17°C , Mostly cloudy | Kigali-Rwanda
Miss Iradukunda Elsa

Miss Elsa arishimira umusaruro w’umushinga we wo kuvuza abarwaye ishaza

Yanditswe na Tumukunde Georgine

Ku ya 18-05-2019 saa 16:58:41

Nyampinga w’u Rwanda 2017 Iradukunda Elsa aratangaza ko atewe ishema n’umusaruro utangwa n’umushinga we wo kuvuza abantu barwaye indwara y’ishaza, akanashimira abafatanyabikorwa bamufasha kugira ngo iki gikorwa kigende neza.

Mu kiganiro n’Imvaho Nshya yatangaje ko iki gikorwa ari ngarukamwaka, aho muri uyu mwaka cyabereye mu Karere ka Huye mu Ntara y’Amajyepfo, akaba yaravuje ishaza abagera kuri 300.

Akaba yaragitangiye mu mwaka wa 2017, icyo gihe havuwe abagera kuri 350 mu Karere ka Rubavu na ho mu mwaka wa 2018 havurwa abagera kuri 400 mu Karere ka Nyamagabe.

Yagize ati: “Ni igikorwa nishimira, cyagenze neza, uyu mwaka, twagitangiye mu ntangiriro z’ukwezi kwa kane, aho havuwe abantu bagera kuri 300, ni igikorwa nkora buri mwaka, muri uyu mwaka cyararangiye ariko kizakomeza mu wundi mwaka”.

Miss Iradukunda yakomeje asobanura ko igikorwa giheruka cyamaze ibyumweru bibiri, aho mu cyumweru cya mbere habayeho kuzenguruka ku bigo nderabuzima hashakwa abantu barwaye ishaza, icyumweru cyakurikiyeho cyari icyo kuvura abarwaye iyo ndwara, bakaboza amaso, bakabaha n’imiti.

Ati: “Nkorana n’abaganga b’inzobere bo mu Bitaro bya Kabgayi biherereye mu Karere ka Muhanga. Ni abafatanyabikorwa nshimira cyane kuko gufata ibikoresho byose, ukajya kumara icyumweru ahantu ukavura abantu bagera kuri 300, ndabibashimira cyane, kuko iyo batahaba sinzi ko iki gikorwa nari kukigeraho nk’uko mbyifuza”.

Yagarutse ku mpamvu yatumye ahitamo umushinga wo kuvuza abarwaye ishaza agira ati: “Mfite n’ indi mishinga itandukanye nkora nkayifatanya no kwiga, ari ko mu rwego rw’ubuvuzi nahisemo uriya wo kuvuza abantu ishaza.

Ngewe akenshi nkunze kugira umwanya wo kuganira n’abantu bakuze,… naganiriye n’umuganga ambwira ko 50% by’abantu babana n’ubumuga bwo kutabona mu Rwanda ari ukubera ishaza, kandi nyamara ari indwara ivurwa igakira mu minsi itarenze 15”.

Yakomeje avuga ko ibyo byamuteye gutekereza icyo yakora nka Nyampinga ushobora kugira aho akomanga akabona abafatanyabikorwa, akareba umusanzu yatanga kugira ngo abantu barwaye iriya ndwara bage bitabira kwivuza.

Nk’uko yabigarutseho, afatanyije n’abafatanyabikorwa bafata umwanya uhagije wo gukora ubukangurambaga bashaka abarwaye ishaza kuko usanga bamwe bavuga ko bahumye byarangiye batavurwa ngo bakire, abandi bakumva ko ari amarozi.

Ati: “Ni yo mpamvu nkorana n’Ibitaro bya Kabgayi kugira ngo tubakangurire bitinyuke, bumve ko bavurwa bagakira bakongera kubona, usanga ari igikorwa kigenda neza kuko uko abantu biyandikishije ari ko baza kwivuza”.

Nyampinga w’u Rwanda 2017 Iradukunda Elsa arateganya ko mu ntangiriro z’umwaka utaha azongera gukora igikorwa cyo kuvuza abantu ishaza, akaba anasaba abavuwe gukangurira abandi barwaye bakivuza.

Yakomeje agira ati: “Nasaba n’abataragerwaho n’ubu buvuzi kwitegura kuko batahiwe umwaka utaha kandi n’abavuwe badufashe gukora ubukanguramabaga kugira ngo abantu bumve ko indwara y’ishaza ivurwa igakira.

Ndashimira n’Abanyarwanda muri rusange bagenda baduha ibitekerezo kuri uyu mushinga, na ba Nyampinga bose dufatanya”.

Avuga ko uyu mushinga wo kuvuza abantu ishaza azakomeza kuwushyiramo imbaraga.

Miss Iradukunda Elsa

 

TANGA IGITEKEREZO

Leave a Reply

Your email address will not be published. Required fields are marked *