26°C , Partly sunny | Kigali-Rwanda
Abakobwa bose batsinze mu ntara no mu Mujyi wa Kigali

Miss Rwanda 2018: Haramenyekana 20 bajyanwa mu mwiherero

Yanditswe na NDAMYIROKOYE FRANÇOIS

Ku ya 03-02-2018 saa 09:46:58

Uyu munsi ku itariki  3 Gashyantare 2018 i Gikondo ahazwi nka Expo Ground harabera igikorwa cyo guhitamo abakobwa 20 bahiga abandi muri 35 batowe  mu ntara n’Umujyi wa Kigali mu irushanwa rya Miss Rwanda 2018. Abatorwa barahita bajyanwa mu mwiherero.

Abakobwa bose batsinze mu ntara no mu Mujyi wa Kigali

Abo bakobwa bose baraza gutoranywa nyuma y’uko ku ya  27 Mutarama 2018  i Kigali habaye igikorwa cyo guha abakobwa bose numero  zibaranga mu irushanwa bagiye batorwaho hifashishijwe telefone ngendanwa.

Ku rukuta rw’urubuga rwa Instagram rw’irushanwa rya Miss Rwanda ejo hashize hari hashyizweho  amakuru avuga ko uwari uwa mbere mu gutorwa cyane yari umukobwa witwa Uwase Ndahiro Liliane wari watowe inshuro 24539 akurikirwa n’uwitwa  Mushambokazi Jordan wari ufite amajwi 21765.

Irebe Natacha Ursule we yari ku mwanya wa gatatu yaratowe inshuro10317, Neema Nina we  yari  yaratowe inshuro 7414, Umunyana Shanittah 6073, Ingabire Divine 5526, Umutoniwase Paula 4459, Ishimwe Belly Stecy 4320, Uwonkunda Belinda 4236, Umuhire Rebecca 4190, Umutoni Belise 3653 naho  Iradukunda Liliane we yari yatowe inshuro  3514.

Abandi uru rubuga rwagaragaje uko batowe nkuko bashyizeho 15 batowe cyane ni  Uwineza Solange wari umaze gutorwa inshuro 2774, Ikirezi Mpore Marie Wivine 2245 na Umutoni Fidela wari umaze gutorwa inshuro 2165.

Ku rundi ruhande nubwo aba ari bo  bahigaga abandi mu majwi birashoboka cyane ko atari bo baza kuza mu myanya y’imbere kimwe n’uko hashobora kubonekamo n’abataza kuboneka muri abo 20  bitewe n’ibibazo binyuranye baza kubazwa.

Abakobwa bose baza gutoranywamo  20 ni Usanase Shamim Irene, Umutoniwase Paula, Ishimwe Belly Stecy, Irebe Natacha Ursule, Umuhoza Linda na Ingabire Divine batsinze mu Ntara y’Amajyaruguru, Uwimbabazi Aliance, Iradukunda Liliane, Neema Nina, Isimbi Chanelle na Gacukuzi Belyse batsinze mu Ntara y’Iburengerazuba naho  mu ntara y’Amajyepfo ho hatsinze Dushimimana Lydia, Irakoze Vanessa, Ishimwe Noriella, Ikirezi Mpore Marie Wivine, Nzakorerimana Gloria, Umunyana Shanitah, Umuhire Rebecca, Uwase Ndahiro Liliane, Mushambokazi Jordan ndetse na Umutoniwase Anastasie.

Iradukunda Elsa ufite ikamba rya Miss Rwanda 2017

Mu ntara y’Iburasizuba hatsinze uwitwa  Umutoni Charlotte, Munyana Shemsa, Uwineza Solange, Umutoni Fidela, Umwali Lindah na Bampire Diane,  mu Mujyi wa Kigali ho hatsinze  Teta Shalon, Kayirebwa Marie Paul, Uwonkunda Belinda, Uwase Teta Anita, Ingabire Belinda, Umuhoza Karen na Umutoni Belise.

Abaza gutoranywa 20 bazahita berekeza mu mwiherero i Nyamata ku ya 24 Gashyantare 2018 abe ari bwo i Kigali muri Kigali Convention Centre hazaba ibirori bizamenyekaniramo uzegukana ikamba nyamukuru.

Kuba hazajyanwa mu mwiherero abakobwa 20 ni imwe mu mpinduka iri muri iri rushanwa ry’uyu mwaka kuko mu myaka yatambutse hajyanwagamo abakobwa 15.

Ishimwe utegura irushanwa rya Miss Rwanda

Mu Ntara zose kandi n’Umujyi wa Kigali mbere hatoranywaga abakobwa 25.

Uzegukana ikamba azasimbura Miss Iradukunda Elsa ufite ikamba rya Miss Rwanda 2017. Ishimwe Dieudonné uzwi nka Prince Kid ni we uyobora Rwanda Inspiration Back Up itegura ikanashyira mu bikorwa irushanwa rya Miss Rwanda.

 

 

TANGA IGITEKEREZO

Leave a Reply

Be the First to Comment!

avatar