20°C , Mostly cloudy | Kigali-Rwanda

Mu 2024, ishoramari mu Rwanda rizaba ringana na 31% bya GDP

Yanditswe na Ndamyirokoye François

Ku ya 15-08-2019 saa 15:22:58
Mu 2024, ishoramari mu Rwanda rizaba ringana na 31% bya GDP

Gahunda ya Guverinoma y’imyaka irindwi igamije kwihutisha iterambere, NST1, yatangiye mu 2017 ikazasozwa mu 2024. Mu rwego rw’ishoramari, Minisiteri y’Imari n’Iganamigambi (MINECOFIN), itangaza ko mu 2024 ishoramari muri rusange rizaba ringana na 31% by’umusaruro mbumbe w’Igihugu, GDP.

Ibi Imvaho Nshya yabitangarijwe mu kiganiro kihariye yagiranye n’Umuyobozi Mukuru ushinzwe imitegurire y’iterambere n’Ubushakashatsi muri MINECOFIN, Godfrey Kabera.

Kabera avuga ko nka Minisiteri y’Imari n’Igenamigambi kugira ngo bazagere kuri gahunda biyemeje, ishoramari ry’abikorera rigomba kuva kuri 14,4% ku musaruro rusange w’Igihugu, rikagera kuri 21,2%. Ishoramari rya Leta ryo, avuga ko rizava ku 8,3% rikagera ku 9,9%.

Byose hamwe kugira ngo bagere kuri iyo gahunda ya Guverinoma, yavuze ko bagomba kugera ku ishoramari rya 31% ry’umusaruro rusange w’Igihugu (GDP), ariko 2/3 bigaturuka ku ishoramari ry’abikorera.

Ni muri urwo rwego mu bijyanye n’ishoramiri Kabera yavuze ko hari byinshi Leta ikora ngo ariko ba rwiyemezamirimo nabo bafite uruhare rukomeye muri iki gikorwa.

Bityo, ngo binyuze mu bikorera hazahangwa imirimo miliyoni imwe n’igice. Kugira ngo iyo mirimo ihangwe, Kabera yasobanuye ko bizaturuka ku bikorera yaba Abanyarwanda cyangwa abaturuka mu mahanga bashora imari mu Rwanda.

Yagize ati “Ku bijyanye no guhanga imirimo turateganya ko hahangwa imiririmo miliyoni imwe n’igice. Iyo mirimo ntabwo izaturuka muri Leta izaturuka mu bashoramari yaba ari Abanyarwanda cyangwa abaturuka hanze bakorera bakorera mu Rwanda”.

Muri iri shoramari kandi, uyu muyobozi avuga ko muri iyi gahunda ya Guverinoma y’imyaka irindwi, ibyoherezwa hanze nabyo bigirwamo urahare n’abikorera bizakomeza kwiyongera, aho avuga ko nibura muri iyo myaka biyemeje ko buri mwaka bizajya bizamuka ku mpuzandengo ya 17%.

Bityo, mu kuzamura urwego rw’inganda, Kabera avuga ko zigomba kuzamuka zikava kuri 16% by’uruhare rwazo mu musaruro rusange w’Igihugu, GDP, bikazagera kuri 21,7% mu 2024.

Ubucukuzi bw’amabuye y’agaciro nabwo mu myaka irindwi ngo bugomba gutezwa imbere, bukagera ku kwinjiriza Igihugu amadolari y’Amerika miriya imwe n’igice mu 2024 buvuye kuri miriyoni 400 z’amadolari.

Ubu bucukuzi kandi nabwo bukorwa n’abikorera, nk’uko Kabera yakomeje abisobanura, ko Leta idakora ubucukuzi bw’amabuye y’agaciro, ahubwo ikora ubushakashatsi ikamenya ibiri mu butaka bishobora gukurwamo cyangwa igakora ubushakashatsi kugira ngo byongererwe agaciro.

Muri gahunda ya Guverinoma kandi biteganyijwe ko hazabaho kuzamura ishoramari mu buhinzi, inguzanyo yo gukora ubuhinzi ikazamurwa. Bityo, intego ni uko inguzanyo itangwa ku buhinzi Kabera avuga ko intego ari uko izava kuri 5,2% ikagera ku 10,4% by’inguzanyo.

Mu 2024, ishoramari mu Rwanda rizaba ringana na 31% bya GDP

Umwanditsi:

Ndamyirokoye François

Tanga Igitekerezo

Email yanyu ntigaragazwa ku rubuga. Amazina na Email ni ngombwa.