Moto zisaga 10000 ziraba zahawe mubazi bitarenze Mutarama 2020

Yanditswe na Sezibera Anselme

Ku ya 02-12-2019 saa 17:29:52
Hagiye kunozwa imigendekere myiza Moto zisaga 10 000 zishyirwamo ikoranabuhanga rya Mubazi

Ku bufatanye bwa kampani 2 zikora iby’ikoranabuhanga rikoreshwa mu binyabiziga haba mu kugabanya umuvuduko rizwi nka ‘Speed Governor’ ndetse no kwishyura hifashishijwe mubazi, moto  zisaga 10.000 muri Kigali zigiye gushyirwamo mubazi bitarenze Mutarama 2020 mu gihe iyo gahunda ireba izigera ku 36.000.

Ibyo byatangarijwe mu muhango wo gusinya amasezerano y’ubufatanye hagati ya ‘Pascal Technology Ltd’ imenyerewe mu Rwanda mu gushyira utugabanyamuvuduko mu binyabiziga, hamwe na ‘ATLON Rest of Africa’ yo muri Afurika y’Epfo nayo ikora serivisi zijyanye no gushyira ikoranabuhanga mu binyabiziga, kuri uyu wa 02 Ukuboza 2019.

Mubazi, GPS, n’ikoranabuhanga ribikoresha rya Soft bizashyirwa muri moto, ngo bigamije kugira ngo habeho gukurikirana moto igihe zagize ikibazo, ibyo bikaba ari byo bizifashishwa mu mafaranga ‘ALTRON Rest of Africa’ yahaye ‘Pascal Technology Ltd’.

Umuyobozi Mukuru wa ‘Pascal Technology Ltd’ Ndizeye Pascal, avuga ko miriyoni 18 z’amadorari, ni ukuvuga asaga miriyani 16 z’amafaranga y’u Rwanda ‘Pascal Technology’ yahawe na kampani ya ‘ALTRON Rest of Africa’, azifashishwa mu kugura mubazi, GPS n’ikoranabuhanga rya Soft rigomba gushyirwa muri moto kandi zikazanakoreshwa mu bijyanye n’ibikorwa byo gufungura amashami atandukanye mu gihugu ngo hongerwe serivise batanga.

Agira ati: “Terefone zizashyirwa kuri izo moto zisaba ubushobozi bwinshi kuko zigomba kuba zitinjiramo ivumbi, amazi kandi zitameneka, akaba ari yo mpamvu twiyemeje ko nko mu mujyi wa Kigali gusa kugera mu mpera za Mutarama 2020 tugomba kuba twamaze gushyiraho terefone za mubazi 10.000. Murumva rero ko kugira ngo turangize gushyiramo izigera ku 36.000 bikidusaba imbaraga nyinshi cyane cyane ko anaje yiyongera ku yacu dusanganywe kandi batwemereye kuzatwongera andi mu gihe tugaragaje ko tuyakeneye.”

Ndizeye yongeraho ko kugeza ubu biyemeje kugera muri Werurwe 2020 nibura bafite amashami 35 yose mu gihugu ndetse no gushaka abakozi bahagije bafite ubuhanga bagomba kubafasha.

Ndizeye avuga ko impamvu yatumye badatangira vuba ibyo bikorwa, ari amikoro make  ni muri urwo rwego atangaza ko kuva basinyanye amasezerano y’imikoranire na kampani nyafurika yitwa “Altron”, ibikoresho byinshi by’ibanze byamaze kugera mu Rwanda, yizeza ko mu cyumweru gitaha biteguye gutangira aho umumotari wese ahamagarirwa kugana aho ibiro by’iyo kampani biherereye ku bamaze kwiyandikisha bagera ku 7059 hanyuma bagahabwa iryo koranabuhanga.

Mu kiganiro kigufi Ndizeye yagiranye n’itangazamakuru yemeranya n’abamotari ko mubazi zari zaramaze gutangwa zivugwaho kwangirika vuba, agaragaza ko bimaze kugaragara gutyo habayeho kuzigerageza koko ariko amara impungenge ko izi zazanwe kuri iyi nshuro nyuma y’iryo suzumwa ari nshyashya, zifite ubudahangarwa bwo kwinjiramo amazi n’ivumbi kandi zishobora no gukora neza mu mihanda yo mu Rwanda.

