20°C , Mostly cloudy | Kigali-Rwanda

Mu 2017, umuganda winjije amafaranga miliyari 18.5

Yanditswe na MUGISHA BENIGNE

Ku ya 16-04-2018 saa 07:22:04

Umunyamabanga wa Leta muri Minisiteri y’Ubutegetsi bw’Igihugu (MINALOC) ushinzwe iterambere ry’abaturage, Harerimana Cyriaque, aratangaza ko umuganda rusange ukorwa mu mpera za buri kwezi  watanze umusaruro ungana n’amafaranga y’u Rwanda miliyari 18.5 mu mwaka ushize wa 2017.

Umuganda nk’igikorwa kigamije guhuriza hamwe imbaraga z’abaturage bagakorera hamwe igikorwa gifitiye igihugu akamaro, mu mwaka ushize hakozwe byinshi birimo imihanda, kurwanya isuri, guca amaterasi y’indinganire, kubakira abatishoboye, gusana amashuri n’ibindi.

Umuganda ugira uruhare mu iterambere ry’igihugu, ariko kandi ukanahuza abaturage, bagasabana, bakungurana ibitekerezo, bakaganira kuri gahunda za Leta

Mu kiganiro kihariye n’Imvaho Nshya, Harerimana Cyriaque yavuze ko mu mwaka ushize umuganda wari ufite agaciro k’amafaranga y’u Rwanda miliyari 18.5. Agaragaza akamaro k’umuganda, yagize ati “Nko mu ntangiriro z’ukwezi kwa 11 na 12, twari dufite ikibazo gikomeye cy’amashuri, abaturage bakigizemo uruhare, bafashije mu gikorwa cyo kuyasana, aho bitabiriye bakora ibikorwa binyuranye bafitiye ubushobozi, ibindi bikorwa na Leta, byatumye amafaranga y’iki gikorwa aba make kurusha ayagombaga gukoreshwa”.

Asanga iyo aya mafaranga aramuka avuye mu ngengo y’imari y’igihugu yari kuba ari menshi, ariko yavuye mu maboko y’Abanyarwanda kandi ngo babasha kubona agaciro k’ibyo bakora.

Harerimana avuga ko mu mezi ya mbere y’umwaka wa 2017, umusaruro wavuye mu muganda wari miliyari 9 zirengaho gato z’amafaranga y’u Rwanda, mu gihe mu mezi atandatu ya nyuma ya 2017, umusaruro wavuye mu muganda wari miliyari 9.5. Ushyize hamwe iyo mibare, umuganda watanze umusaruro ungana na miliyari 18.5 z’amafaranga y’u Rwanda mu mwaka wose wa 2017, nkuko bivugwa na Harerimana Cyriaque.

Ati “Umusaruro washoboraga kuba uruta uwo twabonye mu mwaka wa 2017 iyo umuganda w’ukwezi wa 12 uba warakozwe, ariko ntawabaye kuko twasabye abaturage kuwukorera mu ngo iwabo n’ahantu hahurira abantu  benshi mu rwego rwo kwitegura iminsi mikuru isoza umwaka.”

Ku kijyanye n’umuganda w’abafite ubumenyi bwihariye bashobora gukorera umuganda hamwe byaratangiye, atanga urugero rw’igikorwa abasirikare bakora mu cyumweru kiswe ‘Army week’, aho bavuye amaso, indwara z’umutima n’izindi.

Ati “Turifuza ko bimanuka bikajya no mu yindi myuga, nk’abafundi ba kabuhariwe. Twabikoze mu gihe cyo kubaka amashuri, dufata abafundi tubaha aba enjenyeri barakorana, twubaka ibyumba by’amashuri byinshi kurusha ayari kubakwa hakoreshejwe ingengo y’imari ku mirimo yose.”

Umunyamabanga wa Leta muri MINALOC, Harerimana, avuga ko ikigenderewe ari ugushaka abantu bafite ubumenyi muri buri kiciro bakaganiriza abantu mu bintu binyuranye nk’abafite ubumenyi mu mirire, bakigisha ababyeyi guteka indyo yuzuye, bakaganirizwa ku bibi byo kurarana n’amatungo n’ibindi.

Ati “Birasaba gushyira imbaraga mu bumenyi bunyuranye bakadufasha kwigisha abaturage no kubafasha guhindura imyumvire”.

Harerimana yemeza ko hari ibibazo by’imyumvire bikiri mu baturage, nko kurarana n’amatungo, kurwaza bwaki, kwishyura mituweli n’ibindi, hakaba hakenewe ko habaho ubukangurambaga bw’abantu bafite ubumenyi bwihariye muri buri kiciro bakaganiriza abaturage kugira ngo iyo myumvire ihinduke.

Bamwe mu baturage bamaze kugira imyumvire ihanitse ku gikorwa cy’umuganda, bakaba bawitabira ntawubagiye inyuma, hakaba n’abandi bagiseta ibirenge mu kuwukora, ariko ubukangurambaga buzakomeza gutuma imyumvire ihinduka n’abo bake bitabire neza.

Mugwiza Theogene, ni umuturage wo mu murenge wa Kacyiru, Akarere ka Gasabo, avuga ko abaturage bagomba kwitabira umuganda kuko ari itegeko ariko na none ngo bagombye kuwufata nk’ibikorwa bibafitiye akamaro kandi biteza imbere aho batuye.

Mugwiza ariko avuga ko hakiri abaturage bafite imyumvire iri hasi kuko usanga bihishahisha ngo badakora umuganda, cyangwa bagategereza ko abayobozi baza kubashaka ngo bawukore, mu gihe bitari bikwiye urebye ikerekezo u Rwanda rurimo.

TANGA IGITEKEREZO

Leave a Reply

Be the First to Comment!

avatar