24°C , Mostly cloudy | Kigali-Rwanda

Minisitiri w’Intebe yasabye abacamanza ba gisirikare kwihutisha imanza

Yanditswe na MUTUNGIREHE SAMUEL

Ku ya 14-04-2018 saa 10:33:08

Minisitiri w’Intebe, Dr. Ngirente Edouard yasabye abacamanza barahiriye inshingano zo guca imanza mu rukiko rukuru rwa Gisirikare kwihutisha imanza zibageze imbere kuko iyo imanza zitinze zigira ingaruka ku muryango nyarwanda.

Uwo muhango wo kurahiza abo bacamanza wabaye ejo hashize tariki 13 Mata 2018. Abarahiye ni Maj. Sibomana Cyrille, Maj. Fanuel Karibu na Captain Kayijuka Frederic n’umushinjacyaha Lt. Umuhire Triphonie

Minisitiri w’Intebe, Dr Ngirente Edouard (Uwa gatatu), iburyo habanza Maj. Sibomana Cyrille na Maj. Fanuel Karibu, ibumoso habanza Lt. Umuhire Triphonie na Capt. Kayijuka Frederic (Foto James R)

Minisitiri w’Intebe yagize ati: “Ubutinde bw’imanza bugira ingaruka nyinshi ari kuri sosiyete yacu y’Abanyarwanda cyangwa se n’abaciriwe imanza muri rusange.

Iyo ndahiro ni igihango mugiranye n’igihugu, ndetse cyane cyane ni igihango mugiranye n’Umukuru w’Igihugu wabashinze iyi mirimo; tukaba twizeye ko muzayisohoza uko bikwiye nk’uko mumaze kubitwemerera hano”.

Yabibukije ko akazi bashinzwe ari akazi gakomeye ariko na none igihugu kizeye ko bazagakorana umurava.

Ati: “Ibyemezo muzafata ni ibyemezo bikomeye bishobora kugira ingaruka ku buzima bw’abantu ndetse no ku miryango yabo, tukaba twizeye ko muzabifatana ubushishozi. Bisaba kandi ko ibyemezo byose muzafata bigomba kujya bishingira ku mategeko, ku bushishozi, ubuhanga n’ukuri. Mu kubashinga izi nshingano ni uko igihugu cyari kibibatezeho.”

Minisitiri w’Intebe, Dr.Ngirente yasabye abo bacamanza n’Umushinjacyaha guhora bihugura, kugira ngo bage babasha gutahura amayeri yose y’abanyabyaha, bakoresha ikoranabuhanga ndetse no kwihutisha imanza zibageze imbere.

Umucamanza Maj. Sibomana Cyrille, yabwiye itangazamakuru ko nubwo ari ubwa mbere bagiye gutangira iyo mirimo kandi akazi k’ubucamanza katoroshye ariko iby’amategeko babyigiye bityo nta kizabananira.

Ati: “Twagizwe abacamanza mu Rukiko Rukuru rwa Gisirikare, tuzahangana n’ibibazo bizaba bije mu nkiko za gisirikare.”

Yakomeje avuga ko gukemura ubutinde ku manza bisaba umuhate wa buri wese kandi nawo bawufite.

Umushinjacyaha Lt. Umuhire Triphonie yavuze ko mu kazi kabo azashyira imbaraga mu kubahiriza indahiro yarahiye akoresha umurava.

Ati: “Ni ukurushaho gukoresha umurava nkuko twabisabwe na Minisitiri w’Intebe dushyira amategeko  mu bikorwa.”

Aba barahiye, bahawe izi nshingano nk’uko byemejwe n’Inama y’Abaminisitiri yateranye tariki ya 19 Mutarama na 16 Werurwe 2018 yemeje iteka rya Minisitiri w’Intebe ribashyira mu mirimo.

 

TANGA IGITEKEREZO

Leave a Reply

Your email address will not be published. Required fields are marked *