Nk’uko akomeza abisobanura mu biganiro bagiranye n’abamotari bifuje ko izo mubazi bazajya bazifata nk’inguzanyo noneho bakajya bazishyura buhoro buhoro ariko haba n’abandi biyemeje kuba bahita barangizanya nayo.

Agira ati: “Uyu munsi igiciro cyashyizweho na RURA byaba ari kuri GPS, kuri mubazi n’ikoranabuhanga ririmo rya Soft byose ni amafaranga 200.200, ibyo bikaba bireba ufashe mubazi ku buryo bw’inguzanyo, ariko wa wundi wifuza kwishyura amafaranga ako kanya hakazabaho kumvikana ibiciro.”

Ndizeye asobanura neza ko ayo mafaranga miriyoni 18 z’amadorari bahawe atari inguzanyo ahubwo ari ubufatanye bwa kampani ebyiri kugira ngo zirusheho gutanga serivise neza kandi zinoze.

Umuyobozi Mukuru  ushinzwe kunoza ingendo no gutanga ibyangombwa muri MININFRA (Minisiteri y’Ibikorwaremezo), Zirikana François, avuga ko mu gushyira mu bikorwa gahunda za Leta bagira abafatanyabikorwa bafatanya, agasobanura ko abamotari bari baramaze kwiyandikisha icyari gisigaye cyari ukureba niba ibijyanye n’ibikoresho bya mubazi kuri moto byaba bihari kandi bihagije.

Zirikana avuga ko ubwo habonetse abafatanyabikorwa batandukanye bagiye kwicara bakarebera hamwe umubare w’izo bafite, umubare wa moto zikeneye guhabwa iyo serivise no kureba igihe byatwara ngo bibe bimaze gushyirwamo.

Ati: “Nitumara kureba ubushobozi bw’abo bafatanyabikorwa bafite bwo gutanga ibyo bikoresho ni bwo tuzamenya abo tuzaheraho kandi turizeza abamotari ko nta gihombo bazagwamo keretse abatazifuza kubahiriza ibisabwa ngo bafashwe gukora neza.”

Zirikana agaragaza ku cyo ibyo bikoresho n’iryo koranabuhanga bije gukemura, avuga ko bamaze kuvugana n’ikigo kihariye k’ingoboka, basanze abamotari benshi baba nta bwishingizi bafite, agaragaza ko mu gihe iryo koranabuhanga rizaba rimaze gutangira gukoreshwa kuri moto, hazajya hamenyekana uwamaze ubwishingizi, umumotari udafite ibyangombwa atazajya yemererwa gutwara moto kubera ko mubazi izajya ihabwa umuntu ufite ibyangombwa hanyuma kandi uwakoze amakosa mu muhanda akiruka na we azajya abasha gukurikiranwa kandi akamenyekana, ibyo agasanga ari umwe mu musaruro w’iryo koranabuhanga.

Ndizeye nawe ashimangira ko umusaruro uzanagera ku batega moto kuko bazajya babasha kwishyura bitagombye guciririkanya n’abamotari kuko bizajya biba byigaragaza urugendo bakoranye n’ibiciro byibara mu buryo bworoshye, ndetse avuga ko nyuma y’umunsi w’isinywa ry’amasezerano yabaye iminsi ikurikiraho umumotari wabishobora biteguye kumuha iyo serivise kuko ibikoresho bihari.

Umuyobozi Mukuru wa ‘ALTRON Rest of Africa’ Ike Dube, avuga ko biteguye gufatanya na kampani zo mu Rwanda zikora ibijyanye no gushyira ikoranabuhanga muri moto kandi uyu mwaka wa 2020 uzagaragaza impinduka nziza mu gutuma bagera ku ntego bihaye.

Icya kabiri avuga ko biyemeje gufatanya na kampani yo mu Rwanda kugira ngo habeho kubaka ibijyanye n’umutekano wo mu muhanda ndetse no gufasha ibihugu by’Afurika gukora bizinesi imeze neza kandi ituma habaho kwihutisha serivisi abantu batavunitse.

Nyuma y’uwo muhango MININFRA yijeje izo kampani ubufatanye haba mu bitekerezo no mu bikorwa kugira ngo mu Mujyi wa Kigali no mu ntara serivise z’ingendo zikomeze kugenda neza.

Umwanditsi:

Sezibera Anselme

Tanga Igitekerezo

Email yanyu ntigaragazwa ku rubuga. Amazina na Email ni ngombwa.