22°C , Partly sunny | Kigali-Rwanda

Minisitiri muri Rhenanie Palatinat yeretswe igishushanyo mbonera cy’Umujyi wa Kigali 2050

Yanditswe na Nyiraneza Judith

Ku ya 06-10-2019 saa 13:28:54
Minisitiri w’Umuco n’Uburezi muri Rhenanie Palatinat mu Budage, Dr. Stephanie Hubig uwa mbere uhereye iburyo imbere n'itsinda ayoboye akurikiwe n'Umuyobozi w’Umujyi wa Kigali Rubingisa Pudence

Minisitiri w’Umuco n’Uburezi muri Rhenanie Palatinat mu Budage, Dr. Stephanie Hubig, n’itsinda ry’abantu 19 ayoboye ryiganjemo abarimu n’abakozi b’iyo Minisiteri, basuye Umujyi wa Kigali, batambagizwa inzu imurikirwamo igishushanyo mbonera, bagamije kureba uburyo mu igenamigambi rirambye ry’Umugi n’uburezi butasigaye inyuma mu ikorwa ry’igishushanyo mbonera 2050.

Umukozi w’Umujyi wa Kigali uyobora Ishami ry’Imiturire n’Imitunganyirize y’Umujyi, Fred Mugisha, wabatambagije abereka uko igihushanyo mbonera giteganya uko Umujyi uzaba umeze muri 2050 yabagaragarije ko amashuri n’amavuriro bigomba kuba biri mu gace gafite abaturage bari hagati ya 5.000-15.000.

Ati “Igishushanyo mbonera kivuguruye cyateganyije ko kuva ku baturage 5.000 kugeza kuri 15.000, amashuri abanza, ayisumbuye n’ivuriro bizaba bihari kugira ngo ibyo bikorwa by’ibanze bibe bibari hafi.”

Minisitiri w’Umuco n’Uburezi Dr. Stephanie Hubig yanyuzwe n’uburyo uburezi butasigaye inyuma mu gishushanyo mbonera 2050 cy’Umujyi wa Kigali.

Ati “Nkange ndi Minisitiri w’Umuco n’Uburezi, byadushimishije ko n’uburezi babutekerejeho mu gishushanyo mbonera. Twanaganiriye n’ibindi dushobora gufatanyamo mu butwererane ibihugu byombi bisanganywe.”

Umuyobozi w’Umujyi wa Kigali Rubingisa Pudence yavuze ko iri tsinda rya Rhenanie-Palatinat ryasuye Umujyi wa Kigali rikamurikirwa igishushanyo mbonera kivuguruye kugira ngo banarebe ibyo bazafatanyamo mu ishyirwa mu bikorwa ryacyo cyane cyane ibijyanye n’uburezi no kubungabunga ibidukikije.

Hashize imyaka 37 kuva ubutwererane bw’Intara ya Rhenanie-Palatinat n’u Rwanda butangiye, bakaba bibanda mu bikorwa by’uburezi n’umuco.

Dr. Stephanie Hubig, Minisiteri w’Umuco n’Uburezi muri Rhenanie Palatinat avugana n’itangazamakuru

Umwanditsi:

Nyiraneza Judith

Tanga Igitekerezo

Email yanyu ntigaragazwa ku rubuga. Amazina na Email ni ngombwa.