19°C , Mostly cloudy | Kigali-Rwanda
Minisitiri Uwacu Julienne na Perezida wa Komite Olempike y'u Rwanda Amb Munyabagisha bari kumwe n'abakinnyi bazahagararira u Rwanda muri Commonwealth Games 2018

Minisitiri Uwacu yasabye abazitabira “Commonwealth Games 2018”   guhesha ishema igihugu

Yanditswe na BUGINGO FIDELE

Ku ya 10-03-2018 saa 16:30:44

Minisitiri w’Umuco na Siporo, Uwacu Julienne yasabye abakinnyi bazaserukira u Rwanda mu mikino ihuza ibihugu bikoresha ururimi rw’icyongereza “Commonwealth Games 2018” kuzitwara neza bagahesha ishema igihugu.

Minisitiri Uwacu Julienne na Perezida wa Komite Olempike y’u Rwanda Amb Munyabagisha bari kumwe n’abakinnyi bazahagararira u Rwanda muri Commonwealth Games 2018

Ibi yabibasabye ejo hashize tariki 09 Werurwe 2018 ubwo habaga umuhango wo kubashyikiriza ibendera ry’u Rwanda.  Ministiri Uwacu akaba yarabwiye aba bakinnyi ko imikino nk’iyi aba ari umwanya wo kugaragaza ishusho y’umuco w’igihugu bikagaragarira mu myitwarire n’uko babana n’abandi.

Uwacu yabwiye aba bakinnyi ko babitezeho umusaruro mwiza ariko ko bibasaba gukora cyane. Ati “Muzafatanye nk’ikipe y’u Rwanda.  Muzahura n’abandi bakinnyi kandi bakomeye  mugomba kuzirikana ko gutsinda bishoboka kandi mukabiharanira kuva ku munsi wa mbere kugeza ku munsi wa nyuma”.

 Ministiri Uwacu  yongeye kwibutsa aba bakinnyi ko iyo ugiye uhagarariye igihugu ugatoroka uba ubaye ikigwari. Ati “Ndabizi ko mwese atari ubwa mbere mugiye kandi mutigeze mutoroka ariko nagira ngo mbibutse ko ari ubugwari kugenda uhagarariye igihugu ugatoroka”.

Iyi mikino izabera mu mujyi wa  Gold Coast muri  Australia kuva tariki  04 kugeza 15 Mata 2018, u Rwanda  rukaba rugiye kwitabira ku nshuro ya 3, ruzahagararirwa  n’abakinnyi 17 bakina imikino 4  itandukanye. Aba ni  Nyirarukundo Salome, Nizeyimana Alexis, Sugira James, Nishimwe Beatha, Ishimwe Alice na Tuyishimire Christophe mu basiganwa ku maguru “Athletics. Hari Ndayisenga Valens, Areruya Joseph, Ukiniwabo Jean Paul Rene, Uwizeye Jean Claude, Uwizeyimana Bonaventure, Munyaneza Didier, Ingabire Beatha na Manizabayo Magnifique mu gusiganwa ku magare “Cycling”.

Abandi bakinnyi ni Nzayisenga Charlotte na Mutatsimpundu Denyse bakina Volleyball yo ku mucanga “Beach Volleyball”   na  Niyonzima Vedaste uzakina mu kiciro cy’abaterura ibiremereye mu bafite ubumuga  “ Para Powerlifting”.

Areruya Joseph usanzwe akina umukino wo gusiganwa ku magare uzagenda ayoboye bagenzi be bose yatangaje ko hariya bagomba  bazagenda baharanira kwitwara neza kandi babyizeye.

Perezida wa Komite Olempike y’u Rwanda, Amb Munyabagisha Valens yatangaje ko aba bakinnyi mu byiciro bitandukanye biteguye  n’ubu bakaba  bakomeje imyiteguro.

Kuba iyi mikino izaba mu gihe u Rwanda hazaba hibukwa Jenoside yakorewe Abatutsi muri Mata 1994, Amb Munyabagisha yavuze ko basabye abategura iyi mikino ko  tariki 7 Mata 2018 hazaba umunsi wo kwibuka, abakinnyi b’u Rwanda bakazifatanya n’Abanyarwanda baba muri kiriya gihugu. Aha yavuze ko uzaba n’umwanya mwiza wo gusangiza abandi  amateka  kuri Jenoside yakorewe abatutsi mu Rwanda.

Iyi kipe y’u Rwanda izagenda mu byiciro 2 aho tariki 24 Werurwe 2018 hazagenda abakina imikino ngororamubiri, Beach Volleyball n’umukinnyi  uterura  ibiremereye mu bafite ubumuga  “ Para Powerlifting” naho tariki 05 Mata 2018 hagende ikipe y’umukino wo gusiganwa ku magare.

TANGA IGITEKEREZO

Leave a Reply

Your email address will not be published. Required fields are marked *