21°C , Partly sunny | Kigali-Rwanda
Nyampinga w’u Rwanda 2019, Nimwiza Meghan

Miss Nimwiza yasabye urubyiruko kubaka u Rwanda ruzira amacakubiri

Yanditswe na Ndamyirokoye François

Ku ya 12-04-2019 saa 06:21:05

Nimwiza Meghan, Nyampinga w’u Rwanda 2019 ubwo yasuraga Urwibutso rwa Ntarama yasabye urubyiruko kubaka u Rwanda ruzira amacakubiri.

Uyu nyampinga kandi yabasabye kurushaho kubaka u Rwanda ariko nako busa ikivi cy’abishwe muri Jenoside yakorewe Abatutsi.

Nyampinga Nimwiza ibi yabitangaje nyuma yo gusura urwo rwibutso ruherereye i Nyamata mu Karere ka Bugesera.

Uyu nyampinga yihanganishije kandi abanyarwanda muri ibi bihe bikomeye byo kwibuka ku nshuro ya 25 Jenoside yakorewe Abatutsi. Avuga ko ari igihe cyo kuzirikana no guha agaciro abishwe muri Jenoside bazizwa uko bavutse.

Ati “Icya mbere na mbere ni ukubihanganisha muri ibi bihe bitoroshye tuba turimo nk’u Rwanda nk’Abanyarwanda”.

Yavuze ko mu gihe cya Jenoside hari urubyiruko rwishwe ndetse abana batari bazi icyo ubwoko ari cyo na bo baricwa..

Ati “Rero icyo nabwira abanyarwanda cyane cyane urubyiruko ni uko tugomba gukoresha imbaraga nyinshi mu kubaka u Rwanda hari ikigero cy’abantu tudafite ubu ng’ubu twakabaye dufite. Tugomba gukoresha imbaraga inshuro ebyiri cyangwa eshatu kurenza”.

Yunzemo agira ati “Tugomba gukoresha imbaraga zacu bwite, tugakoresha iz’abo bana bishwe tugakoresha ndetse n’izabo bakabaye babyara”.

Yavuze ko ibyo yabonye ku rwibutso rw’i Ntarama bigaragara ko Jenoside yakoranywe ubugome bw’indengakamere. Nimwiza Meghan yambitswe ikamba rya Nyampinga w’u Rwanda 2019, ku wa Gatandatu tariki 27 Mutarama 2019.

Nimwiza Meghan yambitswe ikamba asimbuye Miss Iradukunda Liliane wari ufite ikamba rya Miss Rwanda 2018.

Imanishimwe Yvette, umuyobozi w’Akarere ka Bugesera wungirije ushinzwe imibereho myiza y’abaturage (iburyo) hamwe na Nyampinga w’u Rwanda wa 2019, Nimwiza Meghan, ku Rwibutso rwa Ntarama

TANGA IGITEKEREZO

Leave a Reply

Your email address will not be published. Required fields are marked *