Mu 2024, Abanyarwanda miriyoni 5 bazaba barahuguwe ku ikoranabuhanga

Yanditswe na Rutayisire Emile

Ku ya 09-10-2019 saa 12:02:40
Minisitiri w'Ikoranabuhanga na Inovasiyo, Ingabire Paula

Minisiteri y’Ikoranabuhanga na Inovasiyo ifite gahunda yitwa «Intore mu Ikoranabuhanga» yo guhugura abaturage ku bumenyi bw’ikoranabuhanga ku buryo mu 2024, Abanyarwanda bagera kuri miriyoni 5 bazaba barahawe ubumenyi ku ikoranabuhanga.

Minisitiri w’Ikoranabuhanga na Inovasiyo, Ingabire Paula yabivugiye mu muhango wo gusoza amahugurwa y’iminsi 10 yahawe urubyiruko rugera ku 110 ruturutse mu turere twose tw’u Rwanda.

Yatangaje ko abahuguwe bagiye kujya mu turere bakomokamo bigishe abaturage kugira ngo bagire ubumenyi mu ikoranabuhanga ku buryo bazajya babasha kwiyakira serivisi zisaba ikoranabuhanga batavuye aho bari.

Yagize ati «Intore mu ikoranabuhanga ni gahunda ya Leta igamije kongera umubare w’abaturage bakoresha ikoranabuhanga. Ni poritiki igamije guteza imbere ubuzima n’imibereho myiza y’abaturage ku buryo n’ubwo twihaye intego yo kuba mu 2024 abaturage bazaba bamaze guhabwa ubumenyi mu ikoranabuhanga bazaba ari miriyoni 5 ahubwo tugomba no kurenza uwo mubare.»

Muri Gahunda ya Guverinoma y’Imyaka irindwi yatangiye muri 2017 izarangira muri 2024 izwi nka NST1, Guverinoma yihaye intego zo gushyiraho kigamije guteza imbere imishinga y’ikoranabuhanga no guhanga ibishya (Innovation Fund), ndetse no gufasha urubyiruko kurushaho kugira ubushobozi n’ubumenyi bwo gukoresha ikoranabuhanga.

Guverinoma yiyemeje kandi gushyira imbaga mu kubyaza umusaruro Ibigo by’icyitegererezo mu bumenyi, ikoranabuhanga no guhanga ibishya (Centers of Excellence), yiha n’umuhigo wo gushyiraho n’ibindi bigo bishya, hitabwa no ku kunoza ubufatanye bugamije guteza imbere ikoreshwa ry’ubumenyi bwihariye burimo n’ubwo mu rwego bw’ubuzima, uburezi, inganda n’umutekano w’ikoranabuhanga (Cyber security).

Mu ngamba zitezweho gutuma uruhare rwa serivisi mu byo u Rwanda rwohereza hanze rwiyongera, Guverinoma bimwe mu byo yiyemeje gukora ni uguteza imbere serivisi z’ikoranabuhanga ryo mu rwego rwo hejuru ryifashishwa mu rwego rw’imari.

By’umwihariko kuri Gahunda y’Intore mu Ikoranabuhanga, Minisitiri w’Ikoranabuhanga, Ingabire Paula, avuga ko izaziba icyuho cy’ubumenyi buke mu ikoranabuhanga kandi yongere ubumenyi mu rubyiruko kuva ku myaka 15 ku kigero cya 60%.

Nsengiyumva Emmanuel ni umwe mu bahuguwe waturutse mu Karere ka Nyamasheke, yavuze ko ubumenyi bahawe buzabafasha gusobanurira neza abaturage uburyo bwo kwaka serivisi bakoresheje ikoranabuhanga bifashishije terefoni zabo bagendana.

Yagize ati «Tuzabafasha cyane ko tuzaba turi kumwe mu kagari. Ikindi ni uko twahigiye imbere ya Minisitiri w’Ikoranabuhanga na Inovasiyo na Minisitiri w’Ubutegetsi bw’Igihugu ko tuzajya twigisha abaturage nibura 60 buri kwezi kandi bakaba bamenye neza gukoresha ikoranabuhanga mu kwaka serivisi.»

Yakomeje avuga ko abahuguwe bishimiye ko bahawe mudasobwa bazajya bifashisha mu guhugura abaturage kandi bagahabwa na Murandasi (Internet) ndetse n’amafaranga yo guhamagara (Airtime).

Minisitiri w’Ubutegetsi bw’Igihugu Prof. Shyaka Anastase asoza amahugurwa, yashimye gahunda ya Minisiteri y’Ikoranabuhanga na Inovasiyo kubera ko igiye gufasha abaturage kumenya gukoresha ikoranabuhanga rigezweho muri ibi bihe kuko kugeza ubu Abanyarwanda batunze terefoni zigendanwa ari benshi kandi hari serivisi nyinshi bashobora kwaka bakoresheje terefoni zabo bagendana.

Yagize ati «Iyi gahunda ni nziza kuko igiye guha imbaraga umuturage mu bijyanye n’ubwenge akajya yiha serivisi atavuye aho ari, bitume akoresha igihe ke neza kandi n’impapuro zakoreshwaga bajya kwaka ibyangombwa zibungabungwe.»

Yakomeje avuga ko kuba abahuguwe bahize uburyo bagiye gushyira mu bikorwa ibyo bize bizatuma intego igamijwe igerwaho. Yabasabye gukorana neza n’inzego kugira ngo ibyo bagiye kwigisha abaturage bizakorwe neza, batanga raporo y’ibyakozwe, ibikorwa uko bikorwa n’ibiteganyijwe gukorwa, ibyo bakazabigeraho neza bifashishije indangagaciro z’Abanyarwanda.

Aba bamaze guhugurwa biteganyijwe ko bazajya bakorera ku Kagari batuyemo mbere ya saa sita kugira ngo abaturage bahaje babakorere na serivisi bakeneye ndetse babigishe izo serivisi babakoreye kugira ngo na bo bage babyikorera kuri terefoni zabo, na ho nyuma ya saa sita bagire gahunda yo kujya mu baturage hanze.

Biteganyijwe ko bazajya bahabwa umwanya mu gihe cy’umuganda, mu nama zinyuranye, mu nteko z’abaturage n’ahandi kugira ngo babwire abaturage ibijyanye n’ikoranabuhanga n’uburyo bagomba gukangukira kuryiga. Iki ni ikiciro cya mbere gihuguwe ariko biteganyijwe ko buri Kagari ko mu Rwanda kazagira Intore mu ikoranabuhanga kugira ngo intego izagerweho.

Umwanditsi:

Rutayisire Emile

Tanga Igitekerezo

Email yanyu ntigaragazwa ku rubuga. Amazina na Email ni ngombwa.