17°C , Partly sunny | Kigali-Rwanda
Abakobwa 6 bemerewe guhagararira Intara y'Uburengerazuba

Miss Rwanda 2018: I Rubavu 6 babonetse bibanje kugorana

Yanditswe na NDAMYIROKOYE FRANÇOIS

Ku ya 16-01-2018 saa 08:12:41

Ubwo hashakwaga abakobwa bagomba guhagararira intara y’Uburengerazuba mu irushanwa rya Miss Rwanda 2018 mu gikorwa  cyabereye mu mujyi wa Rubavu ku ya 14 Mutarama 2018 hatoranyijwe 5  babiri bari basigaye bongera kubazwa ibibazo kugira ngo habonekemo uwa gatandatu.

Abakobwa 6 bemerewe guhagararira Intara y’Uburengerazuba

Abongeye  kubazwa ni uwitwa  Umukundwa Divine na  Iradukunda Liliane  gusa ukubazwa gusojwe  Iradukunda ni we  watsinze yuzuza   umubare w’abari bakenewe.

Ukubazwa kw’aba bakobwa bombi kongeye gukorwa nyuma y’uko  abakobwa bose uko bari  7 banyuze imbere y’akanama nkemurampaka babazwa ibibazo  binyuranye birimo icyatumye buri wese yiyemeza kwitabira irushanwa rya Miss Rwanda n’icyo  yakora aramutse yegukanye ikamba.

Nyuma y’uko abakobwa  bapimwe ibilo  n’uburere nkenerwa bwa  metero 1 na santimetero 70 busanzwe busabwa no mu  marushanwa y’ubwiza yo ku rwego mpuzamahanga, hafi saa cyenda z’umugoroba ni bwo abakobwa banyuze imbere y’anakama nkemurampaka barabazwa.

Abantu batandukanye bari bagiye kureba icyo gikorwa

Basoje kubazwa bose uko bari barindwi ni bwo akanama nkemurampaka katanyuzwe n’uko Iradukunda na Umukundwa bari basubije hafatwa umwanya wo kongera kubabaza  basoje hasomwa batandatu bari bemerewe gukomeza mu irushanwa.

Abakobwa batandatu batsindiye guhagararira Intara y’Uburengerazuba muri iri rushanwa ni  Iradukunda Liliane ufite uburebure bwa metero imwe na santimetero 70 ndetse n’ibilo 57, Neema Nina ufite metero 1 na santimetero 71 n’ibilo 54, Uwase Fiona ufite uburebure bwa metero imwe 1 na santimetero 70 akaba afite ibilo 55, Isimbi Chanelle ufite uburebure bwa metero imwe na santimetero 75 n’ibilo 55, Uwimbabazi Aliance ufite  uburebure bwa metero imwe na santimetero 70  n’ibilo 60   n’uwitwa Gacukuzi Belyse ufite  uburebure bwa metero imwe na santimetero 70 n’ibilo 54 .

Nubwo ari batandatu batowe ariko hari hariyandikishije abakobwa 10 muri iyo ntara hitabira 8 ariko barindwi aba ari bo  buzuza ibisabwa barahatana.

Dr. Higiro avuga ko ibigenderwaho mu gutanga amanota byose byuzuzanya

Mu 2017 muri iyi ntara hari hariyandikishije abakobwa 21.

Isheja Sandrine uyoboye akanama nkemurampaka k’iri rushanwa yashimiye abakobwa baryitabiriye yibutsa kandi ko kugira ngo umukobwa atsinde hagenderwa   ku bwiza, ubwenge ndetse n’umuco.

Dr Higiro Jean Pierre na we wari mu kanama nkemurampaka yatangaje ko ibigenderwaho mu irushanwa byose byuzuzanya umukobwa atabura kimwe ngo atsinde.

Gacukuzi Belyse umwe mu batsinze yatangarije Imvaho Nshya ko yishimiye gutsinda kwe ngo kandi aramutse yegukanye ikamba yakora umushinga watuma imirimo irushaho kwiyongera.

Yagize atiNishimiye kuba natsinze kandi ninzabasha kuba nyampinga w’u Rwanda nzakora umushinga uzatuma imirimo yiyongera.”

Avuga kandi ko yazakora ibikorwa byinshi kurusha abandi banyampinga batambutse ngo nubwo atagaya ibyo  bakoze.

Uwimbabazi Aliance  na we wabashije gutsinda yavuze ko ashimira abamwongereye imbaraga akajya mu irushanwa ngo kandi ashimira n’Imana yamufashije gutsinda.

Ashimangira kandi ko yiteguye gukomeza kwitwara neza mu irushanwa kuko yifitiye ikizere.

Atsindiye ikamba yavuze ko yakora umushinga warushaho guteza imbere ubuhinzi.

Ku ya 13 Mutarama 2017 iri rushanwa ryatangiriye mu karere ka Musanze mu Ntara y’Amajyaruguru naho hatsinda 6 ari  bo Usanase Shamim Irene, Umutoniwase Paula, Ishimwe Belly Stecy, Irebe Natacha Ursule, Umuhoza Linda na Ingabire Divine.

Mu mpera z’iki cyumweru iki gikorwa kizakomereza mu Ntara y’Amajyepfo mu karere ka Huye ndetse no Ntara y’Uburasirazuba mu karere ka Kayonza.

 

 

TANGA IGITEKEREZO

Leave a Reply

Your email address will not be published. Required fields are marked *