18°C , Mostly cloudy | Kigali-Rwanda
Dr.Ndimubanzi Patrick, Umunyamabanga wa Leta muri Minisiteri y'Ubuzima ushinzwe ubuvuzi rusange (ubanza ibumoso) asobanurira abagize imitwe ya Politiki mu Rwanda ibyo guhangana n'ibiyobyabwenge (Foro Mutungirehe S)

MINISANTE yasabye amashyaka ubufatanye mu kurandura ibiyobyabwenge

Yanditswe na Mutungirehe Samuel

Ku ya 11-10-2018 saa 19:53:13

Minisiteri y’Ubuzima yagaragarije abagize Ihuriro ry’Igihugu nyunguranabitekerezo ry’imitwe ya Politiki (NFPO) ko kurwanya ibiyobyabwenge bisaba ubufatanye bw’inzego zose.

Iyi minisiteri (MINISANTE) yasobanuye ko abayoboye imitwe ya politiki igera ku mbaga y’Abanyarwanda bakwiye kubigira ibyabo mu bikorwa bya buri munsi.

Byagarutsweho mu kiganiro Umunyamabanga wa Leta muri MINISANTE, Dr. Ndimubanzi Patrick, yagiranye n’abagize imitwe ya Politiki, kuri uyu wa 11 Ukwakira 2018, ku ngamba za Leta mu guhangana n’ikoreshwa, icuruzwa n’ikwirakwizwa ry’ibiyobyabwenge, hagaragazwa urugendo rumaze rukorwa n’ibigiye gukorwa mu guca burundu ibiyobyabwenge.

Yagize ati: “Buri rwego rubifitemo uruhare; umuturage afitemo uruhare, abantu bafite uruhare ku baturage nk’abanyamadini n’abandi bayoboye abandi, abantu babifitemo uruhare ku buryo namwe bigiye muri gahunda z’abantu muhagarariye, tugahaguruka nk’igihugu twese hamwe nta gishobora kutunanira.”

Dr. Ndimubanzi yakomeje yibutsa abagize imitwe ya politiki ko urwo rugamba rudashobora kurangira umunsi umwe, bisaba guhozaho.

Ati: “Ni ukuvuga ko tugomba guhozaho, ntibibe ubukangurambaga twese duhagurukira noneho ngo bisinzire; bigomba kuba ari ibintu bihoraho, bikazafata imyaka, ikibazo kikagabanuka noneho tugakora uko dushoboye kugira ngo dukumire ntibyongere kugaruka.”

Dr.Ndimubanzi Patrick, Umunyamabanga wa Leta muri Minisiteri y’Ubuzima ushinzwe ubuvuzi rusange (ubanza ibumoso) asobanurira abagize imitwe ya Politiki mu Rwanda ibyo guhangana n’ibiyobyabwenge (Foro Mutungirehe S)

Dr. Ndimubanzi yabwiye itangazamakuru ko abantu bakwiye kumva neza ko ibiyobyabwenge bigira ingaruka nyinshi ku bice by’umubiri w’umuntu bidasize n’imitekerereze ye bigahindukira bikagira ingaruka no mu muryango atuyemo.

Minisiteri y’Ubuzima yagaragaje kandi ko hari ubwoko bw’ibiyobyabwenge bwinshi bikoreshwa mu buryo butandukanye, nko gutumura, kunywa, ibiyobyabwenge bitera mu nshinge, ibyo bahumeka cyangwa bashoreza; inzoga z’inkorano n’ibyatsi bahekenya n’imbuto zabyo nka Rwiziringa n’ibindi.

Bamwe mu bagize imitwe ya politiki mu Rwanda, nyuma yo kumva no gutanga ibitekerezo ku ngingo zitandukanye, bagaragaje ko hakiri n’ikibazo cy’amategeko asobanura neza ibiyobyabwenge n’ibindi bisindisha kuko hari ibitari mu mategeko kandi bigaragaza ingaruka mbi ku babinyoye, mu ishusho y’ibiyobyabwenge.

Depite Habineza Frank, wo mu ishyaka DGPR ati “Ni ikibazo gikomeye kandi ikintu dukwiye twese tugomba gukora ni ugufatanya, ni ukuvuga ngo nta bwo twagisigira inzego z’umutekano nka polisi n’abakora ku mipaka, n’abanyarwanda twese dukwiye gukanguka, tugafatanya tukamenya ngo ni bande bakoresha ibyo biyobyabwenge mu giturage kuko tuzi ko byangiriza ubuzima na sosiyete yacu.

Abana bacu, abavandimwe bacu, abarwanashyaka bose tukabereka, na Minisiteri y’Ubuzima na yo ikongeramo imbaraga bagasobanura neza ibiyobyabwenge, ibitari byo ni ibihe kugira ngo abantu bamenye neza ibyo barwanya ni ibihe, ku mipaka naho ingamba zongerwe, abashinzwe kubitahura na bo bongere irindi koranabuhanga n’ubwenge bwo kubirwanya no ku kibuga k’indege bongeremo imbaraga, twigishe abantu kugira ngo buri wese amenye ko byangiza ubuzima.”

Depite Ndangiza Madina wo mu mutwe wa Politiki, PDI yagize ati “Ni ikibazo gihangayikishije, yaba mu rubyiruko rwize n’urutarize ndetse no mu bantu bakuru, birahangayikishije cyane kuko tuvuga ko urubyiruko ari amaboko y’u Rwanda ari bo bayobozi b’ejo hazaza.”

Mu rwego rwo gukaza no gukumira ibiyobyabwenge, hatowe itegeko No 68/2018 ryo ku wa 30 Kanama 2018, ryakajije ibihano aho ukoresha ibiyobyabwenge ashobora gufungwa burundu ndetse n’ihazabu ishobora kugera kuri miliyoni 50 z’amafaranga y’u Rwanda.

TANGA IGITEKEREZO

Leave a Reply

Your email address will not be published. Required fields are marked *