16°C , Partly cloudy | Kigali-Rwanda
Umunyamabanga Uhoraho muri Minisiteri y'Ubuzima, Dr Nyemazi Jean Pierre (iburyo) asobanura uko mu Rwanda harimo kubakwa ubuvuzi bwa serivise zo ku rwego rwo hejuru (Foto Gisubizo G)

MINISANTE: Ingamba zo kugabanya abajya kwivuriza hanze

Yanditswe na MUTUNGIREHE SAMUEL

Ku ya 12-06-2018 saa 08:25:31

Umunyamabanga Uhoraho muri Minisiteri y’Ubuzima, Dr. Nyemazi Jean Pierre, yatangaje ko muri gahunda yo kubaka ubuvuzi, harimo gutegurwa uburyo mu Rwanda hakubakwa ibitaro bifite serivisi zo hejuru, zizatuma nta Munyarwanda cyangwa umunyamahanga uzakenera kujya kwivuriza hanze mu buryo bwihuse, akazajya avurirwa mu bitaro byo mu Rwanda.

Umunyamabanga Uhoraho muri Minisiteri y’Ubuzima, Dr Nyemazi Jean Pierre (iburyo) asobanura uko mu Rwanda harimo kubakwa ubuvuzi bwa serivise zo ku rwego rwo hejuru (Foto Gisubizo G)

Yabigarutseho ejo hashize ku wa 11 Kamena 2018 ubwo yari mu Nteko Ishinga Amategeko imbere ya komisiyo ishizwe gukurikirana imikoreshereze y’umutungo wa Leta, PAC.

Ikibazo cy’ubuvuzi bwihuse, kandi bwo ku rwego rwo hejuru cyabajijwe na Depite Munyangeyo Theogene, umwe mu bagize PAC, ati “Ubu hano mu gihugu hubakwa amahoteri y’inyenyeri 5; birajyana n’iterambere ry’igihugu n’impinduka zose, igihugu gisurwa, kigendwamo n’abantu benshi, mu ngamba z’igenamigambi mufite ku rwego rwa Minisiteri, ibitaro twavuga ngo biri ku rwego rw’inyenyeri 5, yizewe, hajyamo wa mushoramari waje mu gihugu, nk’umunyemari, akenshi baba bakuze bakenera kwivuza bakabaza kajugujugu ngo bage i Nairobi (Kenya), icyo mukigeze hehe niba bijyana n’iri terambere rihari?”

Umunyamabanga Uhoraho muri Minisiteri y’Ubuzima, Dr. Nyemazi Jean Pierre, yasubije ko icyo cyatekerejwe mu buryo bafite bwo kubaka ubuvuzi mu Rwanda, ariko bahereye ku guha ubushobozi ibitaro bisanzwe mu Rwanda bivura Abanyarwanda benshi, bakabanza kubona serivisi nziza z’ubuvuzi.

Ati “Ni ibintu biri mu igenamigambi ryacu cyane, binajyanye no kuzamura ireme ry’ubuvuzi haba ku kigo nderabuzima, ibitaro by’akarere, iby’intara ndetse n’ibitaro by’ikitegererezo, icyo kirahari, byose bizagenda bigerwaho. Byose bizagenda bivugururwa, byaba ukubishyiramo abaganga b’inzobere, ibikoresho, kubibonera imiti no gukomeza kubifasha mu buryo butandukanye kugira ngo tugire ibitaro birenze kimwe bishobora kuba byatanga serivisi z’ubuvuzi ziri hejuru.

Ku rwego ruri hejuru, ni ibitaro bya Kaminuza by’ikitegererezo bya Kigali (CHUK) n’ibya Butare (CHUB), na byo bigakomeza bigahabwa ubushobozi, hakabamo no kuzubaka CHUK nshashya i Masaka; ni uburyo bwo kuzayubaka bikazasaba ubushobozi burenze, ikazatanga servisi zirenze izo ifite ku buryo zihagarika abajyaga kwivuriza hanze”.

Yakomeje avuga ko muri iyo gahunda hari no kubanza kuzuza ibitaro byemejwe birimo ibitaro bya Ruhengeri, Kibuye na Kibungo, bikabona ubushobozi bwo gukora uwo murimo wo kuba ibitaro by’ikitegererezo mu bice biherereyemo. Hari kandi ibitaro bine nabyo bigomba kuzamuka, bikajya mu rwego rw’intara birimo ibya Bushenge, Rwamagana, Kinihira na Ruhango nabyo bigomba kuzura bigatanga serivisi.

Umuyobozi mukuru w’ubuvuzi muri Minisiteri y’Ubuzima, Col. Dr. Muvunyi Zubber, yavuze ko hari imishinga ibiri iriho izatuma mu Rwanda hatangwa serivisi zo mu rwego rwo hejuru, irimo uwa Masaka ahubakwa ikigo cyo kubaga hakoreshejwe ikoranabuhanga, n’undi ugiye gutangira vuba wo kuvura za kanseri hakoreshejwe ibyuma byihariye bishwanyaguza uturemangingo twa kanseri kandi byose bikazaba biri ku rwego rw’Afurika kimwe no kuvugurura urwego rw’ubutabazi bw’ibanze (SAM) aho ubutabazi butazarenza iminota 10 umurwayi akaba ageze aho avurirwa.

Depite Munyangeyo Theogene yabagiriye inama ko mu byo bateganya bakibuka ko mu kubaka ibitaro bikenewe muri urwo rwego rwo gutanga ubuvuzi bwihuse kandi bukomeye bisaba kureba n’aho izo hoteri zubakwa ziherereye, ku buryo bibaye ngombwa ko hakenerwa ubwo butabazi bitafata umwanya munini wo kugeza umurwayi ku bitaro bifite izo serivise.

 

 

TANGA IGITEKEREZO

Leave a Reply

Your email address will not be published. Required fields are marked *