28°C , Sunny | Kigali-Rwanda

Mu 2020 Sacco zose zizaba zikoresha ikoranabuhanga

Yanditswe na Twagira Wilson

Ku ya 11-09-2019 saa 06:54:26
Guverineri wa Banki Nkuru y'u Rwanda, John Rwangombwa, mu kiganiro n'abanyamakuru (Foto Mucyo R)

Mu rwego rwo kwegereza abaturage serivise z’imari binyuze mu ikoreshwa ry’ikoranabuhanga, Guverineri wa Banki Nkuru y’u Rwanda John Rwangombwa, avuga ko mu mpera z’uyu mwaka Imirenge Sacco ya mbere izakorerwamo ikoranabuhanga mu rwego rw’igerageza, ku buryo mu mwaka utaha wa 2020 Imirenge Sacco yose mu gihugu izaba ikoresha ikoranabuhanga.

Rwangombwa yabivugiye i Kigali kuwa 10 Nzeri 2019, mu kiganiro n’itangazamakuru kibanziriza inama ngarukamwaka y’Ihuriro ry’ibigo biharanira ko serivise z’imari zigera kuri benshi (Alliance for financial inclusion), akaba ari inama ihuje ibihugu bisaga 90 bigize iryo huriro harimo n’u Rwanda.

Muri icyo kiganiro n’itangazamakuru, Guverineri Rwangombwa avuga ko muri iyo nama hari byinshi u Rwanda ruzasangiza ibindi bihugu ku birebana n’intambwe rwateye mu ikoreshwa ry’ikoranabuhanga mu kugeza serivise z’imari ku baturage, hibandwa cyane ku kugabanya icyuho kiri hagati y’abagore ndetse n’urubyiruko ku birebana no kwegerezwa serivise z’imari.

Ati “Mu rwego rwo korohereza abaturage kugerwaho na serivise z’imari, ni umushinga Minisiteri y’Imari n’Igenamigambi ihuriyeho n’Ikigo k’ikoranabuhanga RISA, ku buryo mu mpera z’uyu mwaka Sacco za mbere zizakoreshwamo ikoranabuhanga mu rwego rw’igerageza, ku buryo dufite ikizere cy’uko hagati mu mwaka utaha wa 2020 imirenge Sacco yose mu gihugu izaba ikoreshwamo ikoranabuhanga bikazagabanya na bimwe mu bibazo wasangaga mu mirenge Sacco.”

Umuyobozi w’ihuriro ‘Alliance for financial inclusion’, Dr. Alfred Hannig, avuga ko iyo nama izagaruka ku ngamba n’icyakorwa mu gufasha urubyiruko ndetse n’abagore gukangukira kwitabira gukoresha serivise z’imari, ku buryo icyo cyuho kizagabanyuka.

Dr. Alfred Hannig asanga hari ikizahinduka mu guteza imbere no kongera umubare w’abakoresha serivise z’imari, cyane ko muri iyo nama ibihugu bisaga 90 bigize uwo muryango AFI, byiteze gushyira umukono ku masezerano akubiye mu itangazo bise ‘itangazo rya Kigali’.

Iyo nama mpuzamahanga ngarukamwaka ya 11 “2019 AFI global policy forum” yateguwe ku bufatanye bwa Banki Nkuru y’u Rwanda n’Ihuriro AFI, u Rwanda rukaba rwarakiriwe nk’umunyamuryango w’iryo huriro mu 2009.

Guverineri wa Banki Nkuru y’u Rwanda, John Rwangombwa, mu kiganiro n’abanyamakuru (Foto Mucyo R)

TANGA IGITEKEREZO

Leave a Reply

Your email address will not be published. Required fields are marked *