Madamu wa Perezida w’u Bushinwa, Peng Liyuan, yatumiye abadamu bose b’abakuru b’ibihugu by’Afurika kwerekwa bimwe mu biranga amateka y’iki gihugu. Mu masaha ya nyuma ya saa sita, Madamu Jeannette Kagame yakiriwe na mugenzi we, Madamu wa Perezida w’u Bushinwa, Peng Liyuan, ubwo yasuraga “National Centre for Performing Arts.”

TANGA IGITEKEREZO

Leave a Reply

Your email address will not be published. Required fields are marked *