21°C , Partly sunny | Kigali-Rwanda
Minisitiri wa Siporo mu Bufaransa, Laura Flessel-Colovic hamwe na Bideri Diogene umunyamategeko muri CNLG bari ku Rwibutso rwa Jenoside yakorewe Abatutsi rwa Kigali ku Gisozi

Minisitiri wa Siporo mu Bufaransa yasuye Urwibutso rwa Jenoside rwa Kigali

Yanditswe na TWAGIRA WILSON

Ku ya 17-02-2018 saa 07:10:27

Minisitiri Laura Flessel-Colovic, wo mu Bufaransa  ufite siporo mu nshingano ze, hamwe n’intumwa ayoboye, baherekejwe n’umunyamategeko muri CNLG Bideri Diogene, basuye Urwibutso rwa Jenoside yakorewe Abatutsi rwa Kigali ku Gisozi, aho yashyize indabo ku rwibutso,  yunamira imibiri y’abasaga ibihumbi 258  ishyinguye muri urwo rwibutso.

Minisitiri wa Siporo mu Bufaransa, Laura Flessel-Colovic hamwe na Bideri Diogene umunyamategeko muri CNLG bari ku Rwibutso rwa Jenoside yakorewe Abatutsi rwa Kigali ku Gisozi

Muri urwo ruzinduko, Minisitiri Flessel Laura yasuye ibice bitandukanye bigize urwibutso, aho yasobanuriwe uko amacakubiri n’ivangura byagejeje abantu  kuri Jenoside yakorewe Abatutsi mu 1994, yerekwa mu buryo bw’amashusho amateka agaragaza uko Jenoside yateguwe,  ikarinda ishyirwa mu bikorwa.

Amaze  gusura Urwibutso rwa Jenoside rwa Kigali, Minisitiri Flessel yakiriwe na Minisitiri w’Umuco na Siporo  w’u Rwanda, Uwacu Julienne bagirana ibiganiro byihariye  biteganyijwe ko  abo bayobozi  bashyira ibuye ry’ifatizo ku mushinga wo kubaka ikibuga cya mbere cya “CityStade” kizaba giherereye hafi ya Sitade Amahoro.

Minisitiri Flessel uri mu ruzinduko mu Rwanda biteganyijwe ko asura Ishuri ry’Abafaransa rya Antoine Saint Exupéry, yitabire amahugurwa y’abatoza b’umukino w’amagare kuri Sitade Amahoro   akaboneraho n’umwanya wo gusabana n’Abafaransa baba mu Rwanda.

Ikindi ni uko kuri uyu wa Gatandatu, biteganyijwe ko Laura Flessel yitabira isiganwa ry’imikino y’amagare, muri Shampiyona y’Afurika y’Amagare irimo kubera mu gihugu.

Iyo Shampiyona y’Afurika irimo kubera mu Rwanda ku nshuro ya 13 yitabiriwe n’ibihugu 22. Eritrea ni yo iri ku isonga mu bihugu bimaze kwegukana imidali myinshi (10), ikurikirwa na Ethiopie inganya n’u Rwanda (8), mu gihe u Burundi, Namibie na Algeria bifite umudali umwe.

 

 

TANGA IGITEKEREZO

Leave a Reply

Your email address will not be published. Required fields are marked *