17°C , Partly cloudy with thunderstorms | Kigali-Rwanda
Minisitiri w'Ubuzima Dr Diane Gashumba(ibumoso) n'umuyobozi mukuru wa Babyl ku rwego rw’isi Tracey McNeil (Foto Sezibera. A)

MINISANTE yasinye amasezerano azafasha Abanyarwanda kwivuza ku ikoranabuhanga

Yanditswe na SEZIBERA ANSELME

Ku ya 11-01-2018 saa 07:44:41

Minisiteri y’Ubuzima (MINISANTE) yasinyanye amasezerano y’ubufatanye na Sosiyete Babyl Ltd ashingiye ku buvuzi bukoresha ikoranabuhanga rya telefone kugira ngo Abanyarwanda barusheho kwegerezwa no guhabwa serivisi nziza binyuze muri RSSB by’umwihariko abakoresha ubwishingizi bwa RAMA na Mituweli.

Minisitiri w’Ubuzima Dr Diane Gashumba(ibumoso) n’umuyobozi mukuru wa Babyl ku rwego rw’isi Tracey McNeil (Foto Sezibera. A)

Mu kiganiro n’abanyamakuru, uhagarariye Babyl mu Rwanda Dr Singa Patrick avuga ko hifashishijwe ikoranabuhanga rya “Chatbot” umurwayi azajya abwifashisha ari iwe mu rugo agahamagara abaganga ba Babyl abatangariza uburwayi afite ubwo ari bwo. Uburyo bwa kabiri umurwayi akoresha ni ukugana ikigo nderabuzima kimwegereye umuforomo akamufasha yifashishije “Chatbot”.

Avuga ko Chatbot izakoreshwa muri ubwo buryo bwombi ariko Bayl Ltd ivure abarwayi bafite ubwishingizi bwa RAMA na Mituweli kandi akavuga ko nta mpinduka n’imwe izabaho kuko uko basanzwe bishyura ariko bazakomeza ibiciro bitazahindurwa.

Minisitiri w’Ubuzima Dr Gashumba Diane atangaza ko ubwo buryo bwo kugeza serivisi z’ubuvuzi mu ikoranabuhanga ku banyarwanda zizagira impinduka nziza mu kugabanya igihe abantu batakaza bategereje kugerwaho n’abaganga, kandi zizarushaho kubegera hifashishijwe amafarumasi, amavuriro y’ingoboka, ibigo nderabuzima ndetse n’ibitaro bikorana na Leta.

Agira ati: Icyo twakwishimira ni uko tuzagira ubuvuzi bwo ku rwego rwo hejuru ku mavuriro y’ingoboka (Poste de santé) kuko mu gihugu zigomba kuba 2 148 zingana n’utugari ikaba ari yo politiki y’igihugu ndetse ikaba no muri gahunda y’imyaka 7 ya manda ya Perezida wa Repubulika. Nta bwo twabona abaganga 2148 aka kanya buzura utwo tugari kuko kwigisha abaganga biratinda, chatbot izafasha kugira ngo uwagombaga kwivuriza ku rwego rw’ivuriro ry’ingoboka abone ubuvuzi nk’ubwo yagahawe n’umuganga hakoreshejwe ikoranabuhanga”.

Hifujwe kumenya niba serivisi za Babyl zitazabangamira gahunda yari isanzweho isaba umuntu mu gihe arwaye kugana muganga, Dr Gashumba atangaza ko izo serivisi zombi nta ho zizabangamirana ahubwo zizuzanya.

Agira ati: Hari uburwayi busaba kubonana imbonankubone na muganga hakaba n’ubundi bwakwifashisha iryo koranabuhanga rya Babyl Ltd bakamusuzuma bakaba banamugira inama yo kugana muganga, ikindi buzagabanya abivuzaga magendu batinyaga gukora ingendo zijya kwa muganga kuko bazaba basuzumwa ku ikoranabuhanga bibereye mu rugo.”

Dr Singa we avuga ko serivisi Babyl itanga zimaze kwishimirwa kandi zishakwa n’Abanyarwanda, atangaza ko kugira ngo umuntu yemererwe kwivuza muri Babyl agomba kubanza kwiyandikisha muri serivisi zabo.

Umuyobozi mukuru wa Babyl ku rwego rw’isi Tracey McNeil, atangaza ko serivisi zabo zigeze kuri 50% by’abaturage ku isi, akishimira imikoranire yabo na Leta y’u Rwanda kuko ari kimwe mu bihugu  ku isi byabashije kumvisha abaturage bacyo kwakira serivisi za Babyl kandi akaba yizeye ko bizatanga ibisubizo byiza.

Babyl Ltd yatangiye mu Rwanda mu 2016 kugeza ubu imaze kwiyandikishwamo n’Abanyarwanda 750 000 bakenera serivisi zayo z’ubuvuzi.

TANGA IGITEKEREZO

Leave a Reply

Be the First to Comment!

avatar