18°C , Mostly cloudy | Kigali-Rwanda

Miriyari zisaga 44 zizakoreshwa muri VUP mu 2019/2020

Yanditswe na Mutungirehe Samuel

Ku ya 27-10-2019 saa 17:04:00
Umuyobozi w’Ishami rishinzwe gahunda zo kurengera abatishoboye mu kigo gishinzwe guteza imbere ibikorwa by'iterambere mu nzego z'ibanze, LODA, Gatsinzi Justin, aganira n'Imvaho Nshya kuri gahunda ya VUP (Foto Samuel

Umuyobozi w’Ishami rishinzwe gahunda zo kurengera abatishoboye mu kigo gishinzwe guteza imbere ibikorwa by’iterambere mu nzego z’ibanze (LODA) Gatsinzi Justin yatangaje ko muri uyu mwaka w’ingengo y’imari 2019/2020 ibizakorwa muri gahunda ya VUP bigenerwa abari mu kiciro cya mbere cy’Ubudehe bizatwara amafaranga y’u Rwanda miriyari zisaga 44 ( Frw 44 538 952 220).

Mu kiganiro n’Imvaho Nshya, Gatsinzi yavuze ko muri gahunda ya Guverinoma y’imyaka irindwi NST1, hari ibyasabwe gahunda zo kurengera abatishoboye zirimo na gahunda ya VUP igira uruhare rwihuse mu guhindura imibereho y’abaturage bakennye.

Muri byo harimo kureba icyakorwa mu gihe abaturage bahuye n’ibiza, aho ubuzima bw’umuturage wari wifashije ku kigero runaka, ikiza cyaza kikaba cyahungabanya ubukungu n’imibereho ye bikaba ngombwa ko ahabwa uburyo bwatuma hari aho akura ibimubeshaho by’ibanze cyane nko mu mirimo ikorwa muri gahunda ya VUP.

Akomeza avuga ko hari n’ibigomba gukorwa kugira ngo hakorwe ibikorwa byo kurengera ibidukikije, hakumirwa ibiza mu bihe bizaza kugira ngo bitazongera gusubiza abantu mu buzima bubi, hakorwa ibyo bikorwa mu duce dukunze kwibasirwa n’ibiza.

Hakaza n’ibindi bijyanye no gufasha ababyeyi badashobora gukora imirimo y’amaboko nko guharura imihanda no kurema indi kubera uburemere bw’inshingano zo kurera umwana muto cyane, n’imirimo yo kwita ku ngo mbonezamikurire na yo yongewemo.

Ati: “Muri byose kubishyira mu bikorwa, ubu twavuga ko uyu mwaka nka bibiri bya gatatu (2/3) by’imishinga yagenewe abaturage (public works) biri mu kurengera ibidukikije. Ariko nanone tubisabwe n’ihuriro ry’abari mu rwego rw’inzego za Leta zita ku buzima, basabye ko kugira ngo dushobore gushyira mu bikorwa ibyo dusabwa na NST1 twakora inyigo. Ubu navuga ko ibikenewe byarangiye, ubu hakaba hari gutangwa isoko, rizatangwa n’umufatanyabikorwa wa PAM.

Ibyo byose bifite ingengo y’imari igera nko kuri miriyari 44, ni ingengo y’imari y’uyu mwaka wa 2019/2020.”

Muri gahunda yo kurengera abatishoboye kandi harimo ko mu miryango usangamo umugore cyangwa umugabo wenyine ari we ufite mu nshingano abo bana kimwe n’aho usangamo abana benshi bato bisaba ibintu byinshi byo kubitaho bashyiriweho imirimo y’amaboko yoroheje (expended public works) aho bajya mu bikorwa byoroheje biri hafi y’umuryango we na byo bisaba ko abikora amasaha make akajya kwita kuri ba bana.

Iyo gahunda iri mu mirenge 225 mu gihugu, ikaba igizwe n’ibikorwa birimo ibyo kwita ku isuku muri ya mihanda y’imigenderano ibegereye yakozwe muri gahunda ya VUP no kujya mu ngo mbonezamikurire bagahabwayo akazi ko kwita ku bana barererwamo.

Ku mugore utwite cyangwa ufite umwana uri hasi y’imyaka ibiri muri gahunda ya “cash transfers” harimo uburyo bwo kwita ku mibereho y’uwo mwana “Nutrition sensitive direct support”, aho ingo zikennye zirimo umwana uri munsi y’iyo myaka zigenerwa amafaranga 7 500 ku kwezi, akaza mu mezi atatu, gusa na we agasabwa kwisuzumisha mu gihe atwite, kujyana umwana kwa muganga ngo akurikirwanwe ku nkingo n’ibindi na byo biri gukorwa mu mirenge igera kuri 275.

Umuyobozi w’ishami rya gahunda yo kurengera abatishoboye Gatsinzi Justin, ashimangira ko mu 2024 hakurikijwe gahunda zihari zo kurandura ubukene no kwita ku bari mu byiciro by’abatishoboye, ubukene  buzaba bwararwanyijwe ku gipimo kiri hafi kugera nko kuri zeru.

Ubushakashatsi ku mibereho y’ingo (EICV 5) bwo mu 2015 bwagaragaje ko hari ingo zikuye mu bukene, harimo abo VUP yafashije kwikura mu bukene bangana na 15%. Nyuma kubera ibiza n’ibindi bibazo byageze ku baturage bikabasubiza inyuma, abagera kuri 13% bari babayeho neza baje gusubizwa inyuma na byo.

Umwanditsi:

Mutungirehe Samuel

Tanga Igitekerezo

Email yanyu ntigaragazwa ku rubuga. Amazina na Email ni ngombwa.