17°C , Partly cloudy | Kigali-Rwanda

Minisitiri w’Ubuhahirane w’u Budage azasura u Rwanda kuwa Kane

Yanditswe na Twagira Wilson

Ku ya 13-08-2019 saa 19:08:02
Minisitiri w'u Budage ushinzwe iterambere, Gerd Müller, uzasura u Rwanda

Mu rwego rwo gushimangira ubufatanye n’ubutwererane hagati y’u Rwanda n’igihugu cy’u Budage, Ambasade y’u Budage mu Rwanda yatangaje ko Minisitiri w’u Budage ushinzwe ubuhahirane n’iterambere ry’ubukungu Gerd Müller hamwe n’intumwa ayoboye bazasura u Rwanda kuwa Kane tariki ya 15 Kanama 2016.

Muri urwo ruzinduko bazasura uruganda rwa Volkswagen rukora imodoka rukorera mu Rwanda, rukaba rukomoka mu Budage. Uru ruganda ruteranyiriza mu Rwanda izo modoka zo mu bwoko bwa Volkswagen.

Umuyobozi Mukuru ushinzwe ibikorwa muri Ambasade y’u Budage mu Rwanda, Renate Charlotte Lehner, mu itangazo rigenewe abanyamakuru yashyize ahagaragara kuri uyu wa Kabiri risobanura iby’uruzinduko rwa Minisitiri w’u Budage, avuga zimwe mu mpamvu z’urwo ruzinduko ari ugusura no kwirebera ibikorwa by’uruganda rwa Volkswagen.

Ati «Intego y’uruzinduko rwa Minisitiri Gerd Müller mu Rwanda ni ugusura uruganda rwa Volkswagen n’ibihakorerwa, aho azaboneraho umwanya wo kugirana ibiganiro n’itsinda ry’abashoramari b’Abadage bakorera mu Rwanda, nyuma agirane ikiganiro n’itangazamakuru kizayoborwa n’umuyobozi mukuru w’uruganda rwa Volkswagen ishami ryo mu Rwanda Michaella Rugwizangoga.»

Icyo kigo kitwa ‘Volkswagen Mobility Solutions Rwanda’ giherereye mu gice cyahariwe inganda i Masoro mu Karere ka Gasabo, cyatangiye giteranya imodoka 5.000 ku mwaka zo mu bwoko bwa VW Polo, VW Passat, VW Tiguan, VW Teramont na VW Amarok.

Nibura abantu bari hagati ya 500 na 1000 babonye imirimo kubera iki kigo cya Volkswagen cyatangiye gukorera mu Rwanda.

Imodoka ya mbere ya VW yateranyirije mu Rwanda yo mu bwoko bwa VW Polo iragura 23.881 by’amadolari ya Amerika, ni ukuvuga miliyoni zirenga gato 20 z’amafaranga y’u Rwanda, akaba ari nayo ihendutse. Iki kigo kimaze guhugura abakozi 34 bahuguwe ku bikorwa byacyo, barimo Abanyarwanda bane.

Volkswagen ikaba yarayashoye imari ingana na miliyoni 20 z’Amadolari y’Amerika mu bijyanye no guteranya imodoka no kuzisangira, biteganyijwe ko izajya yinjiza mu Rwanda ibikoresho by’imodoka hanyuma zihateranyirizwe.

Minisitiri w’u Budage Gerd Müller yari aherutse gusura u Rwanda mu myaka isaga 2 ishize hari mu mwaka wa 2016, aho yasuye ikigo cya IPRC Kigali, ahasura imishinga ijyanye n’ikoranabuhanga u Budage buteramo inkunga u Rwanda by’umwihariko urwgo rw’uburezi mu rwego rwoguteza imbere imyuga n’ubumenyi ngiro.

Minisitiri w’u Budage ushinzwe iterambere, Gerd Müller, uzasura u Rwanda

TANGA IGITEKEREZO

Leave a Reply

Your email address will not be published. Required fields are marked *