18°C , Showers | Kigali-Rwanda
Minisitiri w'Ubuzima Dr. Gashumba Diane, aha abana ibinini bya Vitamine A , muri gahunda ya Baho Neza (Foto Mutungirehe S)

MINISANTE yatangije ubukangurambaga bugiye kwita ku mibereho y’umuryango

Yanditswe na Mutungirehe Samuel

Ku ya 25-04-2019 saa 15:57:15

Minisiteri y’Ubuzima (MINISANTE) yatangije ubukangurambaga bugamije kuzamura ikigero k’imibereho myiza y’ubuzima bw’umubyeyi n’umwana mu muryango, bwiswe Baho Neza.

Ubwo bukangurambaga bukomatanyije buri mu rwego rwa Gahunda y’Igihugu y’Iterambere Rirambye (NSTS) yatangiye gushyirwa mu bikorwa, ikazagera mu mwaka wa 2024.

Iyi gahunda irimo abafatanyabikorwa nka Imbuto Foundation, Minisiteri y’Ingabo binyuze mu bikorwa by’ingabo, amadini n’amatorero, ku buryo MINISANTE yizera ko izagera ku ntego zayo.

Minisitiri w’Ubuzima, Dr Gashumba Diane, ubwo yatangizaga ubwo bukangurambaga ku rwego rw’Igihugu mu Karere ka Nyagatare mu Murenge wa Karama, yagize ati,

Ati “Biri muri gahunda y’Umukuru w’Igihugu y’imyaka irindwi yasezeranyije Abanyarwanda ubwo twari tumaze kumutora mu 2017, gahunda yo mu buzima, yo kwegereza abaturage serivisi nziza z’ubuzima.”

Yasobanuye ko ubwo bukangurambaga buzamara amezi atatu, kuva tariki ya 23 Mata kugeza 30 Nyakanga 2019, buzakorwamo gahunda nyinshi zireba ababyeyi bose, abagabo n’abagore n’abana.

Ati “Hazatangwa ifu ya Ongera; ni ifu y’ingirakamaro ihabwa abana bafite amezi kuva kuri atandatu kugera ku myaka itanu. Irimo vitamine zirenze icumi n’intungamubiri zituma umwana akura neza ntagwingire. Musabwa kuyitabira kuko igihugu cyacu n’abafatanyabikorwa baba bashyizemo imbaraga n’amikoro kugira ngo turwanye ikibazo k’imirire mibi.”

Ibindi bizatangwa muri ayo mezi y’ubukangurambaga ni ibinini bya Vitamine A, ituma amaso y’abana abona neza, amaraso akaba asukuye bikanabarinda indwara z’ubuhumyi. Hari kandi ibinini by’inzoka na byo bizahabwa abana mu gihugu hose, bituma abana batarwara inzoka ngo zibazahaze, bityo ibyo barya bibayoboke batane no kugwingira n’imirire mibi.

Minisitiri Gashumba yakomeje avuga ko ababyeyi batwite na bo bazapimwa, abasaba kwitabira iyo gahunda kuko igipimo cy’abipimisha inshuro enye zisabwa ku mubyeyi kikiri hasi ku rwego rw’igihugu.

Umuyobozi w’Intara y’Iburasirazuba, Mufulukye Fred, yavuze ko Abanyarwanda bakwiye kwibuka ko kuri ubu urugamba rw’amasasu rwarangiye, urugamba igihugu gisigaranye ari urw’iterambere no kwegereza abaturage serivisi nziza, bityo bakwiye kwitabira serivisi ziri muri ubwo bukangurambaga.

Bamwe mu babyeyi bo mu Karere ka Nyagatare by’umwihariko mu Murenge wa Karama bitabiriye ubwo bukangurambaga, bahamirije Imvaho Nshya ko bageze kure mu myumvire y’ubuzima bwiza mu rugo, aho bamwe nta mwana bakirwaza biturutse ku isuku nke cyangwa ngo age kwitabwaho kubera imirire mibi.

Umwari Evangeline, ati “Nta mwana wange wigeze ahura n’uburwayi buturutse ku mwanda, nta nubwo bigeze barwara ngo nge kubavuza inzoka cyangwa marariya. Tubagaburira neza tukagira n’isuku mu rugo.”

Ubu bukangurambaga kandi buzaba n’umwanya wo kongera kwibutsa ababyeyi kwitabira gahunda zo kuboneza urubyaro, zitangwa ku bigo nderabuzima byose n’ibitaro, bigafasha umuryango kuringaniza urubyaro babyara abo bafitiye ubushobozi.

Minisitiri w’Ubuzima Dr. Gashumba Diane, aha abana ibinini bya Vitamine A , muri gahunda ya Baho Neza (Foto Mutungirehe S)

TANGA IGITEKEREZO

Leave a Reply

Your email address will not be published. Required fields are marked *