19°C , Mostly cloudy | Kigali-Rwanda

MINISPORTS  yemeje ko iterambere rya siporo rigiye gushingira  ku bakiri bato

Yanditswe na BUGINGO FIDELE

Ku ya 18-09-2020 saa 23:42:32
Kugira ngo siporo iterimbere bigomba guhera mu bakiri bato

Minisiteri ya Siporo “MINISPORTS”  yashyizweho mu Gushyingo 2019 ihabwa inshingano  zirimo kubaka inzego za siporo no gushyiraho imirongo migari y’imikorere n’imikoranire n’inzego za siporo.

Iyi Minisiteri kandi ifiye inshingano  yo guteza imbere siporo  no gushyiraho ingamba  zo kugira ngo iterambere rya siporo rigerweho mu gihugu siporo ibe rumwe mu nzego ziteza imbere ubukungu bw’igihugu ndetse inahindure n’ubuzima bw’abayirimo.

Umunyamabanga Uhoraho muri MINISPORTS, Shema Maboko Didier  atangaza ko ubu bamaze gukora inyandiko ya poritiki ya siporo ivuguruye isimbura iyo muri 2012 yarangiye muri 2015. Ati “Twakoranye n’amashyirahamwe y’imikino ndetse n’abandi bafatanyabikorwa  kuri iyi poritiki y’iterambere rya siporo tuzakurikiza kuva muri 2020 kugeza muri 2030.”

Muri iyi gahunda,  Shema agaragaza ko ibyo bashyize imbere ari  iterambere rya siporo rishingiye mu bana aho bakoze uburyo butandukanye  bwo gukora gahunda y’iterambere rya siporo ishingiye mu bana igomba gukorwa.

Yagize ati : “ Hari  uguhuza amashyirahamwe y’imikino itandukanye  agakorana  n’ishyirahamwe  ry’imikino mu mashuri  kugira ngo ba bana abenshi cyangwa hafi ya bose  bari mu mashuri bakorerwe  gahunda zihamye kandi  zizaduha umurongo w’iterambere rya siporo  kugira ngo tuzabone umusaruro.”

Akomeza avuga ko  bazarebera kuri gahunda zari zarakozwe mbere ariko banakosore kugira ngo habeho  gahunda zihamye, ikindi ni uko bagomba gushyiraho porogaramu mu mashuri zizaba zifite uburyo  aho abana bakina mu byiciro byabo by’imyaka kugira ngo bamenyerezwe imikino.

Kuri iyi ngingo,  Shema Maboko Didier ashimangira ko bagomba gushishikariza amashyirahamwe y’imikino  gushyiraho amarushanwa y’abana bato hakabaho n’amarushanwa ahoraho y’abakuru  kugira ngo  habeho  abakinnyi bashobora kujya mu marushanwa  ku rwego rw’Akarere n’urw’Isi bashoboye.

Minisitiri wa Siporo, Munyangaju Aurore Mimosa  avuga ko ikifuzo bafite ari uko Siporo mu mashuri yongera ikagaruka ariko hakazamo umuco wo kurushanwa hagamijwe  gushaka impano  mu bakiri bato  kuko impano  itaboneka batakoze amarushanwa.

Minisitiri wa Siporo, Munyangaju Aurore Mimosa avuga ko abana bagomba gushakirwa amarushanwa ahoraho kugira ngo impano zigaragare

Muri iyi minsi  hamwe mu  bigo by’amashuri  nta bibuga bifasha abana gukina bigihari kuko byatewemo ubusitani. Minisitiri Munyangaju avuga ko iki kibazo bakiganiriyeho na Minisiteri y’Uburezi “MINEDUC” ko ubu aho barimo kubaka ibyumba bishya by’amashuri bagomba no gusiga aho abana bazakinira. Yakomeje avuga ko basabye ibigo byegeranye ibifite ibibuga bajya babisangira ariko ko n’ibi bigo bitabifite  bavuganye kandi babyemeranyije  ko bigomba kubishaka  kugira ngo n’amarushanwa azashoboke.

 

Umwanditsi:

BUGINGO FIDELE

One Comment on “MINISPORTS  yemeje ko iterambere rya siporo rigiye gushingira  ku bakiri bato”

  1. Nibyiza kuba ibibuga ku mashuri bigiye gusubizwaho nkange ikigo nizeho cy’amashuri abanza hari ikibuga twakiniragaho nyuma bagishyizemo ubusitani abana byabagizeho ingaruka yo kubura aho bakinira usanga umwanya wo gukina biruka bakarenga imbago z’ikigo iyi Minisiteri ya siporo ndumva hari byinshi igiye gukemura murakoze

Tanga Igitekerezo

Email yanyu ntigaragazwa ku rubuga. Amazina na Email ni ngombwa.