26°C , Partly sunny | Kigali-Rwanda

Mu 2024, kuri hegitari hazaba hakoreshwa kg 75 z’ifumbire

Yanditswe na Mutungirehe Samuel

Ku ya 14-02-2020 saa 15:18:55
Dr. Charles Bucagu, avuga ko Guverinona y'u Rwanda yiyemeje kongera umusaruro binyuze no mu buryo bwo kongera ingano y'ifumbire kuri hegitari (Foto Samuel M)

Umuyobozi Mukuru wungirije w’Ikigo k’Igihugu cy’Ubuhinzi n’Ubworozi RAB, ushinzwe ubushakashatsi, Dr. Charles Bucagu, avuga ko gahunda ya Guverinoma mu kongera umusaruro ari uko mu 2024 hazaba hakoreshwa ibiro 75 by’ifumbire mvaruganda kuri hegitari bivuye ku biro 33 mu mwaka w’ingengo y’imari wa 2017/2018.

Ibi bikaba biri muri gahunda yo kongera no kuvugurura imbuto bigendana no kongera umusaruro binyuze mu gukoresha ifumbire kuri hegitari. Dr. Bucagu ati “Gahunda ihari ni ukugera ku biro 75 kuri hegitari bivuye ku biro 33 byakoreshwaga kuri hegitari imwe mu 2017/2018, bizaba birenze inshuro ebyiri ku kigero turi gukoresha uyu munsi”.

Asobanura icyo bivuze, yagize ati “Dukeneye kongera ingano y’ifumbire dukoresha ariko twongera n’ingengo y’imari.” Yakomeye avuga ko mu gihe u Rwanda rwajyaga rutumiza hanze ifumbire yo gukoresha mu buhinzi buteye imbere, gahunda ihari ari uko kuri ubu ifumbire igiye kujya ikorerwa mu Rwanda.

Dr. Bucagu ati “Vuba aha tugiye gushyiraho uruganda ruzajya rukorera ifumbire imbere mu gihugu, bizatuma ibintu byoroha no kubona ifumbire byoroha ku bahinzi bacu”.

Ikindi kigiye gukorwa ni ukongera ishwagara mu butaka bwashaririye, aho kugeza ubu ubutaka burenga 50% bukorerwaho ubuhinzi burimo aside ituma imyaka itera neza, bikaba bisaba ko abahinzi bakoresha ishwagara. Dr. Bucagu ati “Ibi biri gukorwa kugira ngo tumenye neza ko turi guha serivise zivuguruye abahinzi bacu.”

Abahinzi barenga miriyoni 6.2 buri mwaka baba basabwa kugura ifumbire zunganira mu mirima yabo zigera kuri toni 123 996 z’ishwagara zikoreshwa ku butaka nibura bungana na 10% by’ubutaka buhingwaho ibihingwa by’ibanze mu Rwanda.

Kugeza ubu ubutaka bungana na hegitari miriyari imwe ni bwo byagaragaye ko bukeneye gukoresha ishwagara mu butaka buhingwaho, uko uturere tungana, mu gihe ubutaka bwa hegitari ibihumbi 20 bw’abangana na 10% by’abayikeneye ari bwo buyishyirwaho. Ibi bikaba byaratumye ingengo y’imari na yo yongerwa.

Abahinzi mu Rwanda bahawe amahirwe ya gahunda ya Nkunganire ibafasha kubona ifumbire ku bihingwa byatoranyijwe bakishyura make andi akishyurwa na Leta mu buryo bwo kubafasha kongera umusaruro.

Umwanditsi:

Mutungirehe Samuel

Tanga Igitekerezo

Email yanyu ntigaragazwa ku rubuga. Amazina na Email ni ngombwa